Похваляется Апостолъ предъ Коринфяны, годную тому причину полагая • Яко много доброго чинил естъ, и злого терпелъ •
1 Аще бы есте прияли малое безумие мое, но и приемлете мя,
2 любовию бо Божиею возлюбихъ васъ • Объручихъ бо вы единому мужу, яко деву чисту представити Христу •
3 Бою же ся да не како змия Евъву прелстила лукавствомъ своимъ • Тако истлеють разумы ваши, от истинны еже ест во Христе •
4 Аще бо приходяй к вамъ, иного Христа проповедуеть • Егоже мы не проповедахомъ • Или духъ инъ приемлете, егоже не приясте • Или Еивангелие ино, егоже от насъ не взясте • То добре бысте его прияли •
5 Імею бо за то иже ничего мней не вчинихъ, но яко и превелиціи Апостоли:
6 аще бо непрудкій есмъ во словахъ, но не в разуме, во всем же томъ явенъ есми в вас •
7 Или грехъ учинихъ, самъ себе смиряя, да вы вознесетеся • Яко дармо Еивангелие Божіе благовестихъ вамъ?
8 Иныя церкви обирахъ, пріимуя от нихъ оброки ко вашему служению • И егда у васъ бых, и потребовахъ чего? Не стужихъ не единому,
9 недостатки бо моя исполниша братия, приходящие от Макидония • И во всемъ без обътяжения вашего соблюдохъ себе, и соблюду •
10 Естъ правда Христова во мне, яко похваление сее не заградится о мне, во краинахъ Ахайских •
11 Почто? Яко не люблю ли васъ? Богъ весть • А еже чиню, сее и чинити буду,
12 да отсеку вину тымъ ониже, ищуть вины, дабы в чемъ хвалилися, понеж знайдены суть яко и мы •
13 Таковіи бо лжеапостоли, делатели льстиви, преобъразующеся во Христовы Апостолы •
14 И не ест то дивно • Яко самъ сатана преобразуеться во Ангела светла •
15 Невелико убо аще и служители его преобразуются, якобы были служители правды • Имъже кончина будеть по деломъ их •
16 Паки глаголю: да некто мнит мя безумна быти, аще ли же ни, поне яко немудра пріимите мя • Да и азъ мало что похвалюся •
17 Еже глаголю: не глаголю во Господи • Но яко во безуміи, во сей части похвалы •
18 Понеже мнози хвалятся по плоти, и азъ похвалюся •
19 Сладостне же претерпите безумныя, сами мудри суще •
20 Терпите бо и того аще кто васъ поработаеть • И того аще кто имение ваше поядаеть • Аще кто отнимаеть • Аще кто ся величает • Аще кто вас в лице биеть •
21 По досаждению глаголю, занеж якобы вже мы изнемогохом •
О чемже аще кто смееть хвалитися, в немудрости глаголю: смею и азъ •
22 Евреи суть? И азъ • Ізраильтяне суть? И азъ • Семя Авраамле суть? И азъ •
23 Служители Христови суть? Не мудрствуя глаголю: более азъ • Во трудехъ множая • В ранахъ надъ обычай • Въ темницахъ преболей • Во смертехъ многажды •
24 От Іудеи пять кратъ по четыредесят ранъ, окроме единое приахъ •
25 Трежды палицами биенъ быхъ • Единова камениемъ побиша мя • Три крат лодия испровержеся со мною, нощъ и день во глубине пребых •
26 Во пути ходящи множицею, беды во рекахъ, беды от разбойникъ, беды от сродникъ, беды от языкъ • Беды во градехъ, беды во пустыни, беды в мори • Беды от льжебратіи •
27 Во труде, и печали, и во бденіи мнозе • Во алчи, и жажди • Во пощеніи многажды, во зиме и наготе •
28 Кроме внутреных нападенией моих, иже на вся дни попечение имамъ о всехъ церквахъ •
29 Кто изнемогаеть, и азъ с нимъ не изнемогаю? Кто соблажняется, и азъ не разжигаюся?
30 Аще похвалитися подобаеть о тых яже суть немощи моея, похвалюся •
31 Богъ Отець Господа нашего Ісуса Христа сый благославенъ во веки • Весть яко не лжу •
32 Во Дамасце бо языческій князь, Арефы царя • Стрежаше Дамаска града, яти мя хотяй • И оконцемъ во кошници спущенъ быхъ по стене, и избегохъ от руку его •
