ПОЧИНАЮТЬСЯ ЕПИСТОЛЫ СВЯТОГО СЛАВНОГО И ВЕРХОВНАГО В НЕБЕ НАВЧЕНАГО АПОСТОЛА ХРИСТОВА ПАВЛА
СКАЗАНИЕ • ПОСЛАНИЯ К РИМЛЯНОМЪ СВЯТОГО АПОСТОЛА ПАВЛА • СКАЗАНИЕ, ДОКТОРА ФРАНЦИСКА СКОРИНЫ ИЗЪ СЛАВНАГО ГРАДА ПОЛОЦКА • БОГУ ВО ТРОИЦИ ЕДИНОМУ КО ВЕЧНОЙ СЛАВЕ ПОЧИНАЕТСЯ •
Сие посылаеть до Рима от Коринъфа • Ихъже не виде первее самъ апостолъ Павелъ, толико слышал о вере их, еже во Христа Ісуса • Быша убо в Риме не толико Іелліни любомудрци, науками, и закономъ прироженым справующеся • Но к тому и множество великое Іудеи • От Помпеія, и от иныхъ воеводъ римскихъ заведеные • Владяху бо тогда Римляне странами Іудейскими • Сие Моисеовымъ закономъ хвалящеся, глаголаху: мы есмо людие изъбраннии Божіи, обрезани от семени Авраамова • Насъ вывелъ ест Богъ з неволи Егыпетское презъ море чудесы великими • Намъ законъ далъ с небеси, и манну ясти 40 летъ во пустыни • Толико намъ самемъ обещанъ естъ Христосъ, яко и Самъ во Евангеліи о томъ сведетелствуя глаголеть: несмъ посланъ токмо ко овцамъ погыбшимъ дому Израілева • Ко инымъ пакъ языкомъ рече: несть добро отняти хлеба чадомъ и поврещи псомъ • Сия слышаще Іеллини, сваряхуся с ними глаголюще: чимъ болшая добродеания Божия воспоминаете вы Іудеи • Тымъ болший судъ злого на собе показуете • Во всехъ убо тыхъ были есте невдячни • Прото и в неволи Егыпетской бывше четыреста летъ • Оттоле вышедши вси во пустыни, кроме дву, погыбоша • Законъ приемши, Богу не веровасте • Моисею спротивистеся • Манною погордесте, во Егыпет навратитися хотесте • Сами вы якоже кажете к вамъ посланого Христа распясте • Мы же скоро слышахомъ о благовестованіи Его уверихом • И тымъ подобными словы препирахуся •
Таковая слышавъ Апостолъ пишеть до нихъ поведая, яко обои тяжко согрешиша • Іудеи прежде знающе Бога, и преступующе законъ Его не вчьтиша И • Иеллини пакъ поразумевше от речей сотвореных, Сотворителя быти Бога, дашеся во идолослужения • Темже обоих ради пострада Христосъ • Обои от Него благодать приаша • Обоимъ убо пророки святыми обещанъ бысть • И тако обоих навчая во смирение приводить •
Наіпервей, приемля веру их возвещаему по всемъ свете • Хотяй к нимъ сам пріити, и устне навчити е • Тажъ кажеть о гневе Божиемъ на языки неверныя, и грешныя • Иныхъ судящия, ониже и сами справедливый суд от Бога пріимуть • А добро чинящие славу, и миръ •
Потомъ караеть Іудеи хвалящихся закономъ Моисеовымъ, и не полнящихъ его • И кажеть иже не проспееть имъ обрезание • А тако вси народи, буди Іудеи, или Еллини уклонишеся на зло и под грехомъ быша • И вси оправдаються верою Сына Божия • Занеже и Авраамъ не от дел, но от веры оправдася • И прежде закона обрезанія, принял обетования • Сих же тако зровнавъ, потомъ сказуеть яко не можеть быти избавление языкомъ и Іудеомъ • Аще не разрешится первый грехъ Адамовъ, иже на всехъ бывшій • И инымъ никимъ, токмо самимъ Христомъ Богомъ, Имъже з начала и клятва бысть • А сее не могло ся стати законом, темъ бо грехъ познанъ ест • Но воплощениемъ Сына Божия • Да Себе привед на смерть всех свободить от смерти • Яко бо единемъ человекомъ грехъ въ миръ вниде • Тако и единем человекомъ благодат умножися •
Затымъ яко добрый строитель Іудеи утешает глаголя, иже не будут преступници закону, аще во Христа вверують •
Сущим пакъ от языкъ повелеваеть не возвышатся на людей Ізраилевыхъ, занежъ яко ветви на корени, тако на онехъ ко вере Христове присадишеся •
Промежду же того кладеть размаитая навченія • О прежде прозреных от Бога • О прежде разуменых • О прежде нареченых • О призваных • О оправданых • И о прославленых • О любви Божией • О преложеніи Божиемъ • О воли Божией • О делехъ закона • О вере Христове • О благовестованіи Господьнемъ • О благодати • О делехъ и о доброволенстве человеческомъ • О глубине богатества, намъ неисведомых судовъ Божиих •
К тому знайдеши о многыхъ разделехъ яко о законе прироженомъ, о законе Моисеове, о законе греха • Теже двоякого Адама, или отца, кажеть: единаго от негоже родимся телесне во смерть • Другаго от негоже родимся духовне в животъ • Двоякого человека, внутренаго онже разуму и духу подданъ ест • Зовнутреный онже похотемъ и грехомъ повинися • Троякую смерть, духовную, телесную, и еюже умираемъ греху и похотемъ его • Такожъ и троякій животъ, духовный, телесный, и имже живемы правде во добрыхъ делехъ • Двоякую работу, и свободу еже свободившеся от греховъ, работаемъ правде • Или свободи будучи правде, поработаемъ грехомъ • Двоякое жидовство • И двоякое обрезание, серца, и плоті • Двоякое семя Авраамле • Двоякіи заповеди закона, телесные, и духовные • Двоякое крещение, едино имже омываемъ грехы, другое еже облачимося во дарования Христова • Двоякое погребение, телесное имъже тридневно погребен бысть Христосъ • И духовное, еже мы отдаляющеся греховъ погребаемся в Немъ • Двоякое воскресение, телесное, яко Христосъ воста и мы по Нем востанемъ • И духовное еже мы от злого ко доброму воставаемъ • Двоякая правда Божия, и человечия • Двоякій судъ: Божій и человечій • Двоякая похвала, от Бога и от человекъ • И тако различне о сихъ написа, иже трудно ест не толико намъ простымъ • Но и докторомъ навченымъ ко зрозумению •
Затымъ навчая добрых обычаевъ, со целованіи конает послание •
Конець сказания въ предивную к Римляном епистолу, святого Апостола Христова Павла •
