Поведаеть Апостолъ, иже похвалы человеческое не требуеть, а ни жадаеть • И хвалить служители веры Христовы надъ иные •
1 Зачинаемъ ли опять сами себе похваляти • Или требуемъ, якоже неціи, похвальных посланей к вамъ, или от васъ ко иным?
2 Послание бо наше вы есте, написано во серцехъ ваших • Знаемо и прочитаемо от всехъ человек •
3 И явно то естъ, яко есте послание Христово сложено нами • Написано не черниломъ, но Духом Бога жива • Не на дскахъ каменных, но на дсках телесных серць ваших •
4 Надеание же таково имамы о Христе, ко Богу •
5 Не яко абыхомъ были досътаточны от себе сами, помыслити что, яко от себе • Но вся достаточность наша от Бога ест •
6 Онже и годныхъ насъ вчинилъ быти служителей Новому Закону • Не писмени, но Духу • Писмо бо умерщвяеть, а Духъ оживляеть •
7 Аще ли же служение смерти писмом выобразовано на каменех, бысть во славе • Тако иже не можаху очима возирати сынове Ізраилевы, на лице Моисеово славы деля лица его, еже престала естъ •
8 Того болей служение Духа будеть во славе •
9 Аще бо служение осужденія во славе естъ • Многымъ паче изъбычствит служение правды во славе •
10 Ибо не прославляется, еже преходить во части сей • Превышения ради славы •
11 И аще престающее ест во славе • Многымъ болей пребывающее ест во славе •
12 Імуще пакъ таковую надею, многое дерзновение приемлем •
13 И не якоже Моисей воскладаше покривало на лице свое яко не мощи возирати сыном Ізраилевымъ на заветъ его престающій •
14 И окаменешася помышления их, даже бо до днесъ тожъде покривало, во чтеніи Ветхаго Завета пребываеть не откриваяся • Еже о Христе изъпразнися •
15 Еще убо и до нинешнего дня егда чтуть книгы Моисеовы, покривало на серци имъ лежить •
16 И внегда навратятся къ Господу, отнято будет покривало •
17 Господь же Духъ естъ, а иде ест Духъ Господень, ту свобода •
18 Мы пакъ вси откровенным лицем на славу Господьню возирающе, в той же образ преобразуемся от славы во славу • Яко от Господня Духа •
