1 И҆ взы́де мѡѷсе́й ѿ а҆равѡ́ѳа мѡа́влѧ на го́рѹ нава́ѵъ, на ве́рхъ фазга̀, ѩ҆́же є҆́сть прѧ́мѡ ї҆ерїхѡ́нѹ: и҆ показа̀ є҆мѹ̀ гд҇ь всю̀ зе́млю галаа́дскѹ да́же до да́на,
2 и҆ всю̀ зе́млю нефѳалі́млю, и҆ всю̀ зе́млю є҆фре́мовѹ и҆ манассі́инѹ, и҆ всю̀ зе́млю ї҆ѹ́динѹ да́же до мо́рѧ послѣ́днѧгѡ,
3 и҆ пѹсты́ню и҆ ѡ҆крє́стнаѧ (се́ла) ї҆ерїхѡ́на, гра́дъ фі́нїкѡвъ да́же до сигѡ́ра,
4 и҆ речѐ гд҇ь къ мѡѷсе́ю: сїѧ̀ землѧ̀, є҆́юже клѧ́хсѧ а҆враа́мѹ и҆ ї҆саа́кѹ и҆ ї҆а́кѡвѹ, гл҃ѧ: сѣ́мени ва́шемѹ да́мъ ю҆̀: и҆ показа́хъ ю҆̀ ѻ҆чесе́мъ твои҄мъ, и҆ та́мѡ не вни́деши.
5 И҆ сконча́сѧ та́мѡ мѡѷсе́й ра́бъ гд҇ень въ землѝ мѡа́вли сло́вомъ гд҇нимъ.
6 И҆ погребо́ша є҆го̀ въ землѝ мѡа́вли бли́з̾ до́мѹ фогѡ́рова. И҆ не ѹ҆вѣ́да никто́же погребе́нїѧ є҆гѡ̀ да́же до днѐ сегѡ̀.
7 Мѡѷсе́ю же бѣ̀ сто̀ и҆ два́десѧть лѣ́тъ, є҆гда̀ сконча́сѧ: не ѡ҆темнѣ́стѣ ѻ҆́чи є҆гѡ̀, ни и҆стлѣ́ста ѹ҆стнѣ̀ є҆гѡ̀.
8 И҆ пла́кашасѧ сы́нове ї҆и҃лєвы мѡѷсе́а во а҆равѡ́ѳѣ мѡа́вли ѹ҆ ї҆ѻрда́на бли́з̾ ї҆ерїхѡ́на три́десѧть дні́й. И҆ сконча́шасѧ дні́е пла́ча сѣ́тованїѧ ѡ҆ мѡѷсе́и.
9 И҆ ї҆исѹ́съ сы́нъ наѵи́нъ напо́лнисѧ дх҃а ра́зѹма: возложи́ бо мѡѷсе́й рѹ́цѣ своѝ на него̀. И҆ послѹ́шаша є҆гѡ̀ сы́нове ї҆и҃лєвы, и҆ сотвори́ша ѩ҆́коже заповѣ́да гд҇ь мѡѷсе́ю.
10 И҆ не воста̀ ктомѹ̀ про҇ро́къ во ї҆и҃ли ѩ҆́коже мѡѷсе́й, є҆го́же позна̀ гд҇ь лице́мъ къ лицѹ̀,
11 во всѣ́хъ зна́менїихъ и҆ чѹдесѣ́хъ, є҆го́же посла̀ гд҇ь сотвори́ти ѧ҆̀ въ землѝ є҆гѵ́петстѣй фараѡ́нѹ и҆ рабѡ́мъ є҆гѡ̀ и҆ все́й землѝ є҆гѡ̀,
12 ди҄внаѧ вели҄каѧ, и҆ рѹ́кѹ крѣ́пкѹю (и҆ мы́шцѹ высо́кѹю), ѩ҆̀же сотворѝ мѡѷсе́й пред̾ всѣ́мъ ї҆и҃лемъ.
Нашли в тексте ошибку? Выделите её и нажмите:
Ctrl + Enter
Второзаконие, Пятикнижие Моисея, 34 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784