3 Царств 17 3-я Царств 17 глава

¹ И҆ речѐ и҆лїа̀ про҇ро́къ ѳесві́тѧнинъ, и҆́же ѿ ѳесві́и галаа́дскїѧ, ко а҆хаа́вѹ: жи́въ гд҇ь бг҃ъ си́лъ, бг҃ъ ї҆и҃левъ, є҆мѹ́же предстою̀ пред̾ ни́мъ, а҆́ще бѹ́детъ въ лѣ҄та сїѧ҄ роса̀ и҆ до́ждь, то́чїю ѿ ѹ҆́стъ словесѐ моегѡ̀.

² И҆ бы́сть гл҃ъ гд҇ень ко и҆лїѝ:

³ и҆дѝ ѿсю́дѹ на восто́къ и҆ скры́йсѧ въ пото́цѣ хора́ѳа прѧ́мѡ лицѹ̀ ї҆ѻрда́новѹ:

⁴ и҆ бѹ́деши пи́ти ѿ пото́ка во́дѹ, и҆ вра́нѡмъ заповѣ́дахъ препита́ти тѧ̀ та́мѡ.

⁵ И҆ сотворѝ и҆лїа̀ по гл҃ѹ гд҇ню, и҆ сѣ́де при пото́цѣ хора́ѳовѣ прѧ́мѡ лицѹ̀ ї҆ѻрда́новѹ:

⁶ и҆ вра́нове приноша́хѹ є҆мѹ̀ хлѣ́бы и҆ мѧса̀ заѹ́тра, и҆ хлѣ́бы и҆ мѧса̀ къ ве́черѹ, и҆ ѿ пото́ка пїѧ́ше во́дѹ.

⁷ И҆ бы́сть по дне́хъ, и҆ и҆́зсше и҆сто́чникъ, ѩ҆́кѡ не бѣ̀ дождѧ̀ на зе́млю,

⁸ и҆ бы́сть гл҃ъ гд҇ень ко и҆лїѝ гл҃ѧ:

⁹ воста́ни и҆ и҆дѝ въ саре́птѹ сїдѡ́нскѹю, и҆ пребѹ́ди та́мѡ: се́ бо, заповѣ́дахъ та́мѡ женѣ̀ вдови́цѣ препита́ти тѧ̀.

¹⁰ И҆ воста̀ и҆ и҆́де въ саре́птѹ сїдѡ́нскѹю, и҆ прїи́де ко вратѡ́мъ гра́да: и҆ сѐ, та́мѡ жена̀ вдова̀ собира́ше дрова̀. И҆ возопѝ и҆лїа̀ в̾слѣ́дъ є҆ѧ̀ и҆ речѐ є҆́й: принесѝ нн҃ѣ мѝ ма́лѡ воды̀ въ сосѹ́дѣ, и҆ и҆спїю̀.

¹¹ И҆ и҆́де взѧ́ти. И҆ возопѝ в̾слѣ́дъ є҆ѧ̀ и҆лїа̀ и҆ речѐ є҆́й: прїимѝ ѹ҆̀бо мнѣ̀ и҆ ѹ҆крѹ́хъ хлѣ́ба въ рѹцѣ̀ свое́й, да ѩ҆́мъ.

¹² И҆ речѐ жена̀: жи́въ гд҇ь бг҃ъ тво́й, а҆́ще є҆́сть ѹ҆ менє̀ ѡ҆прѣсно́къ, но то́кмѡ го́рсть мѹкѝ въ водоно́сѣ и҆ ма́лѡ є҆ле́а въ чва́нцѣ: и҆ сѐ, а҆́зъ соберѹ̀ два̀ пѡлѣ́нца, и҆ вни́дѹ, и҆ сотворю̀ є҆̀ себѣ̀ и҆ дѣ́темъ мои҄мъ, и҆ снѣ́мы є҆̀, и҆ ѹ҆́мремъ.

¹³ И҆ речѐ къ не́й и҆лїа̀: дерза́й, вни́ди и҆ сотворѝ но глаго́лѹ твоемѹ̀: но сотвори́ ми ѿтѹ́дѹ ѡ҆прѣсно́къ ма́лъ пре́жде, и҆ принеси́ ми, себѣ́ же и҆ ча́дѡмъ свои҄мъ да сотвори́ши по́слѣжде,

¹⁴ ѩ҆́кѡ та́кѡ гл҃етъ гд҇ь бг҃ъ ї҆и҃левъ: водоно́съ мѹкѝ не ѡ҆скѹдѣ́етъ, и҆ чва́нецъ є҆ле́а не ѹ҆ма́литсѧ до днѐ, до́ндеже да́стъ гд҇ь до́ждь на зе́млю.

¹⁵ И҆ и҆́де жена̀, и҆ сотворѝ по глаго́лѹ и҆лїинѹ̀, и҆ дадѐ є҆мѹ̀, и҆ ѩ҆дѐ то́й, и҆ та̀, и҆ ча҄да є҆ѧ̀.

¹⁶ И҆ ѿ тогѡ̀ днѐ водоно́съ мѹкѝ не ѡ҆скѹдѣ̀, и҆ чва́нецъ є҆ле́а не ѹ҆ма́лисѧ, по гл҃ѹ гд҇ню, є҆го́же гл҃а рѹко́ю и҆лїино́ю.

¹⁷ И҆ бы́сть по си́хъ, и҆ разболѣ́сѧ сы́нъ жены̀ госпожѝ до́мѹ, и҆ бѣ̀ болѣ́знь є҆гѡ̀ крѣпка̀ ѕѣлѡ̀, до́ндеже не ѡ҆ста́сѧ въ не́мъ дѹ́хъ є҆гѡ̀.

¹⁸ И҆ речѐ ко и҆лїѝ: что̀ мнѣ̀ и҆ тебѣ̀, человѣ́че бж҃їй; вше́лъ є҆сѝ ко мнѣ̀ воспомѧнѹ́ти непра҄вды моѧ҄ и҆ ѹ҆мори́ти сы́на моего̀.

¹⁹ И҆ речѐ и҆лїа̀ къ женѣ̀: да́ждь мѝ сы́на твоего̀. И҆ взѧ́тъ є҆го̀ ѿ нѣ́дра є҆ѧ̀, и҆ вознесѐ є҆го̀ въ го́рницѹ, и҆дѣ́же са́мъ почива́ше, и҆ положѝ є҆го̀ на ѻ҆дрѣ̀ свое́мъ.

²⁰ И҆ возопѝ и҆лїа̀ ко гд҇ѹ и҆ речѐ: ѹ҆вы̀ мнѣ̀, гд҇и, свидѣ́телю вдовы̀, ѹ҆ неѧ́же а҆́зъ нн҃ѣ пребыва́ю, ты̀ ѡ҆ѕло́билъ є҆сѝ є҆́же ѹ҆мори́ти сы́на є҆ѧ̀. И҆ дѹ́нѹ на ѻ҆́трочища три́жды, и҆ призва̀ гд҇а и҆ речѐ: гд҇и бж҃е мо́й, да возврати́тсѧ ѹ҆̀бо дѹша̀ ѻ҆́трочища сегѡ̀ въ ѻ҆́нь. И҆ бы́сть та́кѡ: и҆ возопѝ ѻ҆́трочищь, и҆ сведѐ є҆го̀ съ го́рницы въ до́мъ, и҆ дадѐ є҆го̀ ма́тери є҆гѡ̀. И҆ речѐ и҆лїа̀: ви́ждь, жи́въ є҆́сть сы́нъ тво́й.

²¹

²²

²³ И҆ речѐ жена̀ ко и҆лїѝ: сѐ, ѹ҆разѹмѣ́хъ, ѩ҆́кѡ человѣ́къ бж҃їй є҆сѝ ты̀, и҆ гл҃ъ гд҇ень во ѹ҆стѣ́хъ твои́хъ и҆́стиненъ.