Притчи 9 Притчи 9 глава

¹ Премудрость созда себе дом и утверди столпов седмь:

² закла своя жертвенная, и раствори в чаши своей вино, и уготова свою трапезу:

³ посла своя рабы, созывающи с высоким проповеданием на чашу, глаголющи:

⁴ иже есть безумен, да уклонится ко мне.

⁵ И требующым ума рече: приидите, ядите мой хлеб и пийте вино, еже растворих вам:

⁶ оставите безумие и живи будете, да во веки воцаритеся: и взыщите разума, да поживете и исправите разум в ведении.

⁷ Наказуяй злыя приимет себе безчестие, обличаяй же нечестиваго порочна сотворит себе (обличения бо нечестивому раны ему).

⁸ Не обличай злых, да не возненавидят тебе: обличай премудра, и возлюбит тя.

⁹ Даждь премудрому вину, и премудрейший будет: сказуй праведному, и приложит приимати.

¹⁰ Начало премудрости страх Господень, и совет святых разум: разумети бо закон, помысла есть благаго.

¹¹ Сим бо образом многое поживеши время, и приложатся тебе лета живота твоего.

¹² Сыне, аще премудр будеши, себе премудр будеши и искренним твоим: аще же зол будеши, един почерпнеши злая. Сын наказан премудр будет, безумный же слугою употребится. Иже утверждается на лжах, сей пасет ветры, той же поженет птицы парящыя: остави бо пути своего винограда, в стезях же своего земледелания заблуди, проходит же сквозе пустыню безводную и землю определенную в жаждех, собирает же рукама неплодие.

¹³ Жена безумная и продерзая скудна хлебом бывает, яже не весть стыдения,

¹⁴ седе при дверех дому своего, на столце яве на стогнах,

¹⁵ призывающая мимоходящих и исправляющих пути своя:

¹⁶ иже есть от вас безумнейший, да уклонится ко мне: и лишенным разума повелеваю, глаголющи:

¹⁷ хлебом сокровенным в сладость прикоснитеся и воду татьбы сладкую пийте.

¹⁸ Он же не весть, яко земнороднии у нея погибают и во дне ада обретаются. Но отскочи, не замедли на месте ея, ниже настави ока своего к ней: тако бо пройдеши воду чуждую и прейдеши реку чуждую: от воды же чуждия ошайся и от источника чуждаго не пий, да многое время поживеши, и приложатся тебе лета живота.