ПОСЛАНИЯ • ПЕРЪВАГО ПЕТРОВА СКАЗАНІЕ • ДОКТОРОМЪ ФРАНЦИСКОМ СКОРИНОЮ С ПОЛОЦКА • З БОЖИЕЮ ПОМОЩИЮ ПОЧИНАЕТЬСЯ •
Симонъ Петръ, сынъ Іонинъ, от Галилеи, изъ Вефзаиды, братъ Андреевъ, старейшій Апостолъ Ісусъ Христов • Сей по вознесеніи на небеса Господьнемъ • Бывши епископом во Антиохіи • И проповедавъ слово Божие во Асіи • Втораго лета Клавдия кесаря приде в Римъ, на облічение Симона чародейника • И тамо двадцеть и пять летъ церковъ Христову справоваше • Даже до последнего лета Неронова, онже повеле его стремглавъ на кресте распяти, и тако мученическій венець приялъ • Сей написалъ двое послание соборъное • Первое пишеть ко Іудеомъ, веровавшимъ во Христа, розъсеанымъ во языцехъ, живущим в разных местехъ • Словами краткими, мудрости же и богословия исполнеными • Напоминаеть ко терпению речей противных, для душного спасения • О немже и пророци прежде возвестиша, сего ради и мы возваныи къ таковой достойности, житие свое во страсе Божиемъ, и во друголюбіи скончаемъ • Ведущи сее яко хрестианство наше не толико именем, и крещениемъ, но братолюбиемъ, и незлобиемъ совершается • Къ тому навчаеть повиноватися всемъ старейшинам • И рабом господе своей • И женам мужем своимъ • И мужем велить въ почтивости имети жены своя • Затым добрых обычаевъ наставляет, терпение хваляй для Христа • На конци учить презвитеры яко имають пасти въ смиреніи, стадо Христово •
Конець сказания 1 Петрова послания •
