К СЕЛУНЯНОМЪ ВТОРАГО ПОСЛАНИЯ ПАВЛА ХРИСТОВА АПОСТОЛА • СКАЗАНИЕ ДОКТОРОМЪ ФРАНЦИСКОМЪ СКОРИНОЮ С ПОЛОЦКА • БОГУ ВСЕДЕРЖИТЕЛЮ КО ВЕЧНОЙ ЧТИ ПОЧИНАЕТСЯ •
О Селунянехъ Апостолъ слышавъ яко пріхожаху до нихъ неціи зовущеся Апостолы Христовы быти • И празнующе, страшаху братию для своея користи, поведаючи иже близко настоить день пришествия Господьня, ониже роздаваху имъ имения своя •
Сия уведевъ Павелъ, занужъ не можаше самъ к нимъ пріити • Епистолиею сею утвержаеть их • Найпервей благодарить Бога, о розмноженіи веры, и любви Селунянъ • И яко много для Христа претерпеша • И о возданіи еже пріимуть за тое, во Царствіи Божиемъ кажеть • И о помсте иже скоро имать пріити на обидящихъ е проповедаеть •
Потомъ о пришествіи Христове, яко и первее писал к ним • Иже несть явлено кому • Потомуже и всемъ пишеть, дабы не двизалися во уме, ни ужасалися, ни веровали прельщающимъ их человеком, ни духомъ, ни словамъ или епистолам, якобы от Павла посланым • Но да ведают иже прежде имать быти отступление от веры Христовы • И пріидеть антихристъ сынъ погибели, творяй чуда по действу сатонину • Егоже убиет Господь духом устъ Своих •
На конци приказуеть Селуняномъ отлучати от себе таковых иже суть безчинни, и празнующе • Яко и самъ в них празно хлеба не яде • И кто не хощет делати, да не ясть, и къ делу приставленъ да будеть • Таж своею рукою с целованиемъ, скончевает послание •
Конець сказанию •
