Караеть Апостолъ Галатянъ, показуя имъ несовершеность Ветхаго Закону, а оправдание наше ест от веры Христовы а не от закона •
1 О несмысленыя Галате, кто васъ прелстилъ истинне не покарятися? Предъ вашима бо очима Ісусъ Христосъ, прежде написан, и в васъ распятъ •
2 Се едино хощу уведети от васъ: от делъ ли закона Духа Святого приясте, чили от слуха веры Христовы?
3 Како несмыслени есте, наченши духом, ныне плотию скончеваетеся?
4 Толика пострадасте без ума, аще ли же и без ума •
5 Но подавая вамъ Духа Святаго, и действуя в васъ силы, для дел ли закона, чили для слуха веры вашея сия чинит?
6 Якоже Авраамъ верова Богу, и вменися ему в правду •
7 Разумеете убо яко сущие от веры сіи сут сынове Авраамлі •
8 Прозрев же Писание, яко от веры оправдить языкы Богъ • Прежде благовести Аврааму, глаголя: се благославятся о тобе вси языци •
9 А прото иже от веры суть, благославятся со вернымъ Авраамом •
10 Елици бо от дел закона суть, проклятию подданы сут • Пишеть бо: проклятъ да будеть всякъ онже не пребудеть во всехъ словахъ писаных во книзе закона сего и делом не наполняя их •
11 А иже въ законе никтож оправдается от Бога • Явно естъ, яко праведный от веры живъ будеть •
12 Законъ же несть от веры • Но полняй заповеди закона человек, живъ будеть в нихъ •
13 Христосъ насъ искупил от клятвы закона бывъ за насъ клятва • Писано бо ест: проклятъ всякъ висяй на древе •
14 Да во языцехъ благославение Авраамле будеть, о Христе Ісусе да обетование Духа пріимемъ верою •
15 Братия по обычаю человеческому глаголю: обаче человеку утверженаго завета • Никтоже отметаеть, и ничто приповелевает •
16 Аврааму же речени быша обетования и семени его • Не глаголеть: и семенемъ его, яко о мнозехъ • Но яко о единомъ: и о семени твоемъ • Еже естъ Христосъ •
17 Се же глаголю завета прежде утверженнаго от Бога во Христа, иже по летех четырехстех и трыдцети бывый законъ, не отметаеть во еже разорити обетование •
18 Аще бо от закона наследие, не к тому от обетования, Аврааму же обетованиемъ дарова Богъ •
19 И что жъ тогда законъ? Для преступления уставленъ естъ, дондеже пріидеть семя емуже обетовано бысть, справованиемъ Ангелъ • Рукою ходатая •
20 Ходатай же единому несть • Богъ пакъ единъ ест •
21 Законъ убо естъ ли же противенъ обетованиемъ Божіимъ? Да не будеть • Аще бо данъ бысь законъ могый оживити • Воистинну от закона бы была правда •
22 Но затвори Писание вся под грехом, да обетование от веры Ісусъ Христовы дасться верующимъ •
23 Прежде бо пришествия веры подъ законом стрегомі бехомъ • Затворени во грядущую веру открытися •
24 Темже закон пестунъ намъ бысть до Христа, да от веры оправдимся •
25 Пришедши же вере, уже не под пестуномъ есмы •
26 Вси бо сынове Божіи есте, верою во Ісуса Христа •
27 Елици бо во Христа крестистеся, во Христа облекостеся •
28 Несть к тому Іудей, ни Еллинъ • Несть рабъ, ни свободъ • Несть мужескы полъ, ни женъскый • Вси бо едино есте о Христе Ісусе •
29 Аще ли же вы Христовы • Тогда семя Авраамле есте, и по обетованию наследници •
