1 Нїкано́ръ же ѹ҆вѣ́давъ, ѩ҆́кѡ ї҆ѹ́да въ мѣ́стѣхъсамарі́йскихъ, ѹ҆мы́сли со всѣ́мъ ѹ҆стремле́нїемъ въ де́нь сѹббѡ́тный на ни́хъ напа́сти.
2 По нѹ́жди же послѣ́дѹющїи є҆мѹ̀ ї҆ѹде́є глаго́лахѹ: ника́коже си́це ѕвѣ́рски и҆ ва́рварски да погѹблѧ́еши, но сла́вѹ возда́ждь предпочте́нномѹ ѿ всеви́дѧщагѡ со ст҃ы́нею дне́ви.
3 Нечести́выи́ же вопросѝ: є҆да̀ є҆́сть си́льный на нб҃сѝ, и҆́же повелѣ̀ пра́здновати де́нь сѹббѡ́тный;
4 Ѻ҆́нѣмъ же ѿвѣща́вшымъ: є҆́сть гд҇ь живы́й се́й на нб҃сѝ си́ленъ, и҆́же повелѣ̀ пра́здновати се́дмый де́нь.
5 Ѻ҆́нъ же речѐ: и҆ а҆́зъ си́ленъ є҆́смь на землѝ, повелѣва́ѧй взима́ти ѻ҆рѹ҄жїѧ и҆ ца҄рскїѧ потрє́бы и҆сполнѧ́ти. Ѻ҆ба́че не ѡ҆держа̀ и҆ соверши́ти ѡ҆каѧ́ннагѡ своегѡ̀ совѣ́та.
6 И҆ нїкано́ръ ѹ҆́бѡ вели́кою горды́нею воздви́женъ ѹ҆мы́сли ѻ҆́бщѹю побѣ́дѹ соста́вити на ї҆ѹ́дѹ.
7 Маккаве́й же всегда̀ надѣ́ѧшесѧ со всѣ́мъ ѹ҆пова́нїемъ застѹпле́нїе ѿ гд҇а полѹчи́ти
8 и҆ ѹ҆тѣша́ше свои́хъ, да не ѹ҆боѧ́тсѧ прише́ствїѧ ѩ҆зы́кѡвъ, да и҆мѣ̀ютъ же во ѹ҆мѣ̀ преждебы́вшѹю и҆̀мъ ѿ нб҃сѐ по́мошь, и҆ нн҃ѣ да ча́ютъ ѿ вседержи́телѧ бы́ти себѣ̀ побѣ́дѣ и҆ по́мощи:
9 и҆ наказа́въ и҆̀хъ ѿ зако́на и҆ про҇ро́кѡвъ, воспомѧнѹ́въ же и҆̀мъ преждебы́вшыѧ по́двиги, ѹ҆се́рднѣйшихъ и҆̀хъ сотворѝ:
10 и҆ дѹша́ми воздви́гнѹвъ и҆̀хъ, ѹ҆вѣщава́ше, вкѹ́пѣ показа́въ и҆̀мъ ѩ҆зы́чєскаѧ льщє́нїѧ и҆ клѧтвопрестѹпле́нїе:
11 и҆ коего́ждо и҆́хъ воѡрѹжи́въ не та́кѡ щитѡ́въ и҆ ко́пїй ѹ҆твержде́нїемъ, ѩ҆́кѡ слове́съ благи́хъ ѹ҆тѣше́нїемъ, и҆ сказа́въ со́нъ достовѣ́ренъ, ѹ҆трѡ́бы всѣ́хъ возвеселѝ.
12 Бы́сть же є҆гѡ̀ сицево̀ видѣ́нїе: ѻ҆ні́ю бы́вшаго а҆рхїере́а, мѹ́жа до́браго и҆ блага́го, благоговѣ́йна видѣ́нїемъ, кро́тка же нра́вомъ и҆ бесѣ́дою благолѣ́пна, и҆ ѿ дѣ́тства ѡ҆бѹчи́вшагосѧ всѣ҄мъ добродѣ́телемъ, сего̀ рѹ́цѣ воздѣ́юща и҆ молѧ́щасѧ за всѧ҄ лю́ди ї҆ѹдє́йскїѧ (ви́дѣ).
13 И҆ ѩ҆́кѡ посе́мъ ѩ҆ви́сѧ и҆́нъ мѹ́жъ сѣди́нами и҆ сла́вою ди́венъ, чѹ́дно же нѣ́кое и҆ великолѣ́пнѣйшее ѡ҆́крестъ є҆гѡ̀ преизѧ́щество.
14 Ѿвѣща́въ же ѻ҆ні́а речѐ: се́й є҆́сть братолю́бецъ, и҆́же мно́гѡ мо́литсѧ ѡ҆ лю́дехъ и҆ ѡ҆ ст҃ѣ́мъ гра́дѣ, ї҆еремі́а бж҃їй про҇ро́къ.
15 Просте́ръ же ї҆еремі́а десни́цѹ, даѧ́ше ї҆ѹ́дѣ ме́чь зла́тъ, даю́щь же возгласѝ сїѧ҄:
16 прїимѝ ст҃ы́й ме́чь да́ръ ѿ бг҃а, и҆́мже сокрѹши́ши сѹпоста́ты.
17 Ѹ҆крѣпи́вшежесѧ ї҆ѹ́диными словесы̀ преблаги́ми и҆ могѹ́щими къ мѹ́жествѹ ѹ҆стреми́ти и҆ дѹ́щы ю҆́ношъ и҆спра́вити, ѹ҆мы́слиша не ѡ҆полча́тисѧ, но хра́брѡ напа́сти и҆ со всѧ́кою до́блестїю сше́дшымсѧ срази́тисѧ за ве́щы ст҃ы҄ѧ, поне́же и҆ гра́дъ и҆ ст҃а҄ѧ и҆ свѧти́лище бѣ́дствѹютъ.
18 Бѣ́ бо ѡ҆ жена́хъ и҆ ча́дѣхъ є҆ще́ же и҆ ѡ҆ бра́тїи и҆ ѹ҆́жикахъ ме́ншїй и҆̀мъ по́двигъ, велича́йшїй же и҆ пе́рвый стра́хъ ѡ҆ ѡ҆свѧще́ннѣмъ хра́мѣ.
19 Та́кожде и҆ во гра́дѣ ѡ҆ста́влєннымъ не ма́лаѧ печа́ль, мѧтѹ́щымсѧ ѡ҆ сраже́нїи на по́ли хотѧ́щемъ бы́ти.
20 И҆ всѣ҄мъ ѹ҆жѐ ча́ющымъ и҆мѹ́щагѡ бы́ти сраже́нїѧ и҆ сѹпоста́тѡмъ ѹ҆жѐ смѣси́вшымсѧ, и҆ во́инствѹ чи́ннѡ расположе́ннѹ сѹ́щѹ и҆ ѕвѣрє́мъ въ прили́чнѣй странѣ̀ поста́влєнымъ и҆ ко́нницѣ по ѹ҆́гламъ ѹ҆чине́ннѣй,
21 разсѹжда́ѧ маккаве́й мно́жества прише́ствїе и҆ ѻ҆рѹ́жїѧ разли́чное ѹ҆готовле́нїе и҆ свирѣ́пство ѕвѣре́й, просте́ръ рѹ́цѣ на не́бо, призыва́ше чѹдотворѧ́щаго и҆ призира́ющаго гд҇а, вѣ́даѧ, ѩ҆́кѡ не ѻ҆рѹ́жїемъ побѣ́да, но ѩ҆́коже ѹ҆го́дно є҆мѹ̀, достѡ́йнымъ дае́тъ ѡ҆долѣ́нїе.
22 Рече́ же призыва́ѧ си́мъ ѡ҆́бразомъ: ты̀, влдко, посла́лъ є҆сѝ а҆́гг҃ла твоего̀ при є҆зекі́и царѝ ї҆ѹ́динѣ и҆ ѹ҆би́лъ є҆сѝ ѿ во́євъ сеннахирі́мовыхъ сто̀ ѻ҆́смьдесѧтъ пѧ́ть ты́сѧщъ:
23 и҆ нн҃ѣ, вл҃дко си́льный на нб҃сѣ́хъ, послѝ а҆́гг҃ла твоего̀ блага́го пред̾ на́ми въ стра́хъ и҆ тре́петъ и҆̀мъ:
24 вели́чествомъ мы́шцы твоеѧ̀ да ѹ҆боѧ́тсѧ и҆̀же съ хѹле́нїемъ прише́дшїи на ст҃ы҄ѧ лю́ди твоѧ҄. И҆ се́й ѹ҆́бѡ си́це помоли́сѧ.
25 Нїкано́ръ же и҆ и҆̀же съ ни́мъ съ трѹба́ми и҆ пѣ́сньми приближа́хѹсѧ.
26 Ї҆ѹ́да же и҆ сѹ́щїи съ ни́мъ въ призыва́нїи и҆ моли́твахъ смѣси́шасѧ съ сѹпоста҄ты:
27 и҆ рѹка́ми ѹ҆́бѡ борю́щесѧ, сердца́ми же къ бг҃ѹ молѧ́щесѧ, постла́ша не ме́нши три́десѧти пѧтѝ ты́сѧщъ, ѩ҆вле́нїемъ бж҃їимъ ѕѣлѡ̀ возра́довавшесѧ.
28 Преста́вше же ѿ би́твы и҆ съ ра́достїю возвраща́ющесѧ, позна́ша нїкано́ра па́дша со всеѻрѹ҄жїи (свои́ми).
29 Бы́вшѹ же во́плю и҆ смѧте́нїю, благословлѧ́хѹ си́льнаго ѻ҆те́ческимъ гла́сомъ.
30 И҆ повелѣ̀, и҆́же весьма̀ тѣ́ломъ и҆ дѹше́ю первоподви́жникъ за гра́жданъ, и҆́же во́зраста благопрїѧ́тство къ своемѹ̀ наро́дѹ сохрани́вый ї҆ѹ́да, нїкано́ровѹ главѹ̀ и҆ рѹ́кѹ со ра́момъ ѿсѣщѝ и҆ принестѝ во ї҆ер҇ли́мъ.
31 Прише́дъ же та́мѡ и҆ созва́въ є҆диноѧзы́чныхъ свои́хъ и҆ свѧще́нникѡвъ, пред̾ ѻ҆лтаре́мъ ста́въ, призва̀ сѹ́щихъ ѿ краегра́дїѧ
32 и҆ показа̀ и҆̀мъ скве́рнагѡ нїкано́ра главѹ̀ и҆ рѹ́кѹ хѹ́льниковѹ, ю҆́же прострѐ на хра́мъ ст҃ы́й вседержи́телевъ возносѧ́сѧ:
33 и҆ ѧ҆зы́къ нечести́вагѡ нїкано́ра ѿрѣ̀завъ, речѐ, ѩ҆́кѡ на раздробле́нїе пти́цамъ и҆́мать да́ти, и҆ сїѧ҄ въ возме́здїе безѹ́мїѧ проти́вѹ хра́ма повѣ́си.
34 Вси́ же на нб҃о благослови́ша гд҇а ѩ҆вле́наго, рекѹ́ще: блг҇ве́нъ сохрани́вый мѣ́сто своѐ не ѡ҆скверне́но.
35 Повѣ́си же нїкано́ровѹ главѹ̀ на краегра́дїи во и҆звѣ́стное всѣ҄мъ и҆ ѩ҆́вное гд҇ни по́мощи зна́менїе.
36 И҆ ѹ҆зако́ниша всѝ ѻ҆́бщимъ совѣ́томъ ника́коже ѡ҆ста́вити без̾ пра́зднованїѧ де́нь се́й:
37 и҆мѣ́ти же пра́здникъ се́й въ третїйна́десѧть де́нь вторагѡна́десѧть мц҇а, и҆́же глаго́летсѧ сѷрі́йскимъ гла́сомъ а҆да́ръ, пред̾ є҆ди́нымъ дне́мъ мардохе́ева днѐ.
38 И҆ сїѧ҄ ѹ҆̀бо, ѩ҆̀же ѡ҆ нїкано́рѣ, и҆мѣ́ютсѧ си́це: и҆ ѿ тѣ́хъ време́нъ ѡ҆держа́нъ бы́сть гра́дъ ѿ є҆врє́й, и҆ а҆́зъ здѣ̀ ѡ҆ставлѧ́ю сло́во.
39 И҆ а҆́ще ѹ҆́бѡ бла́го и҆ прили́чно сочине́нїю, сегѡ̀ и҆ са́мъ хотѣ́хъ: а҆́ще же малоцѣ́нно и҆ мѣ́рно, сїѐ по возмо́жности мое́й бѣ̀.
40 ѩ҆́коже бо вїно̀ ѡ҆со́бнѡ пи́ти, та́кожде и҆ во́дѹ па́ки, сопроти́вно є҆́сть: но и҆мже ѡ҆́бразомъ вїно̀ съ водо́ю смѣ́шенное сла́дко и҆ весе́лѹю благода́ть соверша́етъ, та́кожде и҆ сочине́нїе (и҆ ѹ҆краше́нїе) сло́ва весели́тъ слѹ́хи чтѹ́щихъ ї҆сто́рїю. Здѣ́ же да бѹ́детъ и҆ коне́цъ.
Нашли в тексте ошибку? Выделите её и нажмите:
Ctrl + Enter
Вторая книга Маккавейская, 15 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784