Кажеть Апостолъ Коринфяномъ, абы ся готовили ко приштию его, и учить давати милостыню, скоре, щедре, и веселе •
1 О служеніи пакъ еже ко светымъ не потреба ми ест писати вамъ •
2 Вемъ бо усердие ваше • Имже и похваляюся о васъ предъ Макидоняны • Яко и Ахаіа приготовалася ест от лонскаго лета ваша бо любовь побудила естъ многыхъ •
3 Послали же есмо к вамъ сию братию, да похваление наше еже о васъ, не изъпразнится во части сей • Да якоже поведахомъ, приготовани будьте •
4 Еда како будеть и аще пріидут со мною Макидоняне, и знайдуть васъ неприготованых, постыдимся мы вами • И да не рекут о васъ яко негодні есте того похваления •
5 Сего деля потребно умыслихъ быти, умолити братию • Да преды идуть к вамъ, и уготують прежде обещаную вашу благодать • Да готова будет яко щедрость, а не яко лихоимание •
6 Сия же глаголю: сеяй бо скупо, скупо и пожнеть • А сеяй в благославеніи, во благославеніи и пожнеть •
7 Каждый якоже изволение имать во серци своемъ, не от скорби ни от нужды • Веселого бо даятеля любить Богъ •
8 Силенъ же ест Богъ всяку благодать умножити в васъ, да во всехъ всякъ достатокъ имуще, изъбыточствуете во всяком деле добромъ •
9 Якоже естъ писано: расточилъ и далъ убогымъ, и правъда Его пребываеть во веки •
10 Даяй бо семя сеющему • И хлебъ во снедь да подасть и да умножить семя ваше, и возрастить жита правде вашей •
11 Да во всемъ обогатитеся во всяку простоту, еже соделавает нами благодарение Божие •
12 Яко чинъ служения сего, не толико исполъняеть лишение святыхъ • Но и изъбыточствуеть в томъ, яко многыми бывають благодарения Богови •
13 Ониже искушениемъ служения сего, прославляють Бога • О покореніи исповедания вашего во Евангелие Христово • И о простоте объщения яже в нихъ, и во всехъ •
14 И молятся за васъ, жадающе видети васъ, за премногую милость Божию еже в васъ ест •
15 Благодат же Богови о несказаннем Его даре •
