3 Маккавейская 4 3-я Маккавейская 4 глава

¹ И҆ вездѣ̀, и҆дѣ́же прїи́де сїѐ повелѣ́нїе, наро́днѣ составлѧ́шесѧ ѩ҆зы́кѡмъ ѹ҆́бѡ пи́ръ съ восклица́ньми и҆ ра́достїю, а҆́ки бы заматерѣ́лаѧ и҆здре́вле въ мы́сли и҆́хъ, нн҃ѣ съ де́рзостїю ѩ҆влѧ́ласѧ вражда̀:

² ї҆ѹде́ѡмъ же бѧ́ше непрестаю́щь пла́чь и҆ ѕѣлѡ̀ рыда́теленъ со слеза́ми во́пль, стена́ньми сожже́ннѹ сѹ́щѹ се́рдцѹ и҆́хъ ѿвсю́дѹ, рыда́ющихъ ѡ҆ неча́ѧннѣй внеза́пѹ ѹ҆ста́вленнѣй на ни́хъ поги́бели.

³ Ка́ѧ страна̀ и҆лѝ гра́дъ, и҆лѝ ко́е весьма̀ ѡ҆бита́емое мѣ́сто, и҆лѝ кї҄ѧ стѡ́гны пла́ча и҆ рыда́нїѧ ѡ҆ ни́хъ не наполнѧ́хѹсѧ;

⁴ Си́це бо съ го́рькою и҆ немилосе́рдою дѹше́ю ѿ страти́гѡвъ сѹ́щихъ по градѡ́мъ є҆динодѹ́шнѡ и҆зсыла́еми бѧ́хѹ (ко царю̀), ѩ҆́кѡ ѡ҆ неѡбы́чныхъ мѹче́нїихъ, и҆ нѣ́цыи ѿ врагѡ́въ взе́млюще пред̾ ѻ҆чеса̀ ѻ҆́бщѹю бѣ́дность и҆ помышлѧ́юще неизвѣ́стнѹю житїѧ̀ и҆змѣ́нѹ, (да не когда̀ и҆ и҆̀мъ слѹчи́тсѧ сїѐ,) пла́кахѹ ѡ҆ пребѣ́дственнѣмъ и҆́хъ и҆зсла́нїи.

⁵ Ведо́мо бо бѧ́ше престарѣ́лыхъ мно́жество сѣди́нами ѹ҆кра́шенныхъ, ра́ди бы́вшагѡ ѿ ста́рости косне́нїѧ но́гъ слѧ́ченыхъ, за наси́льное и҆згна́нїе стремле́нїѧ, без̾ всѧ́кагѡ стѹда̀ ѕлоѹпотреблѧ́ющихъ ко ско́ромѹ ше́ствїю.

⁶ Та́кожде и҆ неда́внѡ сочета́вшыѧсѧ къ житїѧ̀ соѡбще́нїю, въ бра́чный вше́дшыѧ черто́гъ ѻ҆трокови҄цы, вмѣ́стѡ весе́лїѧ взе́мшѧ пла́чь, и҆ пра́хомъ мѷроѹха҄нныѧ власы̀ посы́павшѧ, непокровє́ны же ведѡ́мы, рыда́нїе вмѣ́стѡ пѣ́сней бра́чныхъ є҆динодѹ́шнѡ начина́хѹ, а҆́ки растє́рзаны и҆ноѩзы́чныхъ мѹче́нїемъ, и҆ свѧ҄заны наро́днѣ влекѡ́мы бы́ша съ нѹ́ждею да́же до вверже́нїѧ въ кора́бль.

⁷ Сѹпрѹ́зи же си́хъ въ цвѣтѹ́щемъ ю҆́ношестѣмъ во́зрастѣ, ѹ҆́жами вмѣ́стѡ вѣнцє́въ на ші́ѧхъ ѡ҆плете́ни, вмѣ́стѡ пи́ршества и҆ ю҆́ношескагѡ ѹ҆покое́нїѧ про́чыѧ дни҄ бра́ка въ рыда́нїихъ провожда́хѹ, при нога́хъ ѹ҆жѐ ви́дѧще а҆́дъ лежа́щь.

⁸ Веде́ни же бы́ша ѕвѣри́нымъ ѡ҆́бразомъ, влеко́ми во ѹ҆́захъ желѣ́зныхъ нѹ́ждныхъ: и҆ ѻ҆́ви ѹ҆́бѡ къ сѣда́лищємъ кора́блєнымъ пригвожде́ни бы́ша ші́ѧми, и҆ні́и же за но́ги нерасте́рзными пѹ́тами ѹ҆крѣпле́ни, є҆ще́ же и҆ све́рхѹ ча́стыми дщи́цами ѡ҆бложе́нными ѿ свѣ́та заключе́ни, ѩ҆́кѡ да ѿвсю́дѹ помраче́ни ѻ҆чесы̀, поведе́нїе а҆́ки навѣ҄тницы во все́мъ пла́ванїи и҆мѣ́ютъ.

⁹ Си҄мъ же на глаго́лемѹю ладїю̀ приведє́нымъ бы́вшымъ, и҆ пла́ванїю соверши́вшѹсѧ, ѩ҆́коже бѣ̀ повелѣ́но ѿ царѧ̀, повелѣ̀ и҆̀хъ пред̾ гра́домъ на конориста́телнѣмъ мѣ́стѣ поста́вити, на вели́цѣмъ простра́нствѣ, и҆ на порѹга́нїе вельмѝ ѹ҆го́днѣмъ всѣ҄мъ входѧ́щымъ во гра́дъ, та́кожде и҆ ѿтѹ́дѹ во странѹ̀ посыла́ємымъ ко и҆зше́ствїю: да нижѐ съ во́ѧми є҆гѡ̀ соѡбща́ютсѧ, нижѐ ѿню́дъ сподо́бѧтсѧ ко́егѡ покро́ва.

¹⁰ Є҆гда́ же бы́сть сїѐ, ѹ҆слы́шавъ (ца́рь), ѩ҆́кѡ нѣ́цыи ѿ ро́да и҆́хъ и҆з̾ гра́да та́йнѡ и҆схожда́хѹ ча́стѡ ѡ҆пла́кивати безче́стнѹю бра́тїи бѣ́дность, разгнѣ́вавсѧ ѕѣ́лѡ, повелѣ̀ со прилѣжа́нїемъ и҆ си҄мъ та́кожде ѩ҆́коже и҆ ѻ҆́нѣмъ сотвори́ти, да ника́коже ме́ншѹю ѻ҆́нѣхъ воз̾имѣ́ютъ мѹ́кѹ, и҆ написа́ти всѧ́ко колѣ́но по и҆́мени:

¹¹ не къ ма́лѡ преждеѡб̾ѧ́вленнѣй многотрѹ́днѣй рабо́тѣ, но ѹ҆мѹ́ченныхъ повелѣ́нными ка́зньми, въ коне́цъ и҆стреби́ти во вре́мѧ є҆ди́нагѡ днѐ.

¹² Бы́сть же ѹ҆̀бо си́хъ написа́нїе съ го́рькимъ тща́нїемъ и҆ любоче́стнымъ присѣдѣ́нїемъ ѿ восхо́да со́лнечнагѡ да́же до захожде́нїѧ, и҆ не возмого́ша конца̀ сотвори́ти во дне́хъ четы́редесѧтихъ.

¹³ Ца́рь же непреста́ннѡ ра́достїю вельмѝ и҆сполнѧ́ѧсѧ, пи́ршєства ѹ҆ всѣ́хъ їдѡлѡвъ составлѧ́ѧ, заблѹжде́нымъ дале́че ѿ и҆́стины ра́зѹмомъ и҆ скве́рными ѹ҆сты҄, нѣма҄ѧ ѹ҆́бѡ и҆ не могѹ҄щаѧ глаго́лати и҆̀мъ и҆лѝ помощѝ похвалѧ́ѧ, на превели́каго же бг҃а неподоба҄ющаѧ глаго́лѧ.

¹⁴ По предрѣче́ннѣмъ же вре́мене разстоѧ́нїи, возвѣсти́ша кни́жницы царю̀, ѩ҆́кѡ ника́коже ктомѹ̀ мо́гѹтъ ѡ҆писа́нїе ї҆ѹдє́й сотвори́ти, безчи́сленнагѡ ра́ди и҆́хъ мно́жества, и҆ поне́же сѹ́ть є҆щѐ премно́зи по страна́мъ, и҆ні́и же по домѡ́мъ ѡ҆брѣта́ютсѧ, а҆ и҆ні́и по мѣстѡ́мъ, ѩ҆́кѡ не возмощѝ ѿню́дъ всѣ҄мъ, и҆̀же во є҆гѵ́птѣ, страти́гѡмъ сотвори́ти сегѡ̀.

¹⁵ Є҆гда́ же ца́рь запретѝ и҆̀мъ жесточа́е, а҆́ки дара́ми подкѹ́плєнымъ на кова́рство и҆збѣжа́нїѧ, слѹчи́сѧ и҆̀мъ и҆звѣ́стнѣ є҆го̀ ѡ҆ се́мъ ѹ҆вѣ́рити, глаго́лющымъ съ показа́нїемъ, ѩ҆́кѡ и҆ хартїи҄ ѹ҆жѐ и҆ писа́тєлныѧ трѡ́сти, и҆̀хже ѹ҆потреблѧ́хѹ, ѡ҆скѹдѣ́ша.

¹⁶ Сїе́ же бѣ̀ дѣ́йство помога́ющагѡ ї҆ѹде́ємъ съ нб҃сѐ про́мысла непобѣди́магѡ (бж҃їѧ).