1 Неви́нно вїно̀, ѹ҆кори́зненно же пїѧ́нство, и҆ всѧ́къ пребыва́ѧй въ не́мъ не бѹ́детъ премѹ́дръ.
2 Не ра́знствѹетъ преще́нїе царе́во ѿ ѩ҆́рости льво́вы: раздража́ѧй же є҆го̀ и҆ примѣша́ѧйсѧ є҆мѹ̀ согрѣша́етъ въ свою̀ дѹ́шѹ.
3 Сла́ва мѹ́жѹ ѿвраща́тисѧ ѿ досажде́нїѧ: всѧ́къ же безѹ́менъ си́ми соплета́етсѧ.
4 Поноси́мь лѣни́вый не ѹ҆срамлѧ́етсѧ, та́кожде и҆ зае́млѧй пшени́цѹ въ жа́твѹ.
5 Вода̀ глѹбока̀ совѣ́тъ въ се́рдцы мѹ́жа: мѹ́жъ же премѹ́дръ и҆сче́рплетъ ю҆̀.
6 Вели́ка ве́щь человѣ́къ, и҆ драга́ѧ мѹ́жъ творѧ́й ми́лость: мѹ́жа же вѣ́рна (вели́ко) дѣ́ло ѡ҆брѣстѝ.
7 И҆́же без̾ поро́ка живе́тъ въ пра́вдѣ, блажє́ны ѡ҆ста́витъ дѣ́ти своѧ҄.
8 Є҆гда̀ ца́рь пра́веденъ на престо́лѣ сѧ́детъ, не проти́витсѧ пред̾ ѻ҆чи́ма є҆гѡ̀ ничто́же лѹка́во.
9 Кто̀ похва́литсѧ чи́сто и҆мѣ́ти се́рдце; и҆лѝ кто̀ де́рзнетъ рещѝ чи́ста себѐ бы́ти ѿ грѣхѡ́въ;
10 Вѣ́съ вели́къ и҆ ма́лъ, и҆ мѣ́ра сѹгѹ́ба, нечи҄ста пред̾ гд҇емъ ѻ҆боѧ̀:
11 и҆ творѧ́й ѧ҆̀ въ начина́нїихъ свои́хъ за́пнетсѧ: ю҆́нота съ преподо́бнымъ, и҆ пра́вый пѹ́ть є҆гѡ̀.
12 Ѹ҆́хо слы́шитъ, и҆ ѻ҆́ко ви́дитъ: гд҇нѧ дѣла̀ ѻ҆боѧ̀.
13 Не любѝ клевета́ти, да не вознесе́шисѧ: ѿве́рзи ѻ҆́чи твоѝ и҆ насыща́йсѧ хлѣ́ба.
14 Ѕло̀, ѕло̀, рече́тъ стѧжава́ѧй, и҆ ѿше́дъ тогда̀ похва́литсѧ.
15 Є҆́сть зла́то и҆ мно́жество ка́менїй драги́хъ, сосѹ́дъ че́стенъ ѹ҆стнѣ̀ разѹ҄мны.
16 Возмѝ ри́зѹ є҆гѡ̀, ѩ҆́кѡ и҆спорѹ́чникъ бы́сть чѹжды́ѧ, и҆ за чѹждѹ́ю возмѝ зало́гъ ѿ негѡ̀.
17 Сла́докъ є҆́сть человѣ́кѹ хлѣ́бъ лжѝ, но пото́мъ и҆спо́лнѧтсѧ ѹ҆ста̀ є҆гѡ̀ ка́менїѧ.
18 Помышле́нїе въ совѣ́тѣ ѹ҆гото́витсѧ, въ правле́нїи же твори́тъ бра́нь.
19 Ѿкрыва́ѧй та́йнѹ хо́дитъ ле́стїю: и҆ прельща́ющемѹ ѹ҆стна́ми свои́ми не примѣша́йсѧ.
20 Ѕлосло́вѧщемѹ ѻ҆тца̀ и҆лѝ ма́терь ѹ҆га́снетъ свѣти́лникъ, зѣ҄ницы же ѻ҆че́съ є҆гѡ̀ ѹ҆́зрѧтъ тмѹ̀.
21 Ча́сть поспѣ́шна въ нача́лѣ, въ послѣ́днихъ не благослови́тсѧ.
22 Не рцы̀: ѿмщѹ̀ врагѹ̀: но потерпѝ гд҇а, да тѝ помо́жетъ.
23 Ме́рзость гд҇еви сѹгѹ́бый вѣ́съ, и҆ мѣ́рило лжи́во не добро̀ пред̾ ни́мъ.
24 Ѿ гд҇а и҆справлѧ́ютсѧ стѡпы̀ мѹ́жѹ: сме́ртный же ка́кѡ ѹ҆разѹмѣ́етъ пѹти҄ своѧ҄;
25 Сѣ́ть мѹ́жеви ско́рѡ нѣ́что ѿ свои́хъ ѡ҆свѧща́ти: по ѡ҆бѣ́тѣ бо раска́ѧнїе быва́етъ.
26 Вѣ́ѧтель нечести́выхъ є҆́сть ца́рь мѹ́дръ и҆ наложи́тъ на нѧ̀ ко́ло.
27 Свѣ́тъ гд҇ень дыха́нїе человѣ́кѡмъ, и҆́же и҆спыта́етъ та҄йнаѧ ѹ҆тро́бы.
28 Ми́лостынѧ и҆ и҆́стина сохране́нїе царю̀, и҆ ѡ҆б̾и́дѹтъ престо́лъ є҆гѡ̀ въ пра́вдѣ.
29 Лѣ́пота (є҆́сть) ю҆́нымъ премѹ́дрость: сла́ва же ста҄рымъ сѣди҄ны.
30 Ра҄ны и҆ сокрѹшє́нїѧ срѣта́ютъ ѕлы́хъ, ѩ҆́звы же въ сокро́вищихъ чре́ва.
Нашли в тексте ошибку? Выделите её и нажмите:
Ctrl + Enter
Притчи Соломона, 20 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784