1 Молю́ убо вас, аз ю́зник о Го́споде, досто́йно ходи́ти зва́ния, в не́же зва́ни бы́сте,
2 Со вся́ким смиреному́дрием и кро́тостию, с долготерпе́нием, терпя́ще друг дру́гу любо́вию,
3 Тща́щеся блюсти́ едине́ние ду́ха в сою́зе ми́ра.
4 Еди́но те́ло, еди́н дух, я́коже и зва́ни бы́сте во еди́ном упова́нии зва́ния ва́шего.
5 Еди́н Госпо́дь, еди́на ве́ра, еди́но креще́ние,
6 Еди́н Бог и Оте́ц всех, И́же над все́ми и чрез всех и во всех нас.
7 Еди́ному же кому́ждо нас даде́ся благода́ть по ме́ре дарова́ния Христо́ва.
8 Те́мже глаго́лет: возше́д на высоту́, плени́л еси́ плен, и даде́ дая́ния челове́ком.
9 А е́же взы́де, что есть, то́чию я́ко и сни́де пре́жде в до́льнейшия страны́ земли́?
10 Сше́дый, Той есть и возше́дый превы́ше всех небе́с, да испо́лнит вся́ческая.
11 И Той дал есть о́вы у́бо апо́столы, о́вы же проро́ки, о́вы же Благове́стники, о́вы же па́стыри и учи́тели,
12 К соверше́нию святы́х, в де́ло служе́ния, в созида́ние Те́ла Христо́ва,
13 До́ндеже дости́гнем вси во едине́ние ве́ры и позна́ния Сы́на Бо́жия, в му́жа соверше́нна, в ме́ру во́зраста исполне́ния Христо́ва.
14 Да не быва́ем ктому́ младе́нцы, вла́ющеся и скита́ющеся вся́ким ве́тром уче́ния, во лжи челове́честей, в кова́рстве ко́зней льще́ния.
15 И́стинствующе же в любви́, да возрасти́м в Него́ вся́ческая, И́же есть глава́ Христо́с,
16 Из Него́же все те́ло, составля́емо и счинева́емо прили́чне вся́цем осяза́нием подая́ния, по де́йству в ме́ре еди́ныя коея́ждо ча́сти, возраще́ние те́ла твори́т в созда́ние сама́го себе́ любо́вию.
17 Сие́ у́бо глаго́лю и послушеству́ю о Го́споде, ктому́ не ходи́ти вам, я́коже и про́чии язы́цы хо́дят в суете́ ума́ их,
18 Помраче́ни смы́слом, су́ще отчужде́ни от жи́зни Бо́жия, за неве́жество су́щее в них, за окамене́ние серде́ц их,
19 И́же в неча́яние вло́жшеся, преда́ша себе́ студодея́нию, в де́лание вся́кия нечистоты́ в лихоима́нии.
20 Вы же не та́ко позна́сте Христа́.
21 А́ще у́бо {поне́же}слы́шасте Его́ и о Нем научи́стеся, я́коже есть и́стина о Иису́се:
22 Отложи́ти вам, по пе́рвому житию́, ве́тхаго челове́ка, тле́ющаго в по́хотех преле́стных,
23 Обновля́тися же ду́хом ума́ ва́шего,
24 И облещи́ся в но́ваго челове́ка, созда́ннаго по Бо́гу в пра́вде и в преподо́бии и́стины.
25 Те́мже отло́жше лжу, глаго́лите и́стину ки́йждо ко и́скреннему своему́, зане́ есмы́ друг дру́гу у́дове.
26 Гне́вайтеся и не согреша́йте, со́лнце да не за́йдет в гне́ве ва́шем,
27 Ниже́ дади́те ме́ста диа́волу.
28 Крады́й ктому́ да не кра́дет, но па́че да тружда́ется, де́лая свои́ма рука́ма благо́е, да и́мать подая́ти тре́бующему.
29 Вся́ко сло́во гни́ло да не исхо́дит из уст ва́ших, но то́чию е́же есть бла́го к созда́нию ве́ры, да даст благода́ть слы́шащим.
30 И не оскорбля́йте Ду́ха Свята́го Бо́жия, о Не́мже зна́менастеся в день избавле́ния.
31 Вся́ка го́ресть, и гнев, и я́рость, и кличь, и хула́ да во́змется от вас, со вся́кою зло́бою.
32 Быва́йте же друг ко дру́гу бла́зи, милосе́рди, проща́юще друг дру́гу, я́коже и Бог во Христе́ прости́л есть вам.
