1 И егда́ отве́рзе седму́ю печа́ть, бы́сть безмо́лвие на небеси́ я́ко по́л часа́.
2 И ви́дех се́дмь А́нгелов, и́же пред Бо́гом стоя́ху: и дано́ бы́сть и́м се́дмь тру́б.
3 И други́й А́нгел прии́де и ста́ пред олтаре́м, име́яй кади́лницу зла́ту: и даны́ бы́ша ему́ фимиа́ми мно́зи, да да́ст моли́твам святы́х все́х на олта́рь златы́й су́щий пред престо́лом.
4 И изы́де ды́м кади́льный моли́твами святы́х от руки́ А́нгела пред Бо́га.
5 И взя́т А́нгел кади́лницу, и напо́лни ю́ от огня́ су́щаго на олтари́, и положи́ на земли́: {пове́рже на зе́млю}и бы́ша гла́си и гро́ми и блиста́ния и тру́с.
6 И се́дмь А́нгел, и́же име́яху се́дмь тру́б, угото́вашася, да востру́бят.
7 И пе́рвому А́нгелу воструби́вшу, бы́сть гра́д и о́гнь, сме́шены с кро́вию, и падо́ша на зе́млю: и тре́тия ча́сть дре́ва погоре́, и вся́ка трава́ зла́чная погоре́.
8 И вторы́й А́нгел воструби́, и я́ко гора́ вели́ка огне́м жего́ма вве́ржена бы́сть в мо́ре: и бы́сть тре́тия ча́сть мо́ря кро́вь,
9 И у́мре тре́тия ча́сть созда́ний су́щих в мо́ри, иму́щих ду́ши, и тре́тия ча́сть корабле́й поги́бе.
10 И тре́тий А́нгел воструби́, и паде́ с небесе́ звезда́ вели́ка, горя́щи я́ко свеща́, и паде́ на тре́тию ча́сть ре́к и на исто́чники водны́я:
11 И и́мя звезде́ глаго́лется а́псинфос: и бы́сть тре́тия ча́сть во́д я́ко пелы́нь, и мно́зи от челове́к умро́ша от во́д, я́ко го́рьки бе́ша.
12 И четве́ртый А́нгел воструби́, и уя́звлена бы́сть тре́тия ча́сть со́лнца и тре́тия ча́сть луны́ и тре́тия ча́сть зве́зд, да затми́тся тре́тия ча́сть и́х, и дне́ тре́тия ча́сть да не све́тит, и но́щь та́кожде.
13 И ви́дех и слы́шах еди́наго А́нгела паря́ща посреде́ небесе́, глаго́люща гла́сом вели́ким: го́ре, го́ре, го́ре живу́щим на земли́ от про́чих гласо́в тру́бных трие́х А́нгел хотя́щих труби́ти.
