Велит Апостолъ готовится къ будущему добру, и яко имамы жити во терпеніи, и в набоженстве, и не прилучатися к неверным •
1 Поспешествоющи же вам, напоминаемъ васъ • Да не во тще благодать Божию приемлете •
2 Глаголет бо: во время приатно послушахъ тебе, и во день спасенія помогохъ тобе • Се ныне время приатно, се ныне дни спасения •
3 Ни единому, ни в чемъ не давайте погоршения • Да не посрамочено будеть служение наше,
4 но во всемъ составляимы себе яко Божія слугы •
Во терпеніи мнозе, во скорбех, во смуткохъ, во бедахъ, во теснотахъ,
5 в ранахъ, в темницахъ, в неприазнехъ, во тружаниих, во бдениих • В посте,
6 во чистоте, в разуме, во долготерпеніи, во доброте • В Дусе Святе • Во любви нелицемерне •
7 Во слове истинне • В силе Божией • Оружиями праведными десными и шуйми •
8 Честию и безчестиемъ • Ганениемъ и хвалениемъ • Яко ильстъци, а правду молвяще •
9 Яко незнаеми, а всемъ знаеми • Яко умирающе, и се живи есмо • Яко мучими, и неубиваемы,
10 яко смутящеся, всегда же радующеся • Яко нищи, многих же богатяще • Яко ничто имуще, и вся содержаще •
11 Уста наша отверзошеся к вамъ Коринфяне, и серце наше распространися •
12 Не узко вмещайтеся в нас, но узко вмещайтеся во утробахъ ваших •
13 Тожъ бо возмезъдие пріимете, яко чадом вамъ глаголю: упространитеся и вы,
14 и не носите ярма съ неверными • Кое бо причастие правде ко безаконию? Кое же общение свету ко тме?
15 И кое согласие Христови ко Велиалу? Или коя часть верну съ неверным?
16 И кое сложение Церкви со идолы?
Вы бо есте Церков Бога живаго • Якоже рече Богъ: вселюся в ня, и пойду посреди их, и буду имъ Богъ, а они будут Мои людие •
17 Прото изыйдите от среды их, и отлучитеся от нихъ, глаголеть Господь, и нечистоты не дотыкайтеся • И Азъ пріиму васъ,
18 и буду вамъ во Отца, и вы будете Мне в сыны и въ дщеры, глаголеть Господь Вседержител •
