О глаголаніи Павлове пред Агриппою, и Фестомъ, ониже между собою ся радят •
1 Агриппа же Павлу рече: повелевает ти ся самому о себе глаголати • Тогда Павел отвещаваше простер руку:
2 О всехъ о нихже обжалованъ есмъ от Іудеи царю Агриппо имею себе блаженна яко прю свою исповем пред тобою днесь,
3 понеже ты веси все Іудейские обычае, и возыскания • А для того молуся тобе терпеливе послушай мене •
4 Житие бо мое еже от уности, исперва бывшее во языце моем во Ерусалиме ведят вси Іудеи
5 знающе мя прежде, аще хотят сведельствовати • Яко по известней ереси жих фарисей •
6 И ныне во упованіи, еже ко отцемъ нашим обещания бывшего от Бога, стою судим,
7 егоже дванадесяте поколенія наши, нощ и день служаще Богу надеются дойти • О сем упованіи оклеветан есмъ, царю Агъриппо от Іудеи •
8 Что неверно судится вами, аще Богъ мертвыя воставляет •
9 И азъ убо мнехъ себе напротив именю Ісуса Назорея, многа противна вчиніти,
10 еже и вчиних во Ерусалиме • И многы от святых азъ в темницах затворих, от архиереи область пріим • Убиваемым же имъ прилагах совет •
11 И на всехъ сонмищех множицею муча их, принуждах хулити, преизлиха же враждуя на них гоних е, даже и по околичных градехъ •
12 В нихже егда шол есмъ в Дамаскъ, со областию и повелениемъ от архиереи,
13 во полудни на пути видехъ царю с небеси паче сияния солнечнаго осиавши мя свет, и еже со мною идущих •
14 Всем падшим нам на землю, слышах глас глаголющъ ко мне еврейским языком: Савле, Савле что Мя гониши? Жестоко ти ест противу остъну въспечовати •
15 Азъ рехъ: Кто еси Господи? Он же рече: Азъ есмъ Ісусъ, Егоже ты гониши •
16 Но востани и стань на ногу твою, на се бо явихся тобе да поставлю тя слугу и сведетеля, еже виделъ еси, и еже явлю тобе,
17 изъбавляя тя от людей, и от язык, до нихже ныне посылаю тебе,
18 отворити очи их, да обратятся от тмы во свет, и от моци сатинины ко Богу и да примуть оставление грехом, и достояние во святых верою еже ест въ Мя,
19 для того царю Агриппо не бых противенъ небесному видению,
20 но живущим в Дамасце прежде и во Ерусалиме, и по всей стране Іудейстей и языком проповедах покаятися, и обратитіся къ Богу, достойна покаянию дела чиняще •
21 Сих ради мя Іудеи емъше во светилищи хотяху разтерзати,
22 помощ же улучив от Бога, даж и до сего дня стою сведетельствуя малу и велику • Ничтоже иное глаголю токмо еже пророци прорекоша хотящая быти, и Моисей •
23 Яко муку имел прияти Христосъ и яко первый от воскресенія мертвых светъ проповедати людем и языком •
24 Сия же ему отвещающе Фестъ велиемъ гласом рече: безъумуешъ Павле, многыя тя писма во неистовство прелагають •
25 Онъ же рече: не безъумую державне Фесте, но истинны и целомудрыя глаголы вещаю •
26 Весть бо о сих царь к немуже и со дерзновениемъ глаголю, вем убо иже ему от сих ничтоже тайно ест • Несть бо во угле сотворено сее •
27 Веруеши ли царю Агриппо, пророком? вем, яко веруеши •
28 Агріппа ж ко Павлу рече: вомале мя препираеши христианина быти •
29 Павел же рече: молил бых Бога и в мале, и в мнозе • Не токмо тебе но и всехъ слышащих мя днесь, быти имъ тацемъ, якожъ и азъ есмъ окроме узъ сих
30 и сия рекшу ему воста царь, и владар, и Верникіи, и седящие с ними •
31 И отшедше беседоваху, другъ ко другу глаголюще: яко ничтоже смерти достойно, или узамъ творит человекъ сей •
32 Агриппа же ко Фесту рече: отпущенъ можаше быти человекъ сей, аще не бы нарицалъ кесаря • И тако суди ему и владарь послати его до кесаря •
