Іаковлево

Иаковъ Богу, и Господу Ісусу Христу рабъ обеманадесяте коленома иже в розсеаніи радоватися • Всяку радость имейте братия моя, егъда во искушения впадаете различная, ведуще яко искушение вашея веры, соделоваеть терпение • А терпние же дело совершено да имать • Да будете совершени, и цели, ни во едином лишени суще • Естъ ли же кто от васъ потребуеть мудрости, да просить ея от дающего Бога, Онже даеть всемъ просто и не поношая • И дасться ему, но да просить верою, ничтоже сумняся • Сумняй бо ся, уподобится волнению морскому от ветръ возметаему, и развевающуся • Да не мнить человекъ той, яко пріиметь что от Господа • Мужъ двоедушъный неустроенъ ест во всехъ путехъ своих • Да хвалить же себе братъ смиреный во высоте своей, а богатый во смиреніи своем зане же яко цветъ травный мимоидеть, восия бо солце со зноемъ, и исъше трава, и цветъ ея отпаде, и красота лица ея погыбе • Тако и богатый во хоженіи своемъ уведаеть • Блаженъ мужъ иже претерпить искушение, яко искушен бывъ пріимет венець живота, еже обеща Господь любящимъ Его • Никто жъ искушаемъ да глаголеть, яко от Бога искушаемъ есмъ • Богъ бо несть искуситель злымъ, и не искушаеть никогоже • Но каждый искушается от своея похоти влеком, и прелщаемъ • Тажде похоть заченши плодить грехъ, грех же скончався ражаеть смерть • Не льститеся же братия моя возлюбленная, всяко даяние благо, и всякъ даръ свершенъ, свыше ест сходя от Отца светом • В Негоже несть измененія, или преложению осенения • Восхотев бо породи нас словом истинны яко быти нам началу от созданий Его •

Темже братия моя возлюбленная, да будеть всякъ человекъ, скоръ къ послушанию, и ленъ ко глаголанию, и медленъ ко гневу • Гневъ бо мужа правды Божией не соделаваеть • Прото ж отлошивше всяку скверну, и збытокъ злобы • Во кростости приймайте истое слово, могущее спасти душе ваше • Будте ж творци слову, а не толико послушници, прелщающе сами себе • Кто убо ест послухачь слову а не творец таковый уподобится мужу, сматряющу лица нарожения своего во зерцале • Усмотревъ бо себе, и отшолъ, и скоро забылъ яковъ бе • Возревый же въ законъ совершеный, иже ест свободы • И пребудеть в немъ сый непослушник забытливъ, но творец делу, сей блажен въ деле своемъ будеть • Естъ ли пак кто мнится верен быти в васъ не обуздовая языка своего, но ильстя серце свое, сего суетна ест вера • Вера ж чиста, и нескверна въ Бога Отца сия ест, посещати сироты, и вдовице во скорби их • И нескверна себе блюсти от мира сего •

Братия моя не на лица зряще, имейте веру Господа нашего Ісуса Христа славы • Аще бо внидеть въ сонмище ваше мужъ златъ перстень нося, и в ризе светле • Вънидет же и нищъ во скверней одежди • И возрите на носящего ризу светлую, и речете ему: ты сяди зде добре • И нищему речете: ты стани тамо, или: сяди зде на подножіи моемъ • И не разсудисте въ собе, и бысте судии помышлениемъ злымъ • Слыште братия моя возлюбленная, не Богъ ли избра нищих сего мира, богатые в вере, и наследники Царствия иже обеща любящимъ Его? Вы же укористе нищего • Не богатые ли насилують вамъ, и тые влекут вас на судища • И тіи хулят доброе имя нареченое на васъ? Аще бо законъ исполняете царскый по Писанию: возлюбиши ближнего своего яко самъ себе, добре чините • Пак ли же на лица зрите грехъ соделаваете, и обличаеми от закона яко преступници • Кто бо весъ законъ соблюдеть, согрешит же во единомъ бысть в семъ повиненъ • Рекій бо не прелюбы сотвориши, Той же рече и не убиеши • Аще лі не прелюбы сотвориши, убиеши же, бысь преступник закону • Тако глаголите, и тако чините • Яко чающе закономъ свободнымъ судъ приняти • Судъ бо без милости будеть не сотвортему милости, и хвалится милость на суде •

Кая полза братия моя аще веру глаголет кто имети, дела же не имать? Еда может вера спасти его? Естъ ли же брат или сестра между вами наги будуть • И требующе дневныя пищи • Речет же кто има от васъ: идета с миромъ, и грейтеся, и насыщайтеся • Не дасть же има требования телеси, и кая полза будеть? Тако и вера аще делъ не имать, мертва ест въ собе • Но речеть кто: ты веру имаши, и азъ дела имамъ • Покажи ми веру твою от делъ твоих, и я покажу тобе от делъ моихъ веру мою • Ты веруеши яко Богъ единъ ест, добре твориши, и беси верують, и ужасаються • Хощеши ли разумети человече суетьне, яко вера без делъ мертва ест? Авраамъ отець нашъ не от делъ ли оправдася • Вознесъ Ісаака сына своего на олтарь? Видиши ли како вера спомогаше деломъ его, и от делъ совершися вера его, и наполнися Писание глаголющее: верова Авраамъ Богови, и въменися ему во правду, и другъ Божіи наречеся • Видите убо яко от делъ оправдается человекъ, а не от веры единое • Такожъ и Раавъ блудница, не от делъ ли оправдася, приемши исходники, и инымъ путем изъведши их? Якоже бо тело без духа мертво ест, тако и вера без дел мертва ест •

Не мънози учители бывайте, братия моя • Ведуще се яко болший судъ пріимемъ, во мнозе бо согрешаемъ вси • А онъже словом не согрешить сей совершеный ест мужъ • Силенъ обузъдовати и все тело свое • Се конемъ бразды въ уста влагаемъ, да повинуются намъ, и все тело их обращаемъ • Се и корабли толици суще, и, от жестоких ветръ заточаеми обращаются малымъ правилом тамо идеже мышление правящего хощет • Тако и языкъ малъ удъ ест, и вельми хвалится • Се малъ огнь колику вещ сожигаеть, и языкъ огнь ест собрание неправды тако языкъ чинить во удехъ наших, скверня все тело, и роспаляя коло прирожения нашего, и опаляемъ от геенны • Всяко бо естство зверей, и птиць, гадъ, и рыбъ морских укрочается, и усвоится от прирожения человеческаго • Языка же никто от человекъ укротити не можеть • О языче неудержимое злое, полный яда смертоносна • Темъ благославим Бога и Отца, темъ кленем человеки, еже по подобию Божию сотворены суть • От техже устъ исходить благославение и клятва, не подобает братия моя сим тако бывати •

Еда убо источникъ от единаго источания сладку и горку воду точить? Или еда можеть братия моя смоковница маслыны плодити, или лоза смоквы? Також ни един источникъ слану, и сладку воду издаеть • Кто премудръ и навченъ ест во васъ, да покажет от добра жития дела своя во кростостней премудрости • Аще ли зависть горку имате, и рвения во серцех ваших, не хвалитеся и не илжите на истинну • Несть бо сия премудрость свыше исходяща • Но земная, говядская, бесовская • Иде бо зависть и рвение, ту нестроение и всяка зла вещ • А вышняя премудрость первее убо чиста ест, потом мирна, кротка, в добром поволна, полна милостыни и дел добрых, несуменна, нелицемерна • Плод же правды во смиреніи сеется, чинящим миръ •

Откуду суть брани, и свары в васъ? Не отсюду ли, от сластеи ваших воюющих во удех ваших? Жедаете, и не имате • Убиваете, и завидите, и не можете улучити жадости своея • Воюетеся, и боретеся, а не доставаете, понеже Бога не просите, просите ль, и не приемлете, яко зле просите, да во сластехъ ваших изъживете • Любодейци, и любыдейце, не весъте ли яко любовъ мирская вражда Божия ест? Онъже убо восхощеть любъ мира быти, врагъ Божіи бываеть • Или мните яко надармо Писание глаголеть: еда ко зависти возжелееть Духъ иже вселивыйся во васъ? Но болшую вам даеть благодать • Темже и пишеть глаголя: Господь гордым противітся, смиреным же дает благодат •

Повинитеся ж убо Богови, и противътеся диаволу, и бежить от васъ • Приближитеся къ Богу, и приближится вамъ • Омыйте руце грешніи, и очистьте серца двоедушніи • Познайте беду свою, возъдохайте, и слезите • Смехъ вашъ во плач да обратится, и радость во умиление • Смиритеся предъ Богом, и вознесеть васъ • Не оклеветовайте другъ друга братия оклеветаяй брата, и осуждаяи брата своего • Оклеветаеть законъ, и осужает законъ • Аще ли же законъ осужаеши несі полнитель закону, но судия • Единъ бо ест Законодавець и Судия, могый спасти, и погубити • Ты же кто еси осужая друга своего? Се нецие от васъ глаголете: пойдемо днесъ или заутра в сей градъ и поживем тамо лето едино, и куплю деемъ, и приобрятение • А сего не вете, что ся пригодит до дня утреняго • И што естъ житие наше? Не пара ли, яже вмале является и потом исчезаеть? Въместо же сего глаголати имате: аще Господь усхощет, и будем ли живи, учиним тое или иное • Ныне же хвалитеся въ гордынях ваших, всяка хвала такова зла естъ • Умеющему бо доброе чинити, и не чинящу, грехъ ему естъ •

Чинили есте волю свою богатии, ныне же плачтеся слезяще, о страстехъ ваших грядущих на васъ • Богатества ваша изъгниша, и ризы ваше молие поядоша • Злато и сребро вашо изоржаве, иржа их во сведетельство противу вамъ будет • И пожреть плоти ваша яко огнь, скарбисте собе гневъ во последъняя дни • Се мзда делатель пожавших нивы ваша, неплачена от васъ вопиеть • И вопль ея вниде во уши Господа Силамъ • Насладистеся на земли, и упитастеся, выкормисте серца ваша, яко въ день заколения • Осудисте, и убисте праведнаго, и не противился вамъ •

Потерпите убо братия до пришествия Господьня • Се делатель ждеть чеснаго плода земли, долготерпя о немъ, дондеже придеть дождь ранъ и позднъ • Терпеливи ж будте и вы, и утвердите серца ваша, яко пришествие Господьне приближися • Не воздыхайте другъ на друга братие, да не осужени будете: се Судия пред дверми стоить • Образъ пріимите братия моя злострастию и долготерпению пророки еже глаголаша именемъ Господьнимъ • Се блажим тых иже потерпеша • Терпение Іовово слышасте, и конець Господень видесте • Яко милостив ест Господь и щедръ • Прежде всехъ братия моя не кленитеся ни небом, ни землею, ни иною клятвою • Буди же слово ваше, иже ест, ест • А еже ни, ни • Да не в лицемерие въпадете • Смутит ли ся кто между вами, да молится Богу • Радует ли ся кто, да поеть хваляй Бога • Болить ли же кто в васъ, да призоветь къ собе попы церковные, и да помолятся над нимъ, помазующе его елеомъ во имя Господьне • И молитва веры спасет болящего, и воздвигнет его Господь • И аще грех будеть сотворил отпустится ему • Исповедайте убо друг другу согрешения своя и молитеся другъ за друга, яко да исцелеете • Много бо можеть молитва праведнаго поспешствуема •

Илія человек бе подобен намъ въ терпении, и молитвою помолися не быти дождю, и не одожди по земли лета три, и месець шесть • И паки помолися, и небо дало дождь, и земля возрасти плодъ свой • Братия аще кто в васъ заблудить от истинны, и некто обратить его • Да весть яко обративый кто грешника от заблужения пути его, спасеть душу от смерти, и покриет множство грехов •