1 Въ лѣ́то пе́рвое кѵ́ра царѧ̀ пе́рсскагѡ, да и҆спо́лнитсѧ сло́во гд҇не ѿ ѹ҆́стъ ї҆еремі́иныхъ, воздви́же гд҇ь дѹ́хъ кѵ́ра царѧ̀ пе́рсскагѡ, и҆ повелѣ̀ проповѣ́дати во все́мъ ца́рствїи свое́мъ, и҆ писа́ньми, глаго́лѧ:
2 сїѧ҄ глаго́летъ кѵ́ръ ца́рь пе́рсскїй: всѧ҄ ца҄рства зємна́ѧ дадѐ мнѣ̀ гд҇ь бг҃ъ нб҇ный, и҆ то́й повелѣ̀ ми, да сози́ждѹ є҆мѹ̀ до́мъ во ї҆ер҇ли́мѣ, и҆́же во ї҆ѹде́и:
3 кто̀ въ ва́съ ѿ всѣ́хъ люді́й є҆гѡ̀; и҆ бѹ́детъ бг҃ъ є҆гѡ̀ съ ни́мъ, и҆ да взы́детъ во ї҆ер҇ли́мъ, и҆́же во ї҆ѹде́и, и҆ да сози́ждетъ до́мъ бг҃ѹ ї҆и҃левѹ, то́й є҆́сть бг҃ъ, и҆́же во ї҆ер҇ли́мѣ:
4 и҆ всѧ́къ ѡ҆ста́вшїйсѧ ѿ всѣ́хъ мѣ́стъ, и҆дѣ́же то́й ѡ҆бита́етъ, и҆ да помо́гѹтъ є҆мѹ̀ мѹ́жїе ѿ мѣ́ста є҆гѡ̀ сребро́мъ и҆ зла́томъ, и҆ сосѹ҄ды и҆ скѡты̀, съ доброво́льными ѡ҆бѣща҄нїи (принесѹ́тъ) въ це́рковь бж҃їю, ѩ҆́же во ї҆ер҇ли́мѣ.
5 И҆ воста́ша кнѧ҄зи ѻ҆те́чествъ ї҆ѹ́диныхъ и҆ венїамі́нихъ и҆ свѧще́нницы и҆ леѵі́ти, и҆ всѝ, и҆̀мже воздви́же бг҃ъ дѹ́хъ и҆́хъ, да взы́дѹтъ созида́нїю це́ркве гд҇ни, ѩ҆́же во ї҆ер҇ли́мѣ:
6 и҆ всѝ, и҆̀же бѧ́хѹ ѡ҆́крестъ, помого́ша рѹка́мъ и҆́хъ сосѹ҄ды сре́брбѧными, зла́томъ, потре́бными, и҆ скота́ми, и҆ драги́ми вещмѝ, кромѣ̀ доброво́льных.
7 И҆ ца́рь кѵ́ръ и҆знесѐ сосѹ́ды це́ркве гд҇ни, и҆̀хже взѧ̀ навѹходоно́соръ и҆з̾ ї҆ер҇ли́ма и҆ положѝ ты҄ѧ въ це́ркви бо́га своегѡ̀:
8 и҆знесе́ же ты҄ѧ кѵ́ръ ца́рь пе́рсскїй рѹко́ю мїѳрїда́та гасвари́нова, и҆ сочтѐ ты҄ѧ сасавасса́рѹ кнѧ́зю ї҆ѹде́йскѹ.
9 И҆ сїѐ число̀ и҆́хъ: ѹ҆мыва́лницъ златы́хъ три́десѧть, ѹ҆мыва́лницъ же сре́брѧныхъ ты́сѧща, ноже́й два́десѧть де́вѧть,
10 и҆ ча́шъ златы́хъ три́десѧть, и҆ сре́брѧныхъ двойны́хъ четы́реста де́сѧть, и҆ сосѹ́дѡвъ и҆ны́хъ ты́сѧща:
11 всѣ́хъ сосѹ́дѡвъ златы́хъ и҆ сре́брѧныхъ пѧ́ть ты́сѧщъ и҆ четы́реста, всѧ҄ взѧ̀ съ собо́ю сасавасса́ръ ѿ преселе́нїѧ вавѷлѡ́нскагѡ во ї҆ер҇ли́мъ.
Нашли в тексте ошибку? Выделите её и нажмите:
Ctrl + Enter
Первая книга Ездры, 1 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784