1 аминъ. амиинъ. глаголю вамъ. не въходяи двьрьми въ дворъ овьчии. нъ прелазя инуду. тать есть и разбоиникъ.
2 а въходяи двьрьми пастырь есть овъцамъ.
3 сему вратарь отъврьзаеть. и овьца гласъ его слышять и своя овьця глашаеть по имени. и и згонить я.
4 и егда своя овьця ижденеть. предъ ними ходить и овьця по немь идуть. яко ведять гласъ его
5 по щуждемь же не идуть. нъ бежять отъ него. яко не знають щужди ихъ гласа
6 сию притъчу рече имъ Иисусъ они же не разумешя. чьто бешя яже глаголааше имъ.
7 рече имъ пакы Иисусъ аминъ. аминъ. глаголю вамъ. Азъ есмь двьрь овьцамъ.
8 вьсе елико ихъ приде прежде Мене. татие суть и разбоиницинъ не послушашя ихъ овьця.
9 Азъ есмь двьрь. Мъною аще къто вънидеть. спасеться. и вънидеть и изидеть. и пажить обрящеть.
10 тать не приходить. нъ да украдеть и убиеть и погубить Азъ придохъ да животъ имуть и лише имуть.
11 Азъ есмь пастухъ добрыи. пастухъ добрыи. душу свою полагаеть за овьця.
12 а наимьникъ. иже несть пастырь. емуже не суть овьця своя. видить вълкъ грядущъ. и оставяеть овьця. и бегаеть. и вълкъ расхытить я. и распудить овьця.
13 а на имьникъ бежить. яко наимьникъ есть и небрежеть о овьцахъ
14 Азъ есмь пастырь добрыи. и знаю Моя. и знають Мя Моя.
15 яко же знаеть Мя Отець. и Азъ знаю Отца. и душу Мою полагаю за овьця.
16 и ины овьця имаамъ. яже не суть отъ двора сего. и ты Ми подобаеть привести. и гласъ Мои услышять. и будеть едино стадо. и единъ Пастырь.
17 Рече Господь. къ пришъдъшиимъ къ Нему иуде омъ сего ради Мя Отець любить. яко Азъ полагаю душу Мою. да пакы приму ю
18 никъто же възьметь ея отъ Мене нъ Азъ полагаю ю о Себе область имамъ положити ю и область имамъ пакы прияти ю сию заповедь прияхъ отъ Отца Моего
19 распьря же пакы бысть въ иудеихъ. засловеса си.
20 глаголаху же мънози отъ нихъ. бесъ имать. и неистовъ есть чьто Его послушаете.
21 ини глаголааху. си глаголи не суть бесьнующаагося. еда бесъ можеть слепомъ очи отврести
22 Бышя же тогда священия въ Иерусалимехъ. и зима бе
23 и хождааше Иисусъ въ црькъви. въ притворе Соломони.
24 объидошя же И иудеи. и глаголааху Ему доколе душя нашя въ землеши. аще Ты еси Христосъ. рьци намъ не обинуяся
25 отъвеща имъ Иисусъ. рехъ вамъ и не веруете дела яже Азъ творю. въ имя Отьца Моего. та съведетельствують о Мне.
26 нъ вы не веруете несте бо отъ овьць Моихъ. якоже рекохъ вамъ.
27 овьця Моя гласа Моего послушають и Азъ знаю я. и по Мъне идуть.
28 и Азъ животъ вечьныи даю имъ.
29 Отець Мои. иже дасть Мъне. болии вьсехъ есть и никътоже не можеть въсхытити ихъ отъ рукы Отца Моего.
30 Азъ и Отець едино есве.
31 възяшя же камение иудеи. да И побиють.
32 отъвеща имъ Иисусъ мънога дела добра явихъ вамъ. отъ Отьца Моего. за кое дело камение на Мя мещете.
33 отъвещашя Ему июдеи глаголюще. о добре деле камения не мещемъ на Тя. нъ о власфимии. яко Ты Чловекъ сы. твориши ся Самъ Богъ.
34 отъвеща имъ Иисусъ несть ли писано въ законе вашемь. яко Азъ рехъ бози есте.
35 аще оны нарече богы. къ нимъже бысть слово Божие и не могуть ся разорити кънигы
36 Егоже Отець святи. и посъла въ миръ вы глаголете. яко власфимисаеши зане рекохъ. яко Сынъ Божии есмь
37 аще не творю делъ Отца Моего не имете Ми веры.
38 аще ли творю. аще и Мъне веры не емлете. деломъ Моимъ веру имете да разумеетеи веру имете. яко въ Мъне Отець и Азъ въ Отци.
39
40
41
42