Копия письма с царским приказом была разослана, и он стал законом в каждой области. Его объявили всем народам, живущим в царстве, чтобы евреи были готовы к этому особому дню. Евреям было позволено отомстить своим врагам.
Списа́нїе же є҆пїсто́лїи си́це бѣ̀: ца́рь вели́кїй а҆ртаѯе́рѯъ сѹ́щымъ ѿ ї҆нді́и да́же до є҆ѳїо́пїи сто̀ два́десѧти и҆ седми́мъ нача́лствѡмъ страна́ми ѡ҆блада́ющымъ и҆ вла́стелємъ на́мъ доброжела́телствѹющымъ, ра́доватисѧ. Мно́зи мно́жайшею благодѣ́телствѹющихъ бла́гостїю частѣ́е чествѹ́еми па́че мѣ́ры возгордѣ́шасѧ, и҆ не то́чїю подчине́нныхъ на́мъ и҆́щѹтъ ѡ́ѕло́бити, но дово́лства не могѹ́ще снестѝ, и҆ свои҄мъ благодѣ́телємъ начина́ютъ кова́рствовати: и҆ благодаре́нїе не то́кмѡ ѿ человѣ҄къ ѿе́млюще, но є҆щѐ (по ѡ҆бы́чаю) не прїѧ́вшихъ благодѣѧ́нїй киче́ньми возне́сшесѧ, всѧ҄ пр҇нѡ назира́ющагѡ бг҃а ненави́дѧщагѡ ѕла̀ мнѧ́тъ и҆збѣжа́ти сѹда̀. Мно́гажды же и҆ мно́гихъ ѿ поста́вленныхъ на власте́хъ, и҆̀мже ѹ҆вѣ́рисѧ дрѹгѡ́въ ѹ҆строѧ́ти дѣла̀, ласка́телство крове́й непови́нныхъ вино́вными поставлѧ́ѧ, подве́рже неѹврачєва́ннымъ ѕлы҄мъ, ѕлонра́вїѧ ло́жнымъ прельще́нїемъ тѣ́хъ, и҆̀же прельща́ютъ неѕлоби́вое благосе́рдїе владѣ́ющихъ. Ви́дѣти же лѣ́ть є҆́сть на́мъ взыскѹ́ющымъ не толи́кѡ ѿ дре́внихъ, ѩ҆́коже преда́хомъ, ї҆сто́рїй, є҆ли́кѡ ѿ тѣ́хъ, ѩ҆́же сѹ́ть при нога́хъ непрепо́добнѡ содѣ҄ланнаѧ гѹби́телствомъ недосто́йнѡ владѣ́ющихъ. Сегѡ̀ ра́ди внима́ти надлежи́тъ по си́хъ, во є҆́же ца́рство безмѧте́жно всѣ҄мъ человѣ́кѡмъ съ ми́ромъ ѹ҆стро́ити, не ѹ҆потреблѧ́юще премене́нїй, приходѧ҆щаѧ же пред̾ ѻ҆чеса̀ всегда̀ съ прили́чнымъ предваре́нїемъ разсѹжда́юще. Е҆гда́ бо а҆ма́нъ а҆мадаѳѹ́евъ македѡ́нѧнинъ, и҆́стннѡ чѹ́ждь пе́рсскїѧ кро́ве и҆ мно́гѡ ѿстоѧ́щь ѿ на́шеѧ бла́гости, страннолю́бнѡ прїѧ́тый ѿ на́съ, толи́кое человѣколю́бїе, є҆́же ко всѧ́комѹ ѩ҆зы́кѹ и҆мѣ́емъ, полѹчѝ, ѩ҆́кѡ нарица́тисѧ є҆мѹ̀ ѻ҆тце́мъ на́шимъ, и҆ покланѧ́емомѹ ѿ всѣ́хъ, второ́е ца́рскагѡ престо́ла лицѐ содержа́ти: неѹмѣ́рителенъ же въ го́рдости прилѣ́жнѡ и҆ска́лъ, ка́кѡ бы на́съ ѡ҆́бласти и҆ живота̀ лиши́ти, кѹ́инѡ же на́шего блюсти́телѧ и҆ всегда́шнѧго благодѣ́телѧ мардохе́а и҆ непоро́чнѹю ца́рства соѡ́бщницѹ є҆сѳи́рь со всѣ́мъ и҆́хъ пле́менемъ многоилете́нными хи́тростей прельще́ньми и҆́щѹщь на погѹбле́нїе: си́ми бо ѡ҆́бразы возмнѣ̀ на́съ лиши́въ блюсти́телей взѧ́ти, и҆ вла́сть пе́рсскѹю ко македѡ́нѧнѡмъ пренестѝ. Мы́ же ї҆ѹде́ѡвъ, ѿ трегѹби́телнагѡ сегѡ̀ въ погѹбле́нїе пре́данныхъ, ѡ҆брѣта́емъ не ѕлотво́рныхъ, но пра́веднѣйшими ѹ҆иравлѧ́емыхъ закѡ́ны, и҆ сѹ́щихъ сынѡ́въ вы́шнѧгѡ, превелича́йнагѡ жива́гѡ бг҃а, ѹ҆правлѧ́ющагѡ на́мъ же и҆ прароди́телємъ на́шымъ ца́рствїе въ до́брѣйшемъ состоѧ́нїи. До́брѣ ѹ҆̀бо сотвори́те не ѹ҆потреблѧ́юще ѿ а҆ма́на а҆мадаѳѹ́ева по́сланныхъ писа́нїй, поне́же ѻ҆́нъ сїѧ҄ содѣ́лавый при вратѣ́хъ сѹ́сскихъ со всѣ́мъ до́момъ свои́мъ повѣ́шенъ є҆́сть, досто́йный є҆мѹ̀ вско́рѣ сѹ́дъ возда́вшемѹ всѣ́ми владѣ́ющемѹ бг҃ѹ. Спїса́нїе же є҆пїсто́лїи сеѧ̀ предложи́вше на всѧ́цѣ́мъ мѣ́стѣ со дерзнове́нїемъ, ѡ҆ста́вите ї҆ѹде́ѡвъ ѹ҆потреблѧти своѧ҄ зако́ны, спомоществѹ́юще и҆̀мъ, ѩ҆́кѡ да во вре́мѧ ско́рби воста́вшымъ на ни́хъ ѿмстѧ́тъ въ третїйна́десѧть де́нь вторагѡна́десѧть мц҇а а҆да́ра въ са́мый то́й де́нь: въ се́й бо (де́нь) всемогѹ́щїй бг҃ъ вмѣ́стѡ погѹбле́нїѧ и҆збра́ннагѡ ро́да сотворѝ и҆̀мъ весе́лїе. И҆ вы̀ ѹ҆́бо во и҆мени́тыхъ ва́шихъ пра́здницѣхъ знмени́тый де́нь со всѧ́кою ра́достїю провожда́йте, да и҆ нн҃ѣ, и҆ по си́хъ спасе́нїе на́мъ ѹ҆́бѡ и҆ доброжела́тєлнымъ пе́рсѡъ бѹ́детъ, навѣтѹ́ющымъ же на́съ въ па́мѧть погѹбле́нїѧ. Всѧ́къ же гра́дъ и҆лѝ страна̀, ѩ҆́же по си҄мъ не сотвори́тъ, всѧ́чески мече́мъ и҆ ѻ҆гне́мъ съ толи́кимъ потреби́тсѧ гнѣ́вомъ, ѩ҆́кѡ не то́кмѡ человѣ́кѡмъ непрохо́дна, но и҆ ѕвѣрє́мъ и҆ пти́цамъ во всѧ́кое вре́мѧ ме́рзостнѣйша ѡ҆ста́витсѧ. И҆ списа́нїѧ сїѧ҄ да предложа́тсѧ ѻ҆чеви́днѡ во все́мъ ца́рствѣ, є҆́же готѡ́вымъ бы́ти всѣ҄мъ ї҆ѹде́ѡмъ на се́й де́нь ра́товати свои́хъ проти́вныхъ.