1 Засвиде́тельствую же аз пред Бо́гом и Го́сподем на́шим Иису́с Христо́м, хотя́щим суди́ти живы́м и ме́ртвым в явле́нии Его́ и Ца́рствии Его́.
2 Пропове́дуй сло́во, насто́й благовре́менне и безвре́менне, обличи́, запрети́, умоли́ со вся́ким долготерпе́нием и уче́нием.
3 Бу́дет бо вре́мя, егда́ здра́ваго уче́ния не послу́шают, но по свои́х по́хотех изберу́т себе́ учи́тели, че́шеми слу́хом.
4 И от и́стины слух отвратя́т, и к ба́снем уклоня́тся.
5 Ты же трезви́ся о всем, злопостражди́, де́ло сотвори́ благове́стника, служе́ние твое́ изве́стно сотвори́.
6 Аз бо уже́ жрен быва́ю, и вре́мя моего́ отше́ствия наста́.
7 По́двигом до́брым подвиза́хся, тече́ние сконча́х, ве́ру соблюдо́х,
8 Про́чее у́бо соблюда́ется мне вене́ц пра́вды, его́же возда́ст ми Госпо́дь в день он, пра́ведный Судия́, не то́кмо же мне, но и всем возлю́бльшим явле́ние Его́.
9 Потщи́ся ско́ро приити́ ко мне.
10 Дима́с бо мене́ оста́ви, возлюби́в ны́нешний век, и и́де в Солу́нь, Кри́скент в Галати́ю, Тит в Далма́тию.
11 Лука́ еди́н есть со мно́ю. Ма́рка пое́м приведи́ с собо́ю, есть бо ми благопотре́бен в слу́жбу.
12 Тихи́ка же посла́х во Ефе́с.
13 Фело́н, его́же оста́вих в Троа́де у Ка́рпа, гряды́й принеси́, и кни́ги, па́че же ко́жаныя.
14 Алекса́ндр кова́чь мно́га ми зла сотвори́, да возда́ст ему́ Госпо́дь по дело́м его́,
15 От него́же и ты себе́ блюди́, зело́ бо проти́вится словесе́м на́шим.
16 В пе́рвый мой отве́т никто́же бысть со мно́ю, но вси мя оста́виша, да не вмени́тся им.
17 Госпо́дь же мне предста́ и укрепи́ мя, да мно́ю пропове́дание изве́стно бу́дет, и услы́шат вси язы́цы, и изба́влен бых от уст львов.
18 И изба́вит мя Госпо́дь от вся́каго де́ла лука́ва и спасе́т во Ца́рствие Свое́ Небе́сное, Ему́же сла́ва во ве́ки веко́в. Ами́нь.
19 Целу́й Приски́ллу и Аки́лу и Ониси́форов дом.
20 Ера́ст оста́ в Кори́нфе, Трофи́ма же оста́вих в Мили́те боля́ща.
21 Потщи́ся пре́жде зимы́ приити́. Целу́ют тя Евву́л и Пуд, и Лин, и Клавди́а, и бра́тия вся.
22 Госпо́дь Иису́с Христо́с со ду́хом твои́м. Благода́ть с ва́ми. Ами́нь.
