1 И вас су́щих прегреше́ньми ме́ртвых и грехи́ ва́шими.
2 В ни́хже иногда́ ходи́сте по ве́ку міра сего́, по кня́зю вла́сти возду́шныя, ду́ха, и́же ны́не де́йствует в сыне́х противле́ния.
3 В ни́хже и мы вси жи́хом иногда́ в по́хотех пло́ти на́шея, творя́ще во́лю пло́ти и помышле́ний, и бе́хом естество́м ча́да гне́ва, я́коже и про́чии.
4 Бог же, бога́т сый в ми́лости, за премно́гую любо́вь Свою́, е́юже возлюби́ нас,
5 И су́щих нас ме́ртвых прегреше́ньми, сооживи́ Христо́м, [благода́тию есте́ спасе́ни,]
6 И с Ним воскреси́, и спосади́ на небе́сных во Христе́ Иису́се
7 Да яви́т в ве́цех гряду́щих презе́льное бога́тство благода́ти Своея́ благосты́нею на нас о Христе́ Иису́се.
8 Благода́тию бо есте́ спасе́ни чрез ве́ру, [и сие́ не от вас, Бо́жий дар,]
9 Не от дел, да никто́же похва́лится.
10 Того́ бо есмы́ творе́ние, созда́ни во Христе́ Иису́се на дела́ блага́я, я́же пре́жде угото́ва Бог, да в них хо́дим.
11 Те́мже помина́йте, я́ко вы, и́же иногда́ язы́цы во плоти́, глаго́лемии необре́зание от реко́маго обре́зания во плоти́, рукотворе́ннаго,
12 Я́ко бе́сте во вре́мя о́но без Христа́, отчужде́ни жития́ Изра́илева и чу́жди от заве́т обетова́ния, упова́ния не иму́ще и безбо́жни в міре.
13 Ны́не же о Христе́ Иису́се, вы бы́вшии иногда́ дале́че, близ бы́сте Кро́вию Христо́вою.
14 То́й бо есть мир наш, сотвори́вый обоя́ еди́но, и средосте́ние огра́ды разори́вый, вражду́ Пло́тию Свое́ю,
15 Зако́н за́поведей уче́ньми упраздни́в, да о́ба сози́ждет Собо́ю во еди́наго но́ваго челове́ка, творя́ мир,
16 И примири́т обои́х во еди́ном те́ле Бо́гови кресто́м, уби́в вражду́ на нем.
17 И прише́д благовести́ мир вам, да́льним и бли́жним,
18 Зане́ Тем и́мамы приведе́ние о́бои во еди́ном Ду́се ко Отцу́.
19 Те́мже у́бо ктому́ не́сте стра́нни и прише́льцы, но сожи́теле святы́м и при́снии Бо́гу,
20 Назда́ни бы́вше на основа́нии Апо́стол и проро́к, су́щу краеуго́льну Самому́ Иису́су Христу́,
21 О Не́мже вся́ко созда́ние составля́емо расте́т в це́рковь святу́ю о Го́споде,
22 О Не́мже и вы созида́етеся в жили́ще Бо́жие Ду́хом.
