О пребыванию их на земли, и яко змия въкусила в руку Павла • О пришествіи его в Рим, и тамо проповедаше слово Божие •
1 Спасени же бывше, тогда поразумеша, яко Мелита островъ нарицается •
2 Варвары же чиняху немалое милосердие намъ, вознетивши убо огонь, повелели въсемъ огреватися, для настоящего дожду и зимы •
3 Собравшу же Павлу рождіа множство, и возложившу на огнь, ехидна, бегучи от теплоты, секнула в руку его
4 якоже узреша варвари висящу гадыну у руки его, глаголаху другъ ко другу: всяко убийца ест человек сей егоже спасена от моря, судъ жити не остави •
5 Той же отрясъ ехидну во огнь, не пострада ничто зла •
6 Они пакъ чаяху его воскоре разгоретися или пасти внезапу мертва • Многый же часъ онемъ чающим, и зрящим никакова зла въ немъ бывша • Обративъшися ку собе глаголаху бога его быти •
7 На местех же тых, беша села князя оного острова именемъ Поплия • Он же приявъ насъ, три дни друголюбезно честоваше,
8 и пригодилося иже отець Поплиевъ, огъневою и водным трудом лежаше немощен • К немуже Павел вшедъ, и помолився возложи нань руце свое, и исцели его •
9 Сему же бывшу, и прочіи прихожаху исцелевахуся,
10 иже и многими честьми учтиша нас и егда хотехом прочь плавитися, накладаху намъ яже на потребу •
11 По трехъ же месецехъ внидохомъ въ корабль Алексанъдрийскій, презимевшіи во острове томъ Парасіма Диоскора
12 и отвезшеся в Сиракузы, пребыхом три дни •
13 Оттоле же вышедши придохом в Ригию • И по едином дни возвеявшу ветру полуденному • Во вторый день пріидохомъ во Путиоль,
14 идеже обретохомъ братию, умолени быхом от них пребыти с ними дніи седмъ • И тако в Римъ идохомъ •
15 Ту братия слышавше о насъ изыйдоша во стретение наше, даже до Апиева торгу, и триехъ корчебниц • Их же видевъ Павел, благодаривъ Бога приатъ дръзновение •
16 Внегда же пріидохом в Римъ, сотникъ предал ест южники воеводе • Павлу же допущено ест пребыти особе, стрегущу его воину •
17 Бысть же по трехъ днех созва Павелъ старейшины Іудейские, собравъшим же ся рече къ нимъ: мужие и братия азъ ничтоже сотворих противна людемъ или обычаемъ отеческимъ, ужникъ от Ерусалима преданъ быхъ в руце Римляном •
18 Они же выслухавши хотеху пустити мене зануж ни едина вина смерти обретеся во мне,
19 супротиву же глаголющим Іудеомъ, нуждя ми бысть нарицати кесаря • Не якобы на языкъ мой имея что оклеветати, но дабых животъ свой высвободил от смерти •
20 Сея деля убо вины жадахъ васъ видети, и проглаголати, надеждя бо ради людей Ізраилевых ретеземъ симъ обложенъ есмъ •
21 Они же к нему отвещаша: мы ни писания о тобе прияхомъ от Іудея • Ниже пришедши кто от братіи возвести, или глагола что о тобе злое •
22 Хощем же от тебе слышати яже мудръствуеши, о ереси бо сей известно ест намъ, яко всюду ей противу глаголется •
23 Установивши же ему день, пріидоша к нему во страннопріимницу мнозіи • Имже и сказываше сведетельствуя Царствие Божие, и уверяя их яже о Ісусе, от закона Моисеова и от пророкъ, от утра даже до вечера •
24 Некие же вероваху глаголемым от Павла, иніи пакъ не вероваху •
25 Рекшу Павлу глаголъ единъ • Яко добре Духъ Святый глагола Ісаием пророком ко отцем нашимъ рекый:
26 Иди ко людемъ симъ и ирци имъ: слухом услышите, и не имате разумети • И смотряще узрите, и не имате видети •
27 Одебелело бо серце людей сих • Ушима тяжко слышаху, и очи свое завираху • Еда како видят очима, и ушима слышат, и серцем разумеют и обратятся, исцелю их •
28 Ведомо убо да будет вамъ, яко языкомъ послася спасение Божие, и они услышать •
29 И сия ему рекъшу, отидоша Іудеи много имуще между собою взыскание •
30 Пребыл же естъ Павелъ две лете исполна своею мздою, и принимаше всехъ приходящих к нему,
31 проповедуя Царствие Божие, и уча яже о Господи Ісусе со всем дерзновениемъ невозбранно •
