1 Лѣ́та тридесѧ́тагѡ ѿ разоре́нїѧ гра́да, бѣ́хъ въ вавѷлѡ́нѣ и҆ смѧто́хсѧ на ѻ҆дрѣ̀ мое́мъ лежа́щь, и҆ помышлє́нїѧ моѧ҄ восхожда́хѹ на се́рдце моѐ,
2 поне́же ви́дѣхъ ѡ҆пѹстѣ́нїе сїѡ́на и҆ и҆з̾ѻби́лїе ве́лїе живѹ́щихъ въ вавѷлѡ́нѣ.
3 (Тогѡ̀ ра́ди) смѹти́сѧ дѹ́хъ мо́й ѕѣлѡ̀, и҆ нача́хъ ѹ҆миле́нными словесы̀ глаго́лати къ вы́шнемѹ
4 и҆ реко́хъ: ѽ, влдко гд҇и! ты̀ (са́мъ) ре́клъ є҆сѝ ѿ нача́ла, є҆гда̀ созда́лъ є҆сѝ зе́млю, и҆ сїѐ є҆ди́нъ, и҆ повелѣ́лъ є҆сѝ лю́демъ,
5 и҆ да́лъ є҆сѝ а҆да́мѹ пло́ть ме́ртвенѹ, но и҆ сїѧ̀ бѧ́ше дѣ́ло рѹ́къ твои́хъ, и҆ вдохнѹ́лъ є҆сѝ въ него̀ дѹ́хъ жи́зни, и҆ бы́сть жи́въ пред̾ тобо́ю:
6 и҆ вве́лъ є҆сѝ є҆го̀ въ ра́й, є҆го́же насадѝ десни́ца твоѧ̀, пре́жде не́же прозѧбѐ землѧ̀:
7 и҆ завѣща́лъ є҆сѝ є҆мѹ̀ сохрани́ти за́повѣдь твою̀, и҆ престѹпѝ ю҆̀, и҆ а҆́бїе пре́далъ є҆сѝ є҆го̀ сме́рти и҆ ро́дъ є҆гѡ̀, и҆ роди́шасѧ ѩ҆зы́цы и҆ племена̀, и҆ лю́дїе и҆ наро́ди, и҆̀мже нѣ́сть числа̀:
8 и҆ хожда́ше кі́йждо наро́дъ по по́хотемъ свои҄мъ, и҆ ди҄внаѧ дѣ́лаша пред̾ тобо́ю, и҆ презира́ша за́пѡвѣди твоѧ҄:
9 па́ки же во вре́мѧ наве́лъ є҆сѝ на ни́хъ пото́пъ и҆ потреби́лъ є҆сѝ живѹ́щихъ на землѝ,
10 и҆ бы́сть коемѹ́ждо и҆́хъ, ѩ҆́коже а҆да́мѹ ѹ҆мре́ти, та́кѡ си҄мъ пото́пъ:
11 ѡ҆ста́вилъ же є҆сѝ є҆ди́наго ѿ ни́хъ нѡ́ѧ съ до́момъ є҆гѡ̀, и҆з̾ негѡ́же (роди́шасѧ) всѝ пра́веднїи:
12 и҆ бы́сть, є҆гда̀ нача́ша мно́житисѧ живѹ́щїи на землѝ, и҆ ѹ҆мно́жиша сы́ны и҆ лю́ди и҆ ѩ҆зы́ки мнѡ́ги, и҆ нача́ша па́ки нече́стїе твори́ти мно́жае пре́жнихъ:
13 и҆ бы́сть, є҆гда̀ беззако́нїе творѧ́хѹ пред̾ тобо́ю, и҆збра́лъ є҆сѝ себѣ̀ мѹ́жа ѿ си́хъ, є҆мѹ́же и҆́мѧ бѣ̀ а҆враа́мъ,
14 и҆ возлюби́лъ є҆сѝ є҆го̀, и҆ показа́лъ є҆сѝ є҆мѹ̀ є҆ди́номѹ хотѣ́нїе твоѐ,
15 и҆ положи́лъ є҆сѝ є҆мѹ̀ завѣ́тъ вѣ́чный, и҆ ре́клъ є҆сѝ є҆мѹ̀, ѩ҆́кѡ никогда̀ ѡ҆ста́виши сѣ́мене є҆гѡ̀, и҆ да́лъ є҆сѝ є҆мѹ̀ ї҆саа́ка, ї҆саа́кѹ же да́лъ є҆сѝ ї҆а́кѡва и҆ и҆са́ѵа:
16 и҆ и҆збра́лъ є҆сѝ себѣ̀ ї҆а́кѡва, и҆са́ѵа же ѿри́нѹлъ є҆сѝ, и҆ размно́жисѧ ї҆а́кѡвъ во мно́жество ве́лїе:
17 и҆ бы́сть, є҆гда̀ и҆зве́лъ є҆сѝ и҆з̾ є҆гѵ́пта сѣ́мѧ є҆гѡ̀, приве́лъ є҆сѝ къ горѣ̀ сина́йстѣй,
18 и҆ преклони́лъ є҆сѝ нб҃са̀, и҆ ѹ҆ста́вилъ є҆сѝ зе́млю, и҆ поколеба́лъ є҆сѝ вселе́ннѹю, и҆ трепета́ти сотвори́лъ є҆сѝ бє́здны, и҆ возмѹти́лъ є҆сѝ мі́ръ,
19 и҆ про́йде сла́ва твоѧ̀ враты̀ четы́рьми, ѻ҆гне́мъ и҆ земны́мъ трѧсе́нїемъ, и҆ вѣ́тромъ и҆ мра́зомъ, да да́си зако́нъ сѣ́мени ї҆а́кѡвлю и҆ ро́дѹ ї҆и҃левѹ прилѣжа́нїе:
20 и҆ не ѿѧ́лъ є҆сѝ ѿ ни́хъ се́рдца лѹка́вагѡ, да зако́нъ тво́й сотвори́тъ въ ни́хъ пло́дъ:
21 се́рдце бо лѹка́во носѧ̀ пе́рвый а҆да́мъ, престѹпѝ и҆ побѣжде́нъ бы́сть, и҆ та́кѡ всѝ, и҆̀же ѿ негѡ̀ роди́шасѧ:
22 и҆ пребыва́ше не́мощь и҆ зако́нъ съ се́рдцемъ человѣ́ческимъ, съ лѹка́встомъ ко́рене, и҆ преста̀ благо́е, и҆ наста̀ ѕло́е:
23 и҆ преидо́ша времена̀, и҆ сконча́шасѧ лѣ҄та, и҆ воздви́глъ є҆сѝ себѣ̀ раба̀ и҆́менемъ даві́да,
24 и҆ повелѣ́лъ є҆сѝ є҆мѹ̀ созда́ти гра́дъ и҆́мени твоемѹ̀ и҆ приноси́ти въ не́мъ тебѣ̀ ѳѷмїа́мъ и҆ жє́ртвы:
25 и҆ бы́сть сїѐ чрез̾ мнѡ́га лѣ҄та, и҆ согрѣши́ша живѹ́щїи въ то́мъ гра́дѣ,
26 во всѣ́хъ творѧ́ще, ѩ҆́коже сотворѝ а҆да́мъ и҆ всѝ ро́дове є҆гѡ̀, поне́же и҆ са́ми бы́ша се́рдцемъ лѹка́ви,
27 и҆ тогѡ̀ ра́ди гра́дъ тво́й пре́далъ є҆сѝ въ рѹ́ки врагѡ́въ твои́хъ:
28 є҆да̀ лѹ҄чшаѧ творѧ́тъ, и҆̀же ѡ҆бита́ютъ въ вавѷлѡ́нѣ, и҆ тогѡ̀ ра́ди владѣ́ютъ сїѡ́номъ;
29 и҆ бы́сть є҆гда̀ прїидо́хъ сѣ́мѡ и҆ ви́дѣхъ нечє́стїѧ, и҆̀мже нѣ́сть числа̀, и҆ мно́гихъ согрѣша́ющихъ ви́дѣ дѹша̀ моѧ̀ въ сїѐ тридесѧ́тое лѣ́то, и҆ ѹ҆жасе́сѧ се́рдце моѐ,
30 поне́же ви́дѣхъ, ка́кѡ терпи́ши согрѣша́ющымъ и҆ пощади́лъ є҆сѝ нече́ствѹющихъ и҆ погѹби́лъ є҆сѝ лю́ди твоѧ҄, сохрани́лъ же є҆сѝ врагѝ твоѧ҄ и҆ не возвѣсти́лъ є҆сѝ (ни комѹ́же):
31 вои́стиннѹ не вѣ́мъ, ка́кѡ сїѧ҄ ѹ҆разѹмѣ́ти и҆́мамъ; є҆да̀ сѹ́ть дѣла̀ лѹ҄чшаѧ вавѷлѡ҄нскаѧ, не́жели сїѡ҄нскаѧ;
32 є҆да̀ позна́ша тебѐ и҆́нїи ѩ҆зы́цы кромѣ̀ ї҆и҃лѧ; и҆лѝ ка҄ѧ племена̀ вѣ́роваша свидѣ́нїємъ твои҄мъ, ѩ҆́коже ї҆а́кѡвъ;
33 и҆́хже мзда̀ не ѩ҆ви́сѧ, нижѐ трѹ́дъ и҆́хъ твори́тъ плода̀, поне́же прохожда́ѧ проидо́хъ посредѣ̀ ѩ҆зы҄къ и҆ ви́дѣхъ ѧ҆̀ процвѣта́ющѧ и҆ не по́мнѧщыѧ повелѣ́нїй твои́хъ:
34 нн҃ѣ ѹ҆́бѡ и҆змѣ́ри на мѣ́рилѣхъ непра҄вды на́шѧ и҆ живѹ́щихъ на землѝ, и҆ нигдѣ̀ ѡ҆брѧ́щетсѧ и҆́мѧ твоѐ, то́кмѡ во ї҆и҃ли:
35 и҆ когда̀ не согрѣши́ша пред̾ тобо́ю живѹ́щїи на землѝ; и҆лѝ кі́й ѩ҆зы́къ та́кѡ сохрани́лъ за́пѡвѣди твоѧ҄;
36 си́хъ ѹ҆́бѡ по и҆менѡ́мъ ѡ҆брѧ́щеши сохрани́вшихъ повєлѣ́нїѧ твоѧ҄, ѩ҆зы́кѡвъ же не ѡ҆брѧ́щеши.
Нашли в тексте ошибку? Выделите её и нажмите:
Ctrl + Enter
Третья книга Ездры, 3 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784