Кажеть Апостолъ, яко не во высокословіи, сего мира навчалъ ест Коринфянъ • Но во простости дабы духовная поразумели •
1 И азъ пришедый къ вамъ братия, не придохъ во высокоумне словеси, или премудрости • Возвещая вамъ сведетелство Божие •
2 Ни судих же себе что ведети посреди васъ, толико Ісуса Христа, и Сего распята •
3 И пребых у васъ в немощи, и въ страсе, и въ трепете мнозе •
4 И слово мое, и проповедь моя бе, не во препирателных человеческия мудрости словех, но во явленіи духа и силы •
5 Да вера ваша не во мудрости человечестей будет, но в силе Божией •
6 Премудрость же глаголемъ во совершеных, и премудрость не века сего • Ни князей мира сего престающих •
7 Но глаголемъ Божію премудрость во тайне сокровенну, юже пронарече Богъ прежде векъ во славу нашу •
8 Еяже князи века сего не разумели никтоже, аще бо были разумели, не быша Господа славе распяли •
9 Но якоже естъ писано:
Іхъже око не виде, и ухо не слыша, и на серце человеку не возыде, еже уготова Богъ любящимъ Его •
10 Нам же открил естъ Богъ Духомъ Своимъ • Духъ бо вся испытуеть, к тому и глубины Божия •
11 Кто убо весть от человекъ, яже суть во человеце? Толико духъ человечій иже ест в немъ • Такожъ и тая яже суть Божия никтоже весть, точию Духъ Божій •
12 Мы пакъ не духъ мира приахом, но духъ иже от Бога • Да знаемъ яже суть от Бога дарованая намъ •
13 О нихже и глаголемъ, не во навченіи человеческое премудрости словехъ, но во навченіи Духа Свята • Духовнымъ людем духовная подавающе •
14 Телесный убо человек не приемлет тых яже суть от Духа Божия • Юродство бо ему ест, и не можеть разумети того еже духовне разсужается •
15 Духовный пакъ разсужаеть вся, и сам ни от единого осуженъ бываеть •
16 Кто убо разуме умъ Господень, или кто навчить и? Мы же умъ Христовъ имамы •
