1 Ѿвѣща́въ же валда́дъ саѵхе́йскїй, речѐ:
2 доко́лѣ не преста́неши; пождѝ, да и҆ мы̀ возглаго́лемъ.
3 И҆ почто̀ а҆́ки четверонѡ́жнаѧ ѹ҆молча́хомъ пред̾ тобо́ю;
4 Пребы́сть тѝ гнѣ́въ. что́ бо; а҆́ще ты̀ ѹ҆́мреши, не населе́нна ли бѹ́детъ поднебе́снаѧ; и҆лѝ превратѧ́тсѧ го́ры и҆з̾ ѡ҆снова́нїй;
5 И҆ свѣ́тъ нечести́выхъ ѹ҆га́снетъ, и҆ не произы́детъ и҆́хъ пла́мень:
6 свѣ́тъ є҆гѡ̀ тма̀ въ жили́щи, свѣти́лникъ же въ не́мъ ѹ҆га́снетъ:
7 да ѹ҆ловѧ́тъ ме́ншїи и҆мѣ҄нїѧ є҆гѡ̀, погрѣши́тъ же є҆гѡ̀ совѣ́тъ:
8 вве́ржена же бы́сть нога̀ є҆гѡ̀ въ прѹ́гло, мре́жею да повїе́тсѧ:
9 да прїи́дѹтъ же на́нь прѹ҄гла, ѹ҆крѣпи́тъ на́нь жа́ждѹщихъ:
10 скры́сѧ въ землѝ ѹ҆́же є҆гѡ̀, и҆ ѩ҆́тїе є҆гѡ̀ на стезѝ.
11 Ѡ҆́крестъ да погѹбѧ́тъ є҆го̀ болѣ҄зни: мно́зи же ѡ҆́крестъ но́гъ є҆гѡ̀ ѡ҆б̾и́дѹтъ во гла́дѣ тѣ́снѣмъ:
12 паде́нїе же є҆мѹ̀ ѹ҆гото́вано вели́ко.
13 Поѧдє́ны же да бѹ́дѹтъ плєсны̀ но́гъ є҆гѡ̀, кра҄снаѧ же є҆гѡ̀ да поѧ́стъ сме́рть.
14 Ѿто́ржено же бѹ́ди ѿ житїѧ̀ є҆гѡ̀ и҆зцѣле́нїе, да и҆́метъ же є҆го̀ бѣда̀ вино́ю ца́рскою.
15 Да всели́тсѧ въ хра́минѣ є҆гѡ̀ въ нощѝ є҆гѡ̀, посы҄пана да бѹ́дѹтъ лѣ́пѡтнаѧ є҆гѡ̀ жѹ́пеломъ:
16 под̾ ни́мъ корє́нїѧ є҆гѡ̀ да и҆зсо́хнѹтъ, свы́ше же нападе́тъ пожа́тїе є҆гѡ̀.
17 Па́мѧть є҆гѡ̀ да поги́бнетъ ѿ землѝ, и҆ (не) бѹ́детъ и҆́мѧ є҆гѡ̀ на лицы̀ внѣ́шнемъ:
18 да ѿри́нетъ є҆го̀ ѿ свѣ́та во тмѹ̀:
19 не бѹ́детъ зна́емь въ лю́дехъ є҆гѡ̀, нижѐ спасе́нъ въ поднебе́снѣй до́мъ є҆гѡ̀:
20 но въ свои́хъ є҆мѹ̀ поживѹ́тъ и҆ні́и, над̾ ни́мъ воздохнѹ́ша послѣ́днїи, пе́рвыхъ же ѡ҆б̾ѧ̀ чѹ́до.
21 Сі́и сѹ́ть до́мове непра́ведныхъ, сїе́ же мѣ́сто невѣ́дѹщихъ бг҃а.
Нашли в тексте ошибку? Выделите её и нажмите:
Ctrl + Enter
Книга Иова, 18 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784