КОРИНФОМЪ • ВТОРАГО ПОСЛАНИЯ СВЯТОГО АПОСТОЛА ПАВЛА, СКАЗАНИЕ ДОКТОРА ФРАНЦИСКА СКОРИНЫ С ПОЛОЦКА • БОГУ КО ЧТИ И ЛЮДЕМЪ ПОСПОЛИТЫМ К ДОБРОМУ НАВЧЕНИЮ •
У семъ въторомъ посланіи къ Коринфомъ пишеть святый Апостолъ Павел • Найпервей поведая вину, для чего к нимъ не пришолъ, якоже обещался былъ въ первомъ посланіи • Являя имъ о скорбехъ своих, еже терпелъ естъ для Евангелия Христова • И яко Господь Бог изъбавилъ и • Затымъ скоро приемлеть покаявшегося, егоже былъ въ первой епистоле велелъ предати сатане согрешающего • Дабы ласкаве приняли его Коринъфяне, а сия поведаеть во первой, и во другой главе •
Тажъ кажеть о своей пилности, юже имеаше во благовестованіи Христове • И о льжеапостолехъ ониже поведаша о Ветхомъ Законе, яко потребно ест соблюдати его • И противу тымъ пишет прекладая светлость благодати Христовы, надъ тень закону Моисеова • Не во оправданих бо закона душное спасение залежит, но во наследованіи Евангелия Христова • Для Негоже и многа противенства претерпелъ ест • А то кажет во третей, во четвертой и в пятой главе •
Потомъ пишеть абы что найболей отлучалися от неверныхъ, и с ними не товаришили • Таж хвалить Коринфян, иже послушни были послания его перваго, в немже былъ засмутилъ их • Но той смутокъ обратися всемъ в радость • А о том во шестой и во седмой главе знайдеши •
Затым припоминаеть Макидонянъ яко склонни суть ко даванию милостыни • Теже от Писма сведетелство приводить • Дабы и Коринфяне единый каждый водле можности своея давали милостыню, на споможение братиам, живущим во Ерусалиме • И на тое дело послалъ к нимъ Тіта, и иного брата егоже похвалу кажеть быти во Евангеліи Христове • А с тых словъ можем поразумети, иже бе святый Лука Евангелистъ • А о томъ во осмой, и во девятой главе •
Таже явне караеть льжеапостолы, ихъже прежде сокрите напоминалъ • Они бо Павла понижающе, сами хваляхуся • На тых самихъ Коринфянъ во сведетельство приводит яко проповедаше в нихъ Евангелие Христово • Не своего ради пожитку, но для Божией хвалы • Потомъ вымолвяется пред ними, иже мусить хвалити самъ себе, прировнаяся къ превышним Апостолом Христовым, а то в томъ иже онъ навернул Коринфян на веру Христову • Иже далей проповедалъ Евангелие Христово • Иже болей терпелъ для Христа • Иже ни в чемъ не отяжилъ самъ, а ни от него посланые, всея страны Ахайское • И хотя в речи невымовный, но в писме навченый • А тако повинни суть более послухати его, нежели льживыхъ апостоловъ • Они бо и видениями лестъными хваляхуся • Павел же правдивое и преславное воспоминает видение, иже восхищен бе до третего неба, потом до раю • И тамъ слышал тайны Божия, еже суть над разум человечій • О сих пишеть во десятой, во первойнадесет, и во другойнадесет главе •
На конъци остерегаеть Коринфянъ дабы воздержалися от греховъ • И яко умыслил ест к ним приити • Да не знайдеть их прельщеных, якоже не хощет • И самъ да не явится имъ нещадяи, якоже и они не въсхотят • Та же учай их скончеваеть послание •
Конець сказанию •
