Кажеть Апостолъ Селуняномъ ижебы не дали прельщати ся, о судномъ дни, занужъ перьвей имаеть антихристъ пріити •
1 Молимъ васъ братия для пришесътвия Господа нашего Ісуса Христа, и для совокупленія нашего о Немъ •
2 Не скоро подвизайтеся от ума, ни ужесайтеся • А ни от духа, ни от слова, ни от послания яко от насъ бывшего • Якобы вже наставалъ день Господень •
3 Да никтоже васъ не прелстить ни по единому образу • Яко аще не придеть отступление первее, и откриется человекъ греха, сынъ погыбели,
4 супротивникъ • И превозносяйся на всякого глаголемаго Бога, или чтилища • Тако иже во храме Божиемъ сядеть, показуяся якобы онъ былъ Богомъ •
5 Не помните ли яко еще сый у васъ, сия глаголахъ вамъ?
6 А ныне одержащего и весте, во еже откритися ему во свое время •
7 Тайну бо уже дееть безаконие, точию одержан и ныне, дондеже от среды будеть вынятъ •
8 Тогда явится безаконникъ • Егоже Господь убиеть духомъ устъ Своих • И сказить и явлениемъ пришествія Своего,
9 того егоже пришествие естъ по действу сатонину во всякой силе, и знаменех, и чудесехъ ложныхъ •
10 И во всякой ильсти неправедней • А то въ тыхъ еже имають загинути • Занеже любве истинныя не прияша, дабы спасени были •
11 Сего ради пошлеть к ним Богъ действо прельсти, веровати имъ во лжи •
12 Да судъ пріимут вси не веровавшие правде • Но благоволивша неправду •
13 Мы же должны есмо благодарити Бога всегда, о васъ братие возлюбленная от Господа • Яко изъбра васъ Богъ исперъва во спасение, во святыни Духа, и веры истинны •
14 В нюже призва васъ благовестованиемъ нашимъ • Во приатие славы Господа нашего Ісуса Христа •
15 Темже братия стойте, и держите предания имже навъчистеся • Буди то словомъ, или посланиемъ нашимъ •
16 Сам же Господь нашъ Ісусъ Христосъ, и Богъ и Отець нашъ, возлюбивый насъ, и давый утешение вечное, и упование доброе во милости Своей •
17 Да утешить серца ваша • И утвердить васъ во всяком деле, и слове добромъ •
