ПОСЛАНИЯ СВЯТОГО ПАВЛА АПОСТОЛА, ЕЖЕ КО КОЛАСАЕМЪ СКАЗАНИЕ
Апостолъ Павелъ посылаеть сию епистолу къ Коласаемъ, ониж жили суть в Меншей Асіи, возле Лаодікии • Сихъ не видел самъ, но слышалъ о нихъ • Иже Епафрасъ, и Аръхиппа • Проповеданиемъ в нихъ слова Божия, навратиша е на веру Христову • Якоже и воспоминаеть их во посланіи семъ •
Потомъ пакъ пришедши лжеапостоли разъвращеваху глаголюще, яко Ісусъ Христосъ Сынъ Бога живаго не приде в миръ спасти насъ, но Анъгели посылаеми от Бога, справоваху наше спасение • К тому повелеваху жидовствовати, и времена языческимъ обычаемъ соблюдати • Сия уведевъ Апостолъ пишет к нимъ • Найпервей благодарить Бога яко слышалъ ест о вере их, еже во Христа Ісуса • Таж молить о нихъ Господа Бога, да подасть имъ дары духовныя • Потом являет иже вси речи добрыи сталися сут намъ Сыном Божіимъ • Наболей отпущение грехом, и душное спасение • И о Немъ создани суть Ангели и вся тварь видимая, и невидимая • И Той ест глава Церкви, и Тымъ единым бысть сомирение, и къ Богу Отцу всехъ насъ приведение • Затым поведаеть о служеніи своемъ, во откровеніи тайнъ Божих • И велми их выстерегаеть от илъжеапостоловъ, от нихже неціи во жидовство • А иніи во еллинъския мира сего мудрости прельщеваху е, а о сих пишеть во предних дву главахъ •
Таже науку даеть о добрых обычаехъ • И чего ся имамы отдаляти, яко суть злая дела, и добрых последовати • Яже по ряду вычитаеть • Мужу со женою како жити, родителем со чады • Господе со служащими их • И о иных добрых нравехъ назвавъ • На конци самъ себе и иных со целованіи предпоручаеть • А то во заднихъ дву главахъ пишеть • Велить теже прочитати сию епистолу, и в Лаодикийской церкви • Таж, напоменувши Архиппу, дабы былъ пилен служения Христова, скончеваеть послание •
Конець сказанию •
