Похваляется Апостолъ о возъявлениехъ Божиих, яже виделъ • И велит выстерегатися от гордости • И вымолвяеть добродеания своя еже чинилъ ест Коринфяномъ •
1 Хвалити ми ся не прислушит, но исповем видения, и откровения Господьня •
2 Вемъ человека о Христе, предъ леты четыренадесятъ • Аще во теле не веде, аще кроме тела не веде, Богъ весть • Восхищена бывша даже до третего небеси •
3 И вем такова человека, онже с телом, или безъ тела, не вемъ, Богъ весть •
4 Яко восхищен бысть до раю • И слышалъ тайные слова ихже не годится человеку глаголати •
5 О таковомъ похвалюся • О собе же не похвалюся, толико в немощах моихъ •
6 Аще бо восхощу похвалитися, не буду безуменъ, истинну бо реку • Но оставлю сия, еда некто помыслить о мне • Что видить мя, или что слышить от мене •
7 И за премногая явления да не превозношуся • Дасть ми ся пострекатель плоти, ангелъ сатанинъ, да мне пакости дееть •
8 О семъ три кратъ Господа молихъ, да отступить от мене •
9 И рече ми: довлееть тобе благодат Моя • Сила бо Моя в немощи совершается • Сего деля радней и болей похвалуся в немощехъ моих, да вселится въ мя сила Христова •
10 Темже благоволю в немощех сих, в досаждениих, во бедахъ, во изъгнаниих, во теснотахъ для Христа • Егда бо изънемогаю, тогда силенъ есмъ •
11 Бых без ума хваляся, вы мя понудисте к тому • Азъ убо от васъ имелъ хваленъ быти • Ни в чем бо не есмъ низшій от превысших Апостолов • Аще ли же ничто есмъ,
12 знамена же моего Апостолства содеашеся у васъ, во всяком терпеніи, и во дивехъ, и чудесехъ, и сілахъ •
13 Что бо естъ егоже бы вы мней имели, нежъли иные церкви? Толико тое иже азъ самъ не стужихъ вамъ, дадите ми неправду сию •
14 Се утретее готовъ есмъ пріити к вамъ, и не стужу вам, не ищу бо ваших, но васъ • Не должна бо суть чада родителемъ щадети имения, но родители чадомъ •
15 Азъ же велми радъ вамъ подамъ, и сам ся предамъ за душе ваше • Аще и боле васъ люблю, мней любимъ есмъ от васъ •
16 Но буди тако • Азъ не отягчихъ вамъ • Аще ли жъ есмъ хитръ, льстиве ли что от васъ приахъ •
17 Еда како ихъже пустихъ к вамъ, теми лихоимствовахъ у васъ?
18 Умолихъ Тіта, и с нимъ послахъ брата • Еда что от васъ зле възялъ ест Тітъ? Не темже ли духомъ ходиве? Не теми ли же и стопами?
19 Пак ли мните яко мы вамъ вымолву деемъ? Предъ Богомъ, о Христе глаголемъ • Вся же возлюбленніи к вашему навчению, и утвержению •
20 Бою же ся егда како аще пріиду к вам, и не якоже хощу обрящу васъ, и азъ не якоже вы хощете обрящуся вамъ • Да не яко, сварове, зависти, гневы, незгоды, клеветы, роптания, гордости, и нестроения, будут между вами •
21 Да не паки пришедша мя смирить Богъ мой у васъ • И восплачуся многых прежде согрешивших, и не покаявшихся, о нечистоте, и любодеаніи, и студоложстве еже содеаша •
