О жалобе юже чиняху Іудеи на Павла предъ Феликсом въ Кесарии • Павелъ отповедевъ имъ, и до кесаря ся отозвалъ •
1 По пяти же днехъ, сниде архиерей Ананія, со старци, и с некоимъ Тертиломъ мовцею, ониже возвестиша владареви о Павле •
2 Призвану же бывшу ему, началъ жаловати Тертилъ глаголя:
3 Понеже во многомъ упокои живемы тобою, и многые ся речи направують языку нашему промышлениемъ твоимъ, весде и всуду, приемлемы то со всякимъ благодарениемъ, вседержавный Феликсе •
4 Но да не паче тружаю тебе, молю послухати нас вократце своею кротостию •
5 Обретохом бо мужа сего, губителна, и движуща противление всемъ Іудеомъ, живущимъ по вселенней, заступника же назорейское ереси,
6 иже церковь покусися осквернити егоже яхомъ, и по закону нашему хотехом судити ему •
7 Пришед же Лусия тысещьникъ с великою силою вырвалъ его з рукъ наших, и к тобе послал,
8 повелев и жалобникомъ его пред тобою стати • От негоже возможеши самъ выпытавъ разсудити, о всехъ сихъ, о нихже мы жалуемъ нань •
9 Приложиша же и Іудеи глаголюще симъ тако быти •
10 Тогда отвеща Павелъ, кивнувшу ему владарю, абы мовилъ • От многъ летъ ведя тебе быти судию справедлива языка сего, з доброю мыслию самъ за себе отвещаю •
11 Можеши то поразумети, иже несть тому дней болей двунадесяти, яко придохъ поклонитися во Ерусалим •
12 Ани въ церкви знайдоша мя с кимъ гадающа, ани в народе разветъ творяща, ни в сонмищи, ни во граде,
13 нижь перевести тое могуть о чемъ ныне на мя жалують •
14 Исповедаю же сее тобе, яко въ путь еже глаголють ересь, тако служу отеческому Богу, верую всем еже в законе, и во пророцехъ писана суть,
15 упование имея на Бога, егоже и сами сие чають, воскресение быти мертвымъ, праведником и грешником,
16 о сем же и азъ подвизаюся, непорочну совесть имети ко Богу, и ко человекомъ всегда •
17 По многых же летехъ пріидох милостыня вчинити во языкъ свой, и приношения •
18 В нихже объретоша мя постящася во церкви, не с народомъ, ни с молвою •
19 Но неціи от сія Іудеи видевши мя возопиша глаголюще: уморите врага нашего • Имъже подобаеть пред тя приіти и глаголати, ест ли что имают ко мне •
20 Или сіи сами да рекуть кою знайдоша во мне неправду, внегда стоахъ во сонмищи •
21 О сем ли толико гласе еже возпихъ стоя посреди их, о воскресеніи мертвых азъ суд приемлю •
22 Слышав же сия Феликсъ отложи имъ, исте ведя о пути семъ • Рекый: егда Лусіа тысещникъ снидеть, выслухаю васъ •
23 Повеле же сотнику стеречи Павла, и имети ослабу, и ни единому возбраняти от своих знаемых служити ему, или приходити к нему •
24 По днех же некых приде Феликсъ, со Друзилиею, женою своею, она же бе Іудеаныня • Призва Павла да слышит от него веру еже во Христа Ісуса •
25 Глаголющу же ему о правде, о воздержаніи, и о суде пріидущем • Пристрашен быв Феликсъ отвеща ему: ныне иди, время же приемъ призову тя •
26 Надеялся убо яко мзда дасться ему от Павла, да отпустит его • Для того часто посылаше, и беседоваше с ним •
27 Двема ж летома скончавшимася приял изменение Феликсъ • Поркия Феста • Хотяй же угодное Іудеомъ вчинити Феликсъ, остави Павла поімана •
