Выстерегаеть Апостолъ Коринфянъ, дабы во добрых делехъ пребывали, а иже хощеть еще утретее к нимъ пріити, и да искушають сами себе, таж конает епистолу •
1 Утретее се пріиду к вамъ, да при устехъ дву или трехъ сведетель, станет всякъ глаголъ •
2 Предповедах вам, и ныне предповедаю • Яко первое бых у васъ, и второе • И не сый ныне пишу, прежде согрешившимъ, и инымъ всемъ • Яко аще опять пріиду к вамъ, не пощажу •
3 Понеж искусити хощете силы глаголющего во мне Христа • Онже в васъ не изнемогаеть, но силенъ естъ вамъ •
4 Ибо аще и распятъ бысть от немощи вашея, но жив естъ от силы Божия • Такожде и мы аще немощьствуемъ о Немъ, но живи будемъ с Нимъ, от силы Божия еже естъ в васъ •
5 Вы сами себе познайте аще есте в вере Христове, сами себе искушайте • Или не знаете себе, яко Ісусъ Христосъ въ васъ естъ? Аще ли чимъ не искушени есте,
6 уповаю бо яко разумети имате, иже мы несмы неискушени предъ Богомъ •
7 Молю же ся къ Богу не творити вамъ ни единого зла • Не яко да мы искушени явимся, но да вы добре творите, мы же яко неискушени будемъ •
8 Ничтож убо не можем противу правде, но по правде •
9 Радуемся бо еда мы немощьствуемъ, вы же силни будете • И се найболей жадаемъ вашего совершения •
10 Сего ради сия пишу вамъ не сый с вами, да внегда пріиду к вамъ неотсечены створю, по власти юже ми далъ Господь во создание, а не во разрушение •
11 Темже братия, радуйтеся, совершайтеся, утешайтеся, тожде мудрствуйте, миръ имейте • Богъ же мира, и любве да будеть с вами •
12 Целуйте другъ друга лобзаниемъ святымъ • Целують васъ святіи вси •
13 Благодать Господа нашего Ісуса Христа • И любовь Божия, и общение Святого Духа со всеми вами аминь •
