1 Въ оно время. чловекъ етеръ отъ фарсеи. имя ему Никодимъ. кънязь июдеискъ.
2 сь придекъ Исусови нощию. и рече ему Равви. вемь яко отъ Бога еси пришьлъ Учитель. никъто же бо не можеть знамении сихъ творити. яже Ты твориши. аще не будеть Богъ съ нимь.
3 отъвещавъ Исусъ. и рече ему. аминъ аминъ глаголю тебе. аще къто не родиться съвыше. не можеть ведети Царьствия Божия.
4 глагола къ Нему Никодимъ. како можеть человекъ родитися старъ сы. еда можетъ въторицею въ утробу вълести матере своея. и родитися.
5 отъвеща Исусъ. и рече ему. аминъ аминъ глаголю тебе. аще къто не родиться водою и Духъмь. не можеть вънити въ Царство Божие.
6 рожденое бо отъ плъти. плъть есть. и рожденое отъ Духа. духъ есть.
7 не дивися яко рехъ ти. подобаеть вамъ родитися съвыше.
8 духъ идеже хощеть дышеть. и гласъ его слышиши. нъ не веси отъкуду приходитъ. и камо идеть. такъ есть всякъ роже ныи отъ Духа.
9 отъвеща Никодимъ и рече Ему. како могутъ си быти.
10 отъвеща Исусъ и рече ему. ты еси. учитель. Израилевъ. и сихъ ли не веси.
11 аминъ аминъ глаголю тебе. яко яже вемъ глаголемъ. и еже видехомъ съведетельствуемъ и съведетельства нашего не приемлете.
12 аще земъна рехъ вамъ и не веруете. како аще реку вамъ небесьная веруете.
13 никътоже възиде на небо. тъкъмо съшьдыи съ небесе. Сынъ Человечьскыи. съи на небесе.
14 и яко Моиси. възнесе змию въ пустыни. тако подобаеть. възнестися Сыну Человечьскууму.
15 да всакъ веруяи въ Нь не погыбнеть. нъ имать живота вечьнааго.
16 Рече Господь Своимъ ученикомъ. тако възлюби Богъ мира. яко Сына Своего Единочядааго дасть. да всякъ веруяи въ Него не погыбнеть. нъ имать живота вечьнааго.
17 не посъла Богъ Сына Своего въ миръ. да судить миру. нъ да спасеться миръ Его ради.
18 веруя и въ Нь. не будеть осужденъ. а не веруяи уже осужденъ есть. яко не верова. въ имя. Единочядааго Сына Божия.
19 се же есть судъ. яко светъ приде въ миръ. и възлюбишя человеци. паче тьму. неже светь. бешя бо. ихъ дела зъла.
20 всякъ бо делая зълая. ненавидить света. и не приходить къ свету. да не обличяться дела его. а творяи истину. грядеть къ свету. да явяться дела его. яко о Бозе суть съделана.
21
22 Въ оно время. въниде Исусъ и ученици Его. въ Июдеискую землю. и ту живяаше и крьщаше.
23 бе же Иоанъ крьстя въ Еноне. близъ Салима. яко воды мъногы беху ту. и крьщаахуся.
24 не убо бе въсажденъ въ тьмъницу Иоанъ.
25 бысть же сътязание отъ ученикъ Иоановъ. съ июдеи о очищении
26 и придошя къ Иоану и решя ему. равви. Иже бе съ тобою. обонъ полъ Иердана. Емуже ты съведетельствова. се Тъ крьщаеть. и въси грядуть къ Нему.
27 отъвеща Иоанъ и рече. не можеть человекъ приимати ничьсоже. аще не будеть ему дано съ небесе.
28 вы сами мъне съведетельствовасте. яко рехъ. несмь. азъ Христосъ. нъ посъланъ есмь предъ Нимь.
29 имеяи невесту женихъ есть. а другъ жениховъ. стоя и послушая его. ра достию радуеться за гласъ жениховъ. си убо радость моя испълнися.
30 Оному подобаеть. расти. а мъне мьнитися.
31 грядыи съвыше. надъ вьсеми есть. иже отъ земля. отъ земля есть. и отъ земля глаголеть. грядыи съ небесе надъ вьсеми есть.
32 еже виде и слыша. се съведетельствуеть. и съведетельства Его. никътоже приемлеть.
33 приимыи Его съведетельство. запечатъле яко Богъ истиньнъ есть.
34
35
36