Навчаеть Апостолъ нас плодъ духовный творити, дабы и иные гледечи на нас, доброе чинили • Теж повиноватся старейшим •
1 Сего ради отложивше всяку злобу, и всяку лесть, и лицемерие, и зависть, и вся клеветы •
2 Яко новороженніи младенци, словесное, и нескверъное млеко возлюбите • Да о нем возрастете во спасение •
3 Понеже въкусисте яко добръ ест Господь •
4 Къ Нему и приступите къ каменю живу • От человекъ убо заверженъ, от Бога же изъбранъ, и честенъ •
5 И сами яко камение живо жиздитеся, въ храмъ духовенъ, светительство свято, вознести жертвы духовны благоприятны Богови Ісусъ Христом •
6 Занеже пишеть во Писаніи: се полагаю во Сионе камень краюуголный, изъбранъ, честенъ, и веруяй в Онь не постыдится •
7 Вамъ убо верующим честенъ естъ • А противящимся, камень егоже не брегоша зиждущие, сей бысть во главу углу • И камень претыкания, и камень соблазна •
8 О немже претыкаются противящеися слову, и не веряще тому в немже исполнены быша •
9 Вы пакъ родъ изъбранъ, царское свещение, языкъ святъ, людие обновления • Яко да добродетели Того возвестите, Он же от темностей призвалъ васъ во чудный Свой светъ •
10 Иже иногда не людее бесте, ныне еже людие Божіи • Непоміловани, ныне же помиловани бывше •
11 Возлюбленіи молю васъ яко пришелъцевъ, и гостей • Отгребайтеся от плотскихъ похотей, иже воюють на душу •
12 И житие ваше имеіте добро во языцех • Да о томъ о немже клевещут на васъ, яко на злочинцевъ • От добрых делъ вашихъ видевше прославят Бога, во день посещения •
13 Повинитеся убо всякому созданию человечию Господа ради: аще царю, яко преобъладающему •
14 Или княземъ, яко от него посланымъ, на отмщение злодеемъ • Во похвалу же добродеемъ •
15 Яко то ест воля Божия добро чинящи обуздовати безумных людей невежство •
16 Будьте свободни, не яко прикровение имуще злости свободу • Но яко раби Божіи,
17 всехъ чтите, братьство возлюбите • Бога бойтеся • Царя честуйте •
18 Раби поддани будте во всякомъ страсе господаремъ своимъ • Не толико добрымъ и кротким, но и строптивымъ •
19 Сей убо имать благодать, кто совести ради Божия терпить скорби, и стражеть без вины •
20 И кая похвала естъ аще согрешающе мучими терпите? Но естъ ли добро чиняще и стражуще терпите • То ест благодат от Бога,
21 и на сее возвани бысте •
Занеже и Христосъ пострада за насъ, намъ остави образъ, да последуемъ стопам Его •
22 Иже греха не сотвори, не обретеся лесть во устех Его •
23 Онъже укаряемъ не укарял и мучим, не грозилъ • Предал же Ся Судящему Праведенъ сый •
24 Иже грехи наша Самъ вознесе на теле Своемъ на древо, да от грех избывше правдою поживемъ • Егоже язъвою исцелесте,
25 бесте бо яко овца блудяще, но возвратистеся ныне къ Пастырю и Посетителю душъ вашихъ •
