3 Яна 1 глава

Трэцяе паўсюднае пасланьне Апостала Яна
Пераклад Антонія Бокуна → Пераклад Сабілы і Малахава

Староста — улюбёнаму Гаю, якога я люблю ў праўдзе.

Стары, любаснаму Гаю, якога я люблю шчыра.

Улюбёны! Малюся, каб ты быў здаровы і пасьпяховы ў-ва ўсім, як пасьпяховая душа твая.

Любасны! жадаю і малюся, каб табе быць здаровым і ішло спрыяльна ўва ўсім (тваім служэньні Богу), як ідзе спрыяльна душы тваёй.

Бо я вельмі ўзрадаваўся, калі прыйшлі браты і засьведчылі пра тваю праўду, як ты ходзіш у праўдзе.

Бо я вельмі ўзра́даваўся, як прыйшлі браты і засьведчылі тваю праўду, як ты ходзіш у Праўдзе.

Для мяне няма большай радасьці, як чуць, што дзеці мае ходзяць у праўдзе.

Ня маю большай радасьці, як чуць пра дзяцей маіх, што ходзяць у Праўдзе.

Улюбёны! Ты робіш вернае ў тым, што робіш для братоў і для чужынцаў,

Любасны! ты робіш правільна (у тым), што (ты) робіш для братоў і для гасьцей.

якія засьведчылі перад царквою пра тваю любоў. Ты добра зробіш, правёўшы іх, як належыцца перад Богам,

Яны засьведчылі перад царквой пра тваю любоў. Ты добра зробіш, калі адправіш іх, як годна (перад) Богам,

бо яны дзеля імя Ягонага пайшлі, нічога ня ўзяўшы ад паганаў.

бо яны выйшлі (у дарогу) і дзеля Імені (Ягонага) нічога ня ўзяўшы ад паганаў.

А мы павінны прыймаць гэтакіх, каб стацца супрацоўнікамі праўдзе.

Дык мы павíнны прыма́ць гэтакіх, каб быць супрацоўнікамі Праўды.

Я пісаў царкве, але Дыятрэф, які любіць у іх быць першым, не прызнае нас.

Я напісаў царкве, але Дыятрэф, што любіць у іх быць першым, ня прызнае нас.

Дзеля гэтага, калі я прыйду, нагадаю пра ўчынкі ягоныя, якія ён робіць, абмаўляючы нас злымі словамі; і не задавольваючыся гэтым, і сам не прызнае братоў, і тым, якія хочуць, забараняе, і выганяе з царквы.

Пагэтаму, калі я прыйду, напомню ягоныя ўчынкі, якія ён робіць, зьняважаючы нас злымі словамі і ня здавальняючыся гэтым, ён да таго ж ня прымае братоў і забараняе тым, хто жадае (прыняць), ды із царквы выганяе.

Улюбёны! Не пераймай ліхое, але добрае. Хто робіць дабро, той ад Бога; а хто робіць ліхое, ня бачыў Бога.

Любасны! ня пасьледуй злу, але дабру. Той, хто робіць дабро, ён ёсьць ад Бога, але той, хто робіць зло, ня бачыў Бога.

Пра Дэмэтрыя засьведчана ўсімі і самой праўдаю, і мы сьведчым, і вы ведаеце, што сьведчаньне нашае праўдзівае.

Пра Зьмітра засьведчана ўсімі і самой праўдаю; і мы сьведчым, і вы ведаеце, што сьведчаньне нашае праўдзівае.

Шмат меў я пісаць, але не хачу пісаць табе атрамантам і трысьцінай,

Шмат меў я пісаць; але ня хачу пісаць да цябе чарніламі і пяром,

а спадзяюся неўзабаве пабачыць цябе і гаварыць вуснамі ў вусны.

але спадзяюся хутка ўбачыць цябе і гаварыць з вуснаў да вуснаў. Мір табе! Вітаюць цябе сябры; прывітай сяброў паіменна.

Супакой табе! Вітаюць цябе сябры; прывітай сяброў паіменна.

« 1 глава 1 глава »