3 Яна 1 глава

Трэці ліст Яна
Пераклад Чарняўскага 2017 → Пераклад Сабілы і Малахава

Старэйшы — дарагому Гаю, якога я люблю ў праўдзе.

Стары, любаснаму Гаю, якога я люблю шчыра.

Улюбёны, малюся, каб ты быў спраўны і здаровы так, як спраўная душа твая.

Любасны! жадаю і малюся, каб табе быць здаровым і ішло спрыяльна ўва ўсім (тваім служэньні Богу), як ідзе спрыяльна душы тваёй.

Вельмі ўзрадаваўся я з прыбыцця братоў, якія засведчылі праўду тваю ды як ты жывеш у праўдзе.

Бо я вельмі ўзра́даваўся, як прыйшлі браты і засьведчылі тваю праўду, як ты ходзіш у Праўдзе.

Для мяне няма большай радасці, як пачуць, што дзеці мае жывуць у праўдзе.

Ня маю большай радасьці, як чуць пра дзяцей маіх, што ходзяць у Праўдзе.

Улюбёны, верна робіш, калі рупішся дзеля братоў і дзеля падарожных,

Любасны! ты робіш правільна (у тым), што (ты) робіш для братоў і для гасьцей.

якія аддалі сведчанне тваёй любові перад царквою. Ты добра зробіш, калі выправіш іх у дарогу, як годна перад Богам.

Яны засьведчылі перад царквой пра тваю любоў. Ты добра зробіш, калі адправіш іх, як годна (перад) Богам,

Бо выправіліся яны ў дарогу ў імя [Яго], не прымаючы нічога ад паганаў.

бо яны выйшлі (у дарогу) і дзеля Імені (Ягонага) нічога ня ўзяўшы ад паганаў.

Таму мусім гасцінна прымаць такіх, каб быць саўдзельнікамі праўды.

Дык мы павíнны прыма́ць гэтакіх, каб быць супрацоўнікамі Праўды.

Я напісаў для царквы, але той, які хоча мець першынство сярод іх, Дыятрэф, не прызнае нас.

Я напісаў царкве, але Дыятрэф, што любіць у іх быць першым, ня прызнае нас.

Таму вось, калі прыбуду, нагадаю пра яго ўчынкі, што ён робіць, плявузгаючы на нас ліхімі словамі; і быццам яму яшчэ гэтага не хапае, сам не прымае братоў і тым, якія прымаюць, перашкаджае і выганяе з царквы.

Пагэтаму, калі я прыйду, напомню ягоныя ўчынкі, якія ён робіць, зьняважаючы нас злымі словамі і ня здавальняючыся гэтым, ён да таго ж ня прымае братоў і забараняе тым, хто жадае (прыняць), ды із царквы выганяе.

Улюбёны, не наследуй ліхому, але таму, што добрае. Хто добрае робіць, ёсць ад Бога, а хто робіць благое, той не бачыў Бога.

Любасны! ня пасьледуй злу, але дабру. Той, хто робіць дабро, ён ёсьць ад Бога, але той, хто робіць зло, ня бачыў Бога.

Пра Дэметра ўсе добра сведчаць, і нават сама праўда; і мы таксама сведчым, і ты ведаеш, што сведчанне наша праўдзівае.

Пра Зьмітра засьведчана ўсімі і самой праўдаю; і мы сьведчым, і вы ведаеце, што сьведчаньне нашае праўдзівае.

Шмат я меў напісаць, але не хачу пісаць табе чарнілам і пяром;

Шмат меў я пісаць; але ня хачу пісаць да цябе чарніламі і пяром,

спадзяюся, што хутка цябе ўбачу і тады пагаворым з вуснаў у вусны.

але спадзяюся хутка ўбачыць цябе і гаварыць з вуснаў да вуснаў. Мір табе! Вітаюць цябе сябры; прывітай сяброў паіменна.

Супакой табе. Вітаюць цябе сябры. Прывітай сяброў пайменна. Амін.

« 1 глава 1 глава »