К СЕЛУНЯНОМЪ ПОСЛАНИЯ СВЯТОГО ПАВЛА АПОСТОЛА ПЕРВАГО СКАЗАНИЕ • ДОКТОРОМ ФРАНЦИСКОМЪ СКОРИНОЮ ЩАСНЕ ПОЧИНАЕТСЯ •
До Селунян пишеть сие первое послание свое святый Апостолъ Павелъ от Афінъ • В нихже первее самъ проповедая слово Божие, навернулъ е на веру Христову • Потомъ посылалъ к нимъ Тимофея, хотяй утвердит их в вере • Тимофей пакъ навернувся, поведаше Павлу • Яко крепци суть в вере, и яко для Христа много пострадаша от своих суседовъ, и яко вельми плачуть по умерълыхъ, не веряще воскресению быти • Таковые речи слышавъ Апостолъ пишеть послание сее • Найпервей благодарить Бога о вере их, и хвалить е яко подобни ему быша во терпеніи, и во доброй славе • Таже приводить имъ на памет яко будучи в них любезне, а верне их навчалъ • И яко много для Христа терпелъ • Да воспоминающе на него будуть крепци в вере • И да не чудятся тому, иже от своих преследования теръпять • Занеже и Церковь Христова еже во жидовстве от своихъ терпит • И Самъ Христосъ наш Збавител от своих же терпел • Затым поведаеть иже радъ бы самъ былъ их наведил, но возбранено ему ест • Протожъ и посылалъ к нимъa Тимофея • Онже пришед великою утехою поведая о вере, и о любви Селунянъ, потешил Павла • О сих пишет во предних трехъ главахъ •
Во останочныхъ пакъ дву главизнахъ, навчаеть их како имають жити во повеленіихъ Божіих • Отдаляющися от нечистоты, и от блуда, от лихоимства, и от празнования • Пребывати же велить во святости, во чистоте, во любви, во деланіи руками своими • Таж по умерлыхъ не велит скорбити яко неціи, не верящие воскресения мертвым быти, и поведаеть словомъ Господьним • Каково будеть востание изъ мертвых • Иніи пакъ хотяху ведати о лете, и о дни пришестъвия Господьня • Симъ кажеть иже яко тать в нощи без всякого ведома, скоро а нагле приідеть • Протожъ на каждую годину имамы быть готов, ожидающ, яко сынове света, живота вечнаго Христа • Другъ друга утешающе, и навчающе •
На конци послания наказует Селунянъ, моляй их яко ся имають соблюдати ко старшим своимъ, ко равнымъ, и ко младшимъ • Никому зла за зло воздающе • Богу велить молитися безпрестанно, да соблюдет душу и тело всякого непорочно, ко дню пришествия Господьня • Таж со целованиемъ конает епистолу •
Конец сказанию •
