Послание к Титу

Па́вел, раб Бо́жий, Апо́стол же Иису́с Христо́в, по ве́ре избра́нных Бо́жиих и ра́зуму и́стины, я́же по благоче́стию, О упова́нии жи́зни ве́чныя, ю́же обетова́ нело́жный Бог пре́жде лет ве́чных, Яви́ же во времена́ своя́ сло́во Свое́ пропове́данием, е́же мне поруче́но бысть по повеле́нию Спаси́теля на́шего Бо́га, Ти́ту, при́сному ча́ду по о́бщей ве́ре, благода́ть, ми́лость, мир от Бо́га Отца́ и Го́спода Иису́са Христа́ Спа́са на́шего. Сего́ ра́ди оста́вих тя в Кри́те, да недоконча́нная испра́виши и устро́иши по всем градо́м пресви́теры, я́коже тебе́ аз повеле́х. А́ще кто есть непоро́чен, еди́ныя жены́ муж, ча́да имы́й ве́рна, не во укоре́нии блуда́, или́ непокори́ва. Подоба́ет бо епи́скопу без поро́ка бы́ти, я́коже Бо́жию строи́телю: не себе́ угожда́ющу, не де́рзу, не напра́сливу, не гневли́ву, не пия́нице, не би́йце, не скверностяжа́тельну, Но страннолюби́ву, благолю́бцу, целому́дренну, пра́ведну, преподо́бну, воздержа́тельну, Держа́щемуся ве́рнаго словесе́ по уче́нию, да си́лен бу́дет и утеша́ти во здра́вем уче́нии, и проти́вящияся облича́ти. Суть бо мно́зи непокори́ви, суесло́вцы и умо́м прельще́ни, наипа́че же су́щии от обре́зания, И́хже подоба́ет уста́ загражда́ти: и́же вся до́мы развраща́ют, уча́ще я́же не подоба́ет, скве́рнаго ра́ди прибы́тка. Рече́ же не́кто от них, свой им проро́к: Кри́тяне при́сно лжи́ви, зли́и зве́рие, утро́бы пра́здныя. Свиде́тельство сие́ и́стинно есть. Ея́же ра́ди вины́ облича́й их неща́дно, да здра́ви бу́дут в ве́ре, Не внима́юще иуде́йским ба́снем, ни за́поведем челове́к отвраща́ющихся от и́стины. Вся у́бо чи́ста чи́стым, оскверне́ным же и неве́рным ничто́же чи́сто, но оскверни́ся их и ум и со́весть. Бо́га испове́дуют ве́дети, а де́лы отме́щутся Его́, ме́рзцы су́ще и непокори́ви и на вся́кое де́ло благо́е неиску́сни.

Ты же глаго́ли, я́же подоба́ет здра́вому уче́нию. Ста́рцем тре́звенным бы́ти, че́стным, целому́дренным, здра́вствующим ве́рою, любо́вию, терпе́нием. Ста́рицам та́кожде во украше́нии святоле́пным, не клевети́вым, не вину́ мно́гу порабоще́нным, доброучи́тельным, Я́ко да уцелому́дрят ю́ныя, мужелю́бицам бы́ти, чадолю́бицам, Целому́дренным, чи́стым, до́мы до́бре пра́вящим, благи́м, покаря́ющимся свои́м муже́м, да не сло́во Бо́жие ху́лится. Ю́ноши та́кожде моли́ целому́дрствовати. О всем же сам себе́ подава́я о́браз до́брых дел, во уче́нии незави́стное, {це́лость}че́стность, нетле́ние, Сло́во здра́вое, незазо́рное. Да проти́вный посрами́тся, ничто́же име́я глаго́лати о нас уко́рно. Рабы́, свои́м господе́м повинова́тися, во всем благоуго́дным бы́ти, не прекосло́вным, Не кра́дущим, но ве́ру вся́ку явля́ющим бла́гу, да уче́ние Спаси́теля на́шего Бо́га украша́ют во всем. Яви́ся бо благода́ть Бо́жия спаси́тельная всем челове́ком, Наказу́ющи нас, да отве́ргшеся нече́стия и мірски́х похоте́й, целому́дренно, и пра́ведно, и благоче́стно поживе́м в ны́нешнем ве́це. Жду́ще блаже́ннаго упова́ния и явле́ния сла́вы Вели́каго Бо́га и Спа́са на́шего Иису́са Христа́. И́же дал есть Себе́ за ны, да изба́вит ны от вся́каго беззако́ния и очи́стит Себе́ лю́ди избра́нны, ревни́тели до́брым дело́м. Сия́ глаго́ли, и моли́, и облича́й со вся́ким повеле́нием, да никто́же тя преоби́дит. {презира́ет}

Воспомина́й тем нача́льствующим и владе́ющим повинова́тися и покаря́тися, и ко вся́кому де́лу бла́гу гото́вым бы́ти: Ни еди́наго ху́лити, не сварли́вым бы́ти, но ти́хим, вся́ку явля́ющим кро́тость ко всем челове́ком. Бе́хом бо иногда́ и мы несмы́сленни, и непокори́ви, и прельще́ни, рабо́тающе похоте́м и сласте́м разли́чным, в зло́бе и за́висти живу́ще, ме́рзцы су́ще и ненави́дяще друг дру́га. Егда́ же благода́ть и человеколю́бие яви́ся Спа́са на́шего Бо́га, Не от дел пра́ведных, и́хже сотвори́хом мы, но по Свое́й Его́ ми́лости, спасе́ нас ба́нею пакибытия́ и обновле́ния Ду́ха Свята́го, Его́же излия́ на нас оби́льно Иису́с Христо́м, Спаси́телем на́шим, Да оправди́вшеся благода́тию Его́, насле́дницы бу́дем по упова́нию жи́зни ве́чныя. [Ча́до Ти́те,] ве́рно сло́во, и о сих хощу́ тя извеща́ти, {утверди́ти}да пеку́тся до́брым дело́м прилежа́ти ве́ровавшии Бо́гу, сия́ суть поле́зна челове́ком и добра́. Бу́их же стяза́ний и родосло́вий и рве́ний и сва́ров зако́нных отступа́й: суть бо неполе́зны и су́етны. Еретика́ челове́ка по пе́рвом и второ́м наказа́нии отрица́йся, Ве́дый, я́ко разврати́ся таковы́й, и согреша́ет, и есть самоосужде́н. Егда́ послю́ Арте́му к тебе́ или́ Тихи́ка, потщи́ся приити́ ко мне в Никопо́ль, ту бо суди́х озиме́ти. Зи́ну зако́нника и Аполло́са ско́ро предпосли́, и да ничто́же и́ма ску́дно бу́дет. Да уча́тся же и на́ши до́брым дело́м прилежа́ти в ну́жная тре́бования, да не бу́дут безпло́дни. Целу́ют тя со мно́ю су́щии вси. Целу́й лю́бящия ны в ве́ре. Благода́ть со все́ми ва́ми. Ами́нь.