К Галатомъ послание святого Апостола Павла, еже написалъ самъ своею рукою велми чудно, и посылаеть к нимъ от Рима • А замыкаеть в собе главъ шесть •
Караеть Апостолъ Галатянъ иже суть скоро отступили от веры Христовы • Еяже не приалъ естъ от человека, но от Самого Христа •
1 Павел посланый, не от человек, ни человеком но Ісусъ Христомъ • И Богомъ Отцемъ, воскресившимъ Его изъ мертвых •
2 И еже со мною вся братия церквамъ Галатским •
3 Благодать вамъ и миръ от Бога Отца, и Господа нашего Ісуса Христа,
4 давшего Себе за грехи наша, да избавить насъ от настоящего века лукавого • По воли Бога и Отца нашего,
5 Емуже слава въ веки аминь •
6 Дивлюся тому, иже такъ скоро прелагаетеся от звавшего васъ, благодатию Христовою во иное Евангелие,
7 еже несть ино • Токмо неціи суть смущающе вами • И хотяще превратити благовестование Христово •
8 Но аще мы, или Ангелъ с небесе благовестить вамъ, паче еже благовестихомъ вамъ, проклятъ да будеть •
9 Якоже прежде рекохом, и ныне паки глаголю: аще кто вамъ благовестить, кроме еже приясте, проклят да будеть •
10 Ныне бо человекы ль препираю чили Бога? Или ищу человекомъ угождати? Аще бо единаче человекомъ угождалъ быхъ, Христу рабъ не былъ быхъ •
11 Сказую же вамъ братия Благовестование проповеданое от мене, яко несть по человеку •
12 Ни бо азъ от человека приахъ е, ни научихся, но явлениемъ Ісусъ Христовымъ •
13 Слышасте бо мое житие иногда во жидовьстве • Яко по премногу гоняхъ Церковь Божию, и разрушахъ ю •
14 И проспевахъ в Жидовьстве надъ многы товарише мое, в роде моемъ • Избытній ревнитель сый отеческыхъ преданией •
15 Егда же благоволи Богъ избравый мя от чрева матери моея, и призвавъ милостию Своею,
16 явити Сына Своего во мне, да благовещу и во языцехъ • И скоро не поволихъ телу и крови •
17 Ни возыдохъ во Ерусалим • Но идохъ во Аравию, и паки возвратихся в Дамаскъ,
18 потом же по трех летехъ възыдохъ во Ерусалимъ • Согледати Петра, и пребых у него дней пятнадесеть •
19 Иного же от Апостолъ не видехъ токъмо Якова брата Господьня •
20 А еже пишу вам се предъ Богом, яко не лжу •
21 Потом же пріидохъ во краины Сиръскія, и Киликійския •
22 И бехъ незнаемъ в лице церквамъ еже от Іудеи ко вере Христове навращенымъ •
23 Точию же слышаще бяху о мне, яко сей ест онже гоняше насъ прежде • А ныне благовестуеть веру, юже иногда разрушаше,
24 и славяху о мне Бога •
Нашли в тексте ошибку? Выделите её и нажмите:
Ctrl + Enter
К Галатомъ послание, 1 глава. Библия Скорины.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте.
Public Domain — общественное достояние.
2024, bible.by & biblia.by.