1 Є҆гда̀ фїлопа́тѡръ ѹ҆вѣ́да ѿ возвѣсти́вшихъ бы́вшее держи́мыхъ ѿ себє̀ мѣ́стъ ѿнѧ́тїе а҆нтїо́хомъ, заповѣ́да всѣ҄мъ во́ємъ свои҄мъ пѣшцє́мъ и҆ ко́нникѡмъ (собра́тисѧ): взѧ́въ же и҆ сестрѹ̀ свою̀ а҆рсїно́ю, и҆зы́де вско́рѣ да́же до рафі́йскихъ мѣ́стъ, и҆дѣ́же ѡ҆полчи́шасѧ вѡ́и и҆̀же при а҆нтїо́хѣ.
2 Ѳеодо́тъ же нѣ́кто и҆спо́лнити навѣ́тъ ѹ҆мы́сливъ, поѧ́тъ предврѹчє́нныѧ є҆мѹ̀ крѣпча́йшыѧ ѻ҆рѹ́жники птоломе́євы, прїи́де но́щїю на птоломе́евъ наме́тъ, ѩ҆́кѡ да са́мъ ѹ҆бїе́тъ є҆го̀ и҆ си́мъ разрѹши́тъ бра́нь.
3 Сего́ же проведѐ досїѳе́й сы́нъ дрїмѵ́ловъ нарица́емый, ро́домъ ї҆ѹде́анинъ, послѣди́ же и҆змѣни́въ зако́ны и҆ ѿ ѻ҆те́ческихъ догма́тѡвъ ѿчѹжди́всѧ, незнамени́та нѣ́коего заключѝ въ наме́тѣ то́мъ, є҆мѹ́же слѹчи́сѧ под̾ѧ́ти ѻ҆́нагѡ мѹче́нїе.
4 Соста́вленнѣй же бы́вшей тѧ́жцѣй бра́ни и҆ во́ємъ а҆нтїо́хѡвымъ па́че мѹжа́ющымсѧ, а҆рсїно́а безпреста́ни проходѧ́щи вѡ́и, со ѹ҆миле́нїемъ и҆ слеза́ми плетєни́цы вла҄съ разрѣши́вши, молѧ́ше, да помо́гѹтъ сами҄мъ себѣ̀ и҆ ча́дѡмъ и҆ жена́мъ мѹ́жественнѡ, ѡ҆бѣщава́ющи да́ти побѣди́вшымъ комѹ́ждо два̀ мна҄са зла́та.
5 И҆ та́кѡ сѹпоста́тѡмъ слѹчи́сѧ рѹкосѣче́нїемъ побѣждє́нымъ бы́ти и҆ мнѡ́гимъ плѣнє́ннымъ ѩ҆́тымъ бы́ти.
6 Полѹчи́въ же намѣ́ренїе, сѹдѝ бли҄жнїѧ гра́ды прише́дъ ѹ҆тѣ́шити.
7 Сотвори́въ же сїѧ҄ и҆ ка́пищємъ да́ры да́въ, мѹ́жествєнны подрѹ҄чныѧ поста́ви.
8 Є҆гда́ же ї҆ѹде́є посла́ша ѿ пресвѵ́тєръ и҆ старѣ́йшинъ къ фїлопа́тѡрѹ поздравлѧ́ющихъ є҆го̀ и҆ да́ры приносѧ́щихъ и҆ ѡ҆ слѹчи́вшихсѧ благополѹ́чїихъ сра́дѹющихсѧ, слѹчи́сѧ є҆мѹ̀ па́че вожделѣ́ти, да скорѣ́е къ ни҄мъ прїи́детъ.
9 Прише́дъ же во ї҆ер҇ли́мъ, и҆ вели́комѹ бг҃ѹ пожрѐ, и҆ благодаре́нїе возда́въ, и҆ прѡ́чаѧ, ѩ҆̀же лѣ́ть бѣ̀ мѣ́стѹ, сотворѝ.
10 И҆ вше́дъ на мѣ́сто, и҆ хѹдо́жествѹ и҆ благолѣ́пїю є҆гѡ̀ ѹ҆диви́всѧ, та́кожде и҆ благочи́нїю хра́ма почѹди́всѧ, съ вожделѣ́нїемъ ѕѣ́лнымъ восхотѣ̀ вни́ти во свѧти́лище.
11 Ѡ҆́нымъ же ре́кшымъ, ника́коже подоба́етъ бы́ти семѹ̀, занѐ нижѐ сѹ́щымъ ѿ ро́да на́шегѡ лѣ́ть є҆́сть входи́ти (та́мѡ), нижѐ всѣ҄мъ ї҆ере́ѡмъ, но то́кмѡ є҆ди́номѹ пе́рвѣйшемѹ всѣ́хъ а҆рхїере́ови, и҆ семѹ̀ є҆ди́ножды въ лѣ́то, ѻ҆́нъ же ника́коже восхотѣ̀ послѹ́шати.
12 Зако́нъ же презрѣ́въ, не ѡ҆ста́сѧ похотѣ́нїѧ своегѡ̀, глаго́лѧ: подоба́етъ вни́ти мѝ: а҆́ще же ѻ҆нѝ и҆ лиша́ютсѧ сицевы́ѧ че́сти, но мнѣ̀ не подоба́етъ. И҆ вопроша́ше, чесѡ̀ ра́ди приходѧ́щѹ є҆мѹ̀ во всѧ́кое ка́пище ни є҆ди́нъ возбранѝ ѿ присѹ́щихъ;
13 Нѣ́кто же неразсѹди́телиѡ речѐ: ѕлѣ̀ са́мо сїѐ чѹ́до смы́слисѧ. Бы́вшѹ же, речѐ, семѹ̀, ко́еѧ ра́ди вины̀ не всѧ́кѡ вни́ти мѝ подоба́етъ, и҆ хотѧ́щымъ и҆̀мъ, и҆лѝ нѝ;
14 Ї҆ере́ѡмъ же во свѧты́хъ ѻ҆де́ждахъ припа́дшымъ и҆ молѧ́щымъ вели́каго бг҃а помощѝ и҆̀мъ въ настоѧ́щей и҆́хъ нѹ́жди и҆ ѹ҆стремле́нїе ѕлѣ̀ наше́дшагѡ премѣни́ти: и҆ внегда̀ во́плѧ со слеза́ми хра́мъ напо́лниша, тогда̀, и҆̀же во гра́дѣ ѡ҆ста́вшїисѧ возмѹти́вшесѧ, и҆зскочи́ша, безвѣ́стно мнѧ́ще бы́ти твори́мое.
15 Та́кожде и҆ заключє́нныѧ дѣ҄вы въ черто́зѣхъ съ ро́ждшими и҆збѣго́ша, и҆ пе́пеломъ и҆ пра́хомъ главы҄ посы́павшѧ, рыда́нїѧ и҆ стена́нїѧ стѡ́гны и҆спо́лниша:
16 и҆ны҄ѧ же всецѣ́лѡ ѹ҆кра́шєнныѧ, на срѣ́тенїе ѹ҆готѡ́ванныѧ черто́ги и҆ подоба́ющїй сты́дъ ѡ҆ста́вльшѧ, тече́нїе нечи́нное во гра́дѣ творѧ́хѹ.
17 И҆ новорождє́нныѧ младе́нцы, ма́тєри же кѹ́пнѡ и҆ дои҄лицы ѡ҆ставлѧ́ющѧ сѣ́мѡ и҆ ѻ҆ва́мѡ, є҆ди҄ны по домѣ́хъ, дрѹгї҄ѧ же по пѹте́хъ, неѹде́ржнѡ въ превы́шнее свѧти́лище собира́хѹсѧ.
18 Бѧ́ше же разли́чна моли́тва въ то́е со́бранныхъ ѡ҆ начина́емыхъ ѿ негѡ̀ беззако́ннѡ.
19 Съ си́ми же гра́ждане дерзнѹ́вше не попѹска́хѹ є҆мѹ̀ коне́чнѡ належа́щѹ и҆ намѣ́ренїе своѐ и҆спо́лнити ѹ҆мы́слившѹ: и҆ возгласи́вше воѡрѹжи́тисѧ комѹ́ждо и҆ мѹ́жественнѣ за ѻ҆те́ческїй зако́нъ ѹ҆мре́ти, ве́лїе смѧте́нїе сотвори́ша на мѣ́стѣ.
20 Є҆два́ же ѿ старѣ́йшинъ и҆ пресвѵ́терѡвъ ѹ҆де́ржани, на то́мже моле́нїѧ стоѧ́нїи ста́ша.
21 И҆ мно́жество ѹ҆́бѡ люді́й, ѩ҆́кѡ и҆ пре́жде, въ си́хъ пребыва́ше молѧ́щеесѧ: а҆ и҆̀же при царѝ старѣ҄йшины мно́гажды покѹша́хѹсѧ прего́рдый є҆гѡ̀ ѹ҆́мъ премѣни́ти ѿ намѣ́реннагѡ совѣ́та:
22 ѻ҆́нъ же де́рзостенъ бы́въ и҆ всѧ҄ ѿри́нѹвъ, ѹ҆жѐ и҆ вхо́дъ творѧ́ше, соверши́ти непщѹ́ѧ предрѣче́нное.
23 Сїѧ҄ ѹ҆̀бо и҆ сѹ́щїи при не́мъ зрѧ́ще, ѡ҆брати́шасѧ є҆́же съ на́шими призыва́ти всѧ҄ содержа́щаго, дабы̀ присѹ́тствѹющымъ помо́глъ, не попѹска́ѧ беззако́ннагѡ и҆ прего́рдагѡ дѣ́ла.
24 Ѿ премно́гагѡ же и҆ болѣ́зненнагѡ наро́дѡвъ совокѹ́пленнагѡ во́плѧ, несказа́нный нѣ́кїй бѣ̀ кли́чь.
25 Мнѧ́шесѧ бо, ѩ҆́кѡ не то́кмѡ человѣ́цы, но и҆ стѣ́ны и҆ ве́сь помо́стъ вопїе́тъ, а҆́ки бы ѹ҆жѐ тогда̀ всѝ сме́рть прїима́ли за ѡ҆скверне́нїе мѣ́ста.
Нашли в тексте ошибку? Выделите её и нажмите:
Ctrl + Enter
Третья книга Маккавейская, 1 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784