Выстерегаеть Апостолъ, от блудного учения, иже ест о брашне, и о жененіи • И кажеть какову подобаеть быт добру учителю •
1 Духъ же явне глаголеть, яко во последъняя времена • Отступять неціи от веры • Послухающе духовъ льстивыхъ, и ученией бесовскихъ,
2 в лицемеріи лжу глаголющихъ • Ониже созжены суть съ своею совестию •
3 Возбраняюще женитіся • И воздержатися от брашенъ яже Богъ созда ко снедению со благодарениемъ, вернымъ и познавшимъ истинну •
4 Всяко убо создание Божие добро ест • И ничтоже отметно, со благодарениемъ ядомо •
5 Светит бо ся словомъ Божіимъ, и молитвою •
6 Сия скажеши ли братии • Добръ будешъ служитель Ісусъ Христовъ • Питаяся словесы веры • И добрымъ учениемъ, егоже наследовалъ есь •
7 Скверныхъ пакъ, и старечьскихъ басенъ отрицайся • Обучай же себе к милосердию •
8 Телесное бо обучение в мале ест пожиточно • Но милосердие ко всему естъ потребно • Обетование имея жизни нинешней, и грядущей •
9 Верно слово, и всякому приатию достойно •
10 Для сего бо тружаемся и поношение приемлем, яко уповаемъ на Бога жива • Онъже ест Спаситель всемъ человекомъ, а найболей вернымъ •
11 Возвещай сия, и вчи •
12 Никтоже юностию твоею да не гордить • Но буди образъ верным, словомъ, житиемъ, и любовию • Духомъ, верою, и чистотою •
13 Поколе пріиду, буді пиленъ чтения, утешения, и навчения •
14 Не ленися о своемъ даре, иже дасться тобе пророчествомъ • Со возложениемъ руку презвитерства на тя •
15 Сихъ повчайся, в сих пребывай, и о сих размышляй • Да предспеание твое явно будет всемъ •
16 Смотри самого себе, и учения • И пребывай въ томъ • Сее творяй себе спасеши, и послухающих тя •
