2-я Ездры 9 глава — Библия — Елизаветинская Библия 1751

¹ И҆ воста́въ є҆́здра ѿ притво́ра хра́ма, и҆́де въ сосѹдохрани́лницѹ ї҆ѡана́на сы́на є҆лїасі́вова,

² и҆ водвори́всѧ та́мѡ не вкѹша́ше хлѣ́ба, нижѐ воды̀ пїѧ́ше, рыда́ѧ ѡ҆ беззако́нїихъ вели́кихъ наро́да.

³ И҆ бы́сть проповѣ́данїе во все́й ї҆ѹде́и и҆ ї҆ер҇ли́мѣ всѣ҄мъ, и҆̀же бѧ́хѹ ѿ плѣне́нїѧ, є҆́же собра́тисѧ во ї҆ер҇ли́мъ:

⁴ и҆ є҆ли́цы не прїи́дѹтъ въ два̀ и҆лѝ трѝ дни҄, по сѹдѹ̀ предсѣдѧ́щихъ старѣ́йшинъ во́зметсѧ и҆мѣ́нїе и҆́хъ, и҆ то́й чѹ́ждь бѹ́детъ ѿ мно́жества бы́вшагѡ въ плѣне́нїи.

⁵ И҆ собра́шасѧ всѝ, и҆̀же бѧ́хѹ ѿ колѣ́на ї҆ѹ́дина и҆ венїамі́нова, въ трѝ дни҄ во ї҆ер҇ли́мъ, се́й мц҇ъ девѧ́тый, въ двадесѧ́тый де́нь мц҇а,

⁶ и҆ сѣдо́ша всѐ мно́жество на простра́нствїи церко́внѣмъ, дрожа́ще ра́ди зимы̀ настоѧ́щїѧ.

⁷ И҆ воста́въ є҆́здра речѐ и҆̀мъ: вы̀ беззако́ннѡ сотвори́ли є҆стѐ, и҆ поѧ́сте себѣ̀ жєны̀ и҆ноплемє́нничи, да приложитѐ грѣхѝ ко ї҆и҃лю:

⁸ и҆ нн҃ѣ дади́те и҆сповѣ́данїе и҆ сла́вѹ гд҇ѹ бг҃ѹ ѻ҆тє́цъ на́шихъ

⁹ и҆ сотвори́те во́лю є҆гѡ̀, и҆ ѿлѹчи́тесѧ ѿ ѩ҆зы҄къ земны́хъ и҆ ѿ же́нъ и҆ноплеме́нныхъ.

¹⁰ И҆ возопѝ всѐ мно́жество и҆ реко́ша гла́сомъ вели́кимъ: та́кѡ, ѩ҆́коже ре́клъ є҆сѝ, сотвори́мъ:

¹¹ но мно́жество вели́ко є҆́сть, и҆ вре́мѧ зи́мно, и҆ не мо́жемъ стоѧ́ти без̾ покро́ва, а҆ дѣ́ло нѣ́сть на́мъ є҆ди́нагѡ днѐ, ни двѹ̀, мно́гѡ бо въ си́хъ согрѣши́хомъ:

¹² да предста́нѹтъ же и҆ предводи́телїе наро́да, и҆ всѝ, и҆̀же съ на́ми ѡ҆бита́ютъ, є҆ли́цы и҆мѣ́ютъ же́нъ и҆ноплеме́нныхъ, да прїи́дѹтъ ѡ҆брѣ́тше вре́мѧ,

¹³ и҆ ѿ всѧ́кагѡ мѣ́ста старѣ҄йшины и҆ сѹдїи҄, до́ндеже разрѣши́тсѧ гнѣ́въ гд҇ень ѿ на́съ, дѣ́ла сегѡ̀.

¹⁴ Ї҆ѡнаѳа́съ сы́нъ а҆заи́левъ и҆ є҆зекі́а ѳѡканѹ́евъ сы́нъ прїѧ́ста по семѹ̀, и҆ месѹлла́мъ и҆ леѵі́съ и҆ савваті́й вкѹ́пѣ содѣ́йствоваша и҆́ма:

¹⁵ и҆ сотвори́ша по всемѹ̀ семѹ̀ бы́вшїи ѿ плѣне́нїѧ.

¹⁶ И҆ и҆збра̀ себѣ̀ є҆́здра свѧще́нникъ мѹ́жы нача́лники ѻ҆те́чествъ и҆́хъ всѣ́хъ по и҆́мени, и҆ сѣдо́ша вкѹ́пѣ въ новомч҇їи десѧ́тагѡ мц҇а и҆спыта́ти дѣ́ло то̀.

¹⁷ И҆ приведе́но бы́сть ко ѡ҆конча́нїю ѡ҆ мѹже́хъ, и҆̀же и҆мѧ́хѹ жєны̀ и҆ноплемє́нничи, да́же до новомч҇їѧ пе́рвагѡ мц҇а.

¹⁸ И҆ ѡ҆брѣто́шасѧ ѿ ї҆ере́євъ собра́вшїисѧ и҆мѹ́ще же́нъ и҆ноплеме́нничихъ:

¹⁹ ѿ сынѡ́въ ї҆исѹ́са сы́на ї҆ѡседе́кова и҆ бра́тїи є҆гѡ̀ маѳи́ла и҆ є҆леаза́ръ, и҆ ї҆ѡрі́въ и҆ ї҆ѡада́нъ,

²⁰ и҆ возложи́ша рѹ́ки, да и҆зго́нѧтъ жєны̀ своѧ҄, и҆ во ѹ҆милостивле́нїе ѻ҆вны̀ за невѣ́дѣнїе своѐ:

²¹ и҆ ѿ сынѡ́въ є҆мми́ровыхъ а҆нані́а и҆ завде́й, и҆ ї҆ани́нъ и҆ самі́а, и҆ ї҆ереи́лъ и҆ а҆зарі́а,

²² и҆ ѿ сынѡ́въ фесѹ́ровыхъ є҆лїѡна́съ, масі́а, ї҆сма́илъ и҆ наѳанаи́лъ, и҆ ѡ҆кїди́лъ и҆ сало́а:

²³ и҆ ѿ леѵї҄тъ ї҆ѡзава́дъ и҆ семе́й, и҆ кѡ́лїй (се́й є҆́сть калїта̀) и҆ фаѳе́й, и҆ ї҆ѹ́да и҆ ї҆ѡ́на:

²⁴ ѿ свѧщеннопѣвцє́въ є҆лїаѯѹ́ръ, вакхѹ́ръ:

²⁵ ѿ двє́рникъ саллѹ́мъ и҆ толва́нъ:

²⁶ ѿ ї҆и҃лѧ, ѿ сынѡ́въ форо́совыхъ ї҆ерма̀, ї҆едді́а и҆ мелхі́а, и҆ маи́лъ и҆ є҆леаза́ръ, и҆ а҆сїві́а и҆ ваане́а,

²⁷ ѿ сынѡ́въ и҆ла́евыхъ матѳані́а, заха́рїа и҆ ї҆ереи́лъ, и҆ ї҆еримѡ́ѳъ и҆ а҆иді́а,

²⁸ и҆ ѿ сынѡ́въ замѡ́ѳовыхъ є҆лїада̀, є҆лїсі́мъ, ѻ҆ѳоні́а, ї҆арїмѡ́ѳъ, сава́тъ и҆ сарде́й,

²⁹ и҆ ѿ сынѡ́въ вива́евыхъ ї҆ѡа́ннъ и҆ а҆нані́а, и҆ ї҆ѡзава́дъ и҆ є҆маѳі́й,

³⁰ ѿ сынѡ́въ мані́евыхъ ѻ҆ла́мъ, мамѹ́хъ, ї҆едде́й, ї҆асѹ́въ и҆ ї҆асаи́лъ и҆ ї҆еримѡ́ѳъ,

³¹ и҆ ѿ сынѡ́въ а҆дді́евыхъ нааѳі́й и҆ моосі́а, лакѹ́нъ и҆ наі́дъ, и҆ матѳані́а и҆ сесѳи́лъ, и҆ валнѹ́й и҆ манассі́а,

³² и҆ ѿ сынѡ́въ а҆на́нихъ є҆лїѡна̀ и҆ ї҆асе́й, и҆ мелхі́а и҆ савве́й и҆ сі́мѡнъ хосаме́й,

³³ и҆ ѿ сынѡ́въ а҆со́мовыхъ а҆лтане́й и҆ матѳі́й, и҆ ване́а и҆ є҆лїфала́тъ, и҆ манассі́а и҆ семе́й,

³⁴ и҆ ѿ сынѡ́въ ваані́иныхъ ї҆еремі́а, момді́й, ї҆смаи́ръ, ї҆ѹи́лъ, мавда́й и҆ педїа̀ и҆ а҆нѡ́съ, равасїѡ́нъ и҆ ї҆енасі́въ и҆ мамнїтанаі́мъ, є҆лїасі́й, ванѹ́й, є҆лїалі́й, самі́й, селемі́а, наѳані́а, и҆ ѿ сынѡ́въ ѻ҆зѡра́евыхъ сесі́й, є҆зрі́лъ, а҆заи́лъ, сама́тъ, замврі́й, ї҆ѡ́сифъ,

³⁵ и҆ ѿ сынѡ́въ є҆́ѳмы мазїті́а, завадаі́а, и҆даі́й, ї҆ѹи́лъ, ване́а:

³⁶ всѝ сі́и поѧ́ша себѣ̀ жєны̀ и҆ноплемє́нничи и҆ ѿпѹсти́ша и҆̀хъ со ча́ды.

³⁷ И҆ всели́шасѧ свѧще́нницы и҆ леѵі́ти, и҆ и҆̀же (бѧ́хѹ) ѿ ї҆и҃лѧ во ї҆ер҇ли́мѣ и҆ во странѣ̀, въ новомч҇їи седма́гѡ мц҇а, и҆ сы́нове ї҆и҃лєвы во ѡ҆би́телехъ свои́хъ.

³⁸ И҆ собра́сѧ всѐ мно́жество є҆динодѹ́шнѡ на простра́нство, є҆́же ко восто́кѹ вра́тъ свѧще́нныхъ,

³⁹ и҆ реко́ша є҆́здрѣ а҆рхїере́ю и҆ чтецѹ̀, да принесе́тъ зако́нъ мѡѷсе́овъ, пре́данный ѿ гд҇а бг҃а ї҆и҃лева.

⁴⁰ И҆ принесѐ є҆́здра а҆рхїере́й зако́нъ всемѹ̀ мно́жествѹ, ѿ мѹ́жа да́же до жены̀, и҆ всѣ҄мъ свѧще́нникѡмъ слы́шати зако́нъ въ новомч҇їи седма́гѡ мц҇а,

⁴¹ и҆ чтѧ́ше на простра́нствѣ, є҆́же пред̾ свѧще́нными враты̀ церко́вными, ѿ ѹ҆́тра да́же до полѹ́дне пред̾ мѹжми́ же и҆ жена́ми: и҆ да́ша всѐ мно́жество чѹ҄вства въ зако́нъ.

⁴² И҆ ста̀ є҆́здра свѧще́нникъ и҆ чте́цъ зако́на на древѧ́нѣмъ а҆мвѡ́нѣ, и҆́же содѣ́ланъ бы́сть:

⁴³ и҆ ста́ша при не́мъ маттаѳі́а, самѹ́й, а҆нані́а, а҆зарі́а, ѹ҆рі́а, є҆зекі́а, валаса́мъ ѡ҆деснѹ́ю,

⁴⁴ ѡ҆шѹ́юю же фалде́й и҆ мїсаи́лъ, мелхі́а, а҆ѡѳасѹ́въ, наварі́а, заха́рїа.

⁴⁵ И҆ взе́мъ є҆́здра кни́гѹ зако́на пред̾ всѣ́мъ мно́жествомъ, предсѣдѧ́ше бо во сла́вѣ пред̾ всѣ́ми,

⁴⁶ и҆ є҆гда̀ толкова́ше зако́нъ, всѝ прѧ́мѡ стоѧ́хѹ. И҆ благословѝ є҆́здра гд҇а бг҃а вы́шнѧго, бг҃а саваѡ́ѳа вседержи́телѧ.

⁴⁷ И҆ возгласѝ ве́сь наро́дъ: а҆ми́нь. И҆ воздви́гше горѣ̀ рѹ́ки и҆ припа́дше на зе́млю, поклони́шасѧ гд҇ѹ.

⁴⁸ Ї҆исѹ́съ и҆ а҆нѹ́й, и҆ сараві́а и҆ ї҆аді́нъ и҆ ї҆акѹ́въ, саваті́а, а҆ѵте́й, меане́й и҆ калїта̀, а҆зарі́а и҆ ї҆ѡза́вдъ, и҆ а҆нані́а и҆ вїата̀, леѵі́ти, ѹ҆ча́хѹ зако́нѹ гд҇ню и҆ ко мно́жествѹ чтѧ́хѹ зако́нъ гд҇ень, внѹша́юще кѹ́пнѡ чте́нїе.

⁴⁹ И҆ речѐ а҆тѳара́тъ є҆́здрѣ а҆рхїере́ю и҆ чтецѹ̀, и҆ леѵі́тѡмъ, и҆̀же ѹ҆ча́хѹ мно́жество, глаго́лѧ:

⁵⁰ де́нь се́й ст҃ъ є҆́сть гд҇ѹ, и҆ всѝ пла́кахѹ, є҆гда̀ слы́шахѹ зако́нъ. (И҆ речѐ є҆́здра:)

⁵¹ ше́дше ѹ҆̀бо ѩ҆ди́те тѹ҄чнаѧ и҆ пі́йте сла҄дкаѧ и҆ посли́те неимѹ́щымъ:

⁵² ст҃ъ бо де́нь гд҇ень, и҆ не скорби́те, гд҇ь бо просла́витъ ва́съ.

⁵³ И҆ леѵі́ти повелѣ́ша всемѹ̀ со́нмѹ, глаго́люще: де́нь се́й ст҃ъ гд҇еви, не скорби́те.

⁵⁴ И҆ и҆до́ша всѝ ѩ҆́сти и҆ пи́ти и҆ весели́тисѧ и҆ да́ти неимѹ́щымъ, да ра́дѹютсѧ (ѕѣлѡ̀) мно́гѡ:

⁵⁵ є҆ще́ бо содержа́ша словеса̀, и҆̀мже наѹчи́шасѧ, и҆ собра́шасѧ.

Нашли в тексте ошибку? Выделите её и нажмите: Ctrl + Enter

Вторая книга Ездры, 9 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

2 Ездры 9 2-я Ездры 9 глава