Іуда Фаддей, сынъ Алфеевъ, брат Іаковлев, Апостолъ Ісусъ Христовъ • Пишеть ко всем верующим во Христа, укрепляя нас у вере, и повелевая выстерегатися от прелести еретыческое, сведетелствуя от Писма, и от речей прироженых о погибли их • На конци верныя в добром житіи наставляет •
1 Иуда Христа Ісуса рабъ, брат же Іаковов, о Бозе Отци сущимъ осъвещенымъ, Ісусъ Христомъ соблюденым и званым:
2 милость вам и миръ и любовь да умножится •
3 Возлюбленнии великое тщание имехъ писати к вамъ, о общемъ спасеніи вашем, потреба убо бе дабых писалъ вамъ, моляй вас подвизатися о вере преданой единова святымъ •
4 Вонійдоша бо в васъ неціи человеци невчстивіи, ониже давно суть пронаписани к тяжкому суду • Иже Бога нашего благодать прелагають у скверну, и единаго Владыку Бога, и Господа нашего Ісуса Христа отметаются •
5 Сего ради хощу напомянути вамъ, ведущимъ единою сия • Яко Господь людей от работы Египетския спасе • Потом тыхже неверовавшихъ погуби •
6 И ангелы не соблюдшие своего началства, но оставлше свое жилище, на суд великаго дня узами нерешимыми под мраком соблюде •
7 Яко Содома, и Гомора и околичныя грады их, подобным имъ образом соблудивше, и отшедше вослед плоти иноя • Ныне предлежат во показание огня вечного муку подъемше •
8 Також и сие сония видяще прелщаются плоть убо сквернять, господьствия же оменяются, и славе ругаются •
9 Се Михаілъ Архангелъ, егда со дияволом разсуждая глаголаше о телеси Моисеове, не смел навесті нань слова хулна • Но рече: да запретит тобе Господь •
10 Сии же чего не ведять, хулять и что пак от прирорженія ведят яко немая говяда, сими сквернятся •
11 Горе имъ яко во путь Каиновъ внидоша • И во лесть Валаамовы мзды пролияшеся • И во пререканіи Корееве погибоша •
12 Сия суть скверны во любвехъ ваших гостящеся без боязни, и сами ся пасуще • Яко облаци безводни, от ветръ преносими • И древа есенна бесплодна, двойцею умерша, и искорененна •
13 Яко влъны возъметающегося моря, распеняюще студы своя • И яко звезды блудящие имъ же буря темности соблюдена ест во веки •
14 Пророчествова же о сих седмый от Адама Енохъ глаголя: се придет Господь во тмах святых Ангел Своихъ,
15 сотворити судъ на всехъ, и изъобличить вся нечестивыя, о всехъ делех нечестия их, яже неучьтиве делаша • И о въсехъ словесехъ жестокихъ, ихъже глаголаше Нань грешници неучтивии •
16 Сии суть ропотници сварливіи, по похотехъ своих ходяще нечестиемъ и законопреступлениемъ и уста их глаголют прегордая, чудящеся лицамъ и похлебующе пожитку деля •
17 Вы же возлюблении поминайте глаголы прежде реченныя от Апостолъ Господа нашего Ісуса Христа,
18 еже глаголаху вамъ • Яко во последние времена пріидуть ругатели, по своих нечестивых похотяхъ ходяще •
19 Сии суть отделяюще себе от едъности веры, и суть телесни Духа Святого не имуще •
20 Вы же возлюбленнии святою вашею верою совершайтеся, в Духу Святомъ молящеся,
21 сами себе любовию Божиею соблюдите, чающе милости Господа нашего Ісуса Христа в жизнь вечную •
22 Оных убо милуйте разсужающи,
23 ових же страхом спасайте от огня восхищающе • Обличайте же со боязнию, ненавидяще яже от плоти оскверненую ризу •
24 Могущему сохраниті васъ без греха, и безъ скверны • И поставити пред славою Своею непорочны, в радость
25 Единому Премудрому Богу • И Спасу нашему Ісусу Христу • Ему ж слава, и величие и держава, и область • Ныне и во вся веки • Аминь •
Примечания:
Доконано ест Іудино соборное послание Францискомъ Скориною с Полоцка • В лекарстве, и в наукахъ вызволеных доктором •
Нашли в тексте ошибку? Выделите её и нажмите:
Ctrl + Enter
Послание Іудино, 1 глава. Библия Скорины.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте.
Public Domain — общественное достояние.
2024, bible.by & biblia.by.