1 Тогда̀ сїсі́ннїй є҆па́рхъ кїлисѷрі́йскїй и҆ фїнїкі́йскїй, и҆ саѳравѹза́нъ, и҆ дрѹ́зїе, послѣ́дѹюще ѿ да́рїа царѧ̀ повелѣ́нїемъ,
2 настоѧ́хѹ свѧщє́ннымъ дѣлѡ́мъ, прилѣ́жнѣе содѣ́йствѹюще старѣ́йшинамъ ї҆ѹде́євъ и҆ свѧщеннонача́лникѡмъ:
3 и҆ благопоспѣ҄шна бѧ́хѹ свѧщє́ннаѧ дѣла̀, прорица́ющымъ а҆гге́ю и҆ заха́рїи про҇ро́комъ.
4 И҆ соверши́ша сїѧ҄ по за́повѣди гд҇а бг҃а ї҆и҃лева и҆ съ повелѣ́нїемъ кѵ́ра и҆ да́рїа и҆ а҆ртаѯе́рѯа царе́й пе́рсскихъ:
5 и҆ соверше́нъ бы́сть до́мъ ст҃ы́й да́же до тре́тїѧгѡ и҆ двадесѧ́тагѡ днѐ мц҇а а҆да́ра, шеста́гѡ лѣ́та да́рїа царѧ̀.
6 И҆ сотвори́ша сы́нове ї҆и҃лєвы и҆ свѧще́нницы и҆ леѵі́ти и҆ про́чїи, и҆̀же бѧ́хѹ ѿ плѣне́нїѧ, приста́вленнїи, по напи҄саннымъ въ кни́зѣ мѡѷсе́овѣ,
7 и҆ принесо́ша во ѡ҆бновле́нїе свѧти́лища гд҇нѧ ю҆нцє́въ сто̀ ѻ҆внѡ́въ двѣ́сти, а҆́гнцєвъ четы́ре ста҄,
8 козлѡ́въ за грѣхѝ всегѡ̀ ї҆и҃лѧ двана́десѧть по числѹ̀, ѿ племенонача́лникѡвъ ї҆и҃левыхъ двана́десѧти.
9 И҆ ста́ша свѧще́нницы и҆ леѵі́ти по племенѡ́мъ ѡ҆дѣ́ѧни въ ри҄зы, над̾ дѣ́лы гд҇а бг҃а ї҆и҃лева, по кни́зѣ мѡѷсе́овѣ, и҆ вра҄тари над̾ кі́имиждо две́рми,
10 И҆ содѣ́ѧша сы́нове ї҆и҃левы съ сѹ́щими ѿ плѣне́нїѧ па́схѹ въ четвертыйна́десѧть де́нь пе́рвагѡ мц҇а, є҆гда̀ ѡ҆свѧти́шасѧ свѧще́нницы и҆ леѵі́ти.
11 Вси́ же сы́нове плѣне́нїѧ не вкѹ́пѣ ѡ҆чи́стишасѧ, поне́же леѵі́ти всѝ вкѹ́пѣ ѡ҆чи́стишасѧ
12 и҆ пожро́ша па́схѹ всѣ҄мъ сыновѡ́мъ плѣне́нїѧ и҆ бра́тїѧмъ и҆́хъ свѧще́нникѡмъ и҆ себѣ̀ са́ми.
13 И҆ ѩ҆до́ша сы́нове ї҆и҃лє́вы, и҆̀же ѿ плѣне́нїѧ, всѝ ѿлѹчи́вшїисѧ ѿ ме́рзостей ѩ҆зы́кѡвъ землѝ, и҆́щѹще гд҇а,
14 и҆ пра́здноваша пра́здникъ ѡ҆прѣсно́кѡвъ се́дмь дні́й, веселѧ́щесѧ пред̾ гд҇емъ,
15 поне́же ѡ҆братѝ совѣ́тъ царѧ̀ а҆ссѷрі́йскагѡ къ ни҄мъ, є҆́же ѹ҆крѣпи́ти рѹ́ки и҆́хъ на дѣла̀ гд҇а бг҃а ї҆и҃лева.
Нашли в тексте ошибку? Выделите её и нажмите: Ctrl + Enter

Вторая книга Ездры, 7 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.