Поведаеть Апостолъ о воздании праведных, и яко вси явятся предъ судищемъ Христовымъ, и яко Христосъ за всехъ умрелъ естъ •
1 Вемы бо яко аще земная храмина нашего тела разорится, созданіе от Бога имамы, храмину нерукотворенну вечну на небесехъ •
2 Ибо о семъ воздыхаемъ, во жилище наше небесное облещися жадающе •
3 Аще ли же облечени, и не нази обрящемся •
4 Ибо сущіи во теле воздыхаемъ негодующе, егоже не хощемъ совлещися, но приоблещися • Да пожрется мертвеное животомъ •
5 Кто пакъ соделаваеть насъ все истое, Богъ ест, Онже и дал намъ обручение Духа Своего •
6 Сего ради въ доброй мысли пребываемъ всегда, и вемы яко ходяще во теле семъ, по отдалени есмо от Господа •
7 Верою бо ходимъ, а не видениемъ лица в лице •
8 Дерзаемъ же и благоволим радней отыйти от тела, а не вниити къ Господу •
9 Прото поспешаймы с любовию, ходящеи во теле, или отходящеи от тела, благоугодни Ему быти •
10 Всемъ бо намъ явитися подобаеть предъ судищемъ Христовым • Да прииметь каждыя яже с теломъ содела, аще добро или зло •
11 Ведуще же страхъ онъ Господень, человекомъ советъ даемъ • А Богови явни есмо • Уповаю же и въ совестехъ вашихъ явихомся •
12 Не опять сами себе хвалимъ пред вами, но поводъ вам даемъ дабы вы хвалилися нами, предъ тыми еже хвалятся на очью, а не во серци •
13 Аще бо изумихомся, Богови изумихомся • Аще ли мудрствуемъ, вамъ мудрствуемъ •
14 Любовь убо Христова содержит насъ, розмысляющи сее: ест ли же единъ за всех умре, тогда вси смерти предани быша •
15 Христосъ за всехъ умре да живущие к тому не собе живуть, но умершему за нихъ, и воставшему изъ мертвыхъ •
16 Темже мы отныне ничтоже разумеемъ по плоти • Аще ли жъ и разумехомъ Христа по плоти, но ныне вже не разумеемъ •
17 Протож аще ест кто во Христе, новая тварь естъ • Ветхая бо мимоидоша, и се нова вся быша •
18 Вся пакъ суть от Бога, смирившего насъ Собе Ісусъ Христом • И давшего намъ служение смирения сего •
19 Яко Богъ бе во Христе, смиряя миръ с Собою, не вменяя имъ прегрешения их • И вложилъ ест в насъ слово смирения Своего •
20 От Христа убо послани есмо, якобы Богъ напоминалъ васъ нами • Сего ради молимся вамъ о Христе: смиритеся съ Богом •
21 Онже убо не вчинившего греха предалъ ест за грехи наша • Да мы будемъ оправдани Богови о Немъ •
