1 И҆ сынѡ́мъ а҆арѡ҄нимъ раздѣлє́нїѧ: сы́нове а҆арѡ҄ни: нада́въ и҆ а҆вїѹ́дъ, и҆ є҆леаза́ръ и҆ ї҆ѳама́ръ.
2 И҆ ѹ҆мро́ста нада́въ и҆ а҆вїѹ́дъ пре́жде ѻ҆тца̀ своегѡ̀, и҆ сы́нове не бы́ша и҆́ма: и҆ свѧще́нствова є҆леаза́ръ и҆ ї҆ѳама́ръ, сы́нове а҆арѡ҄ни.
3 И҆ раздѣлѝ и҆̀хъ даві́дъ, и҆ садѡ́къ ѿ сынѡ́въ є҆леаза́ровыхъ, а҆хїмеле́хъ же ѿ сынѡ́въ ї҆ѳама́ровыхъ по сочисле́нїю и҆́хъ, по слѹже́нїю и҆́хъ и҆ по домѡ́мъ ѻ҆те́чествъ и҆́хъ.
4 И҆ ѡ҆брѣто́шасѧ сы́нове є҆леаза́рѡвы мно́жайшїи въ нача́лники си́лъ, не́жели сы́нове ї҆ѳама́рѡвы: и҆ раздѣлѝ и҆̀хъ сынѡ́мъ є҆леаза́рѡвымъ въ нача́лники въ до́мы ѻ҆те́чествъ шестьна́десѧть, и҆ сынѡ́мъ ї҆ѳама́рѡвымъ по домѡ́мъ ѻ҆те́чествъ и҆́хъ, ѻ҆́смь.
5 Раздѣли́ же и҆̀хъ по жре́бїємъ междѹ̀ и҆́ми, поне́же бѧ́хѹ нача҄лницы свѧти́лища и҆ нача҄лницы бж҃їи въ сынѣ́хъ є҆леаза́ровыхъ и҆ въ сынѣ́хъ ї҆ѳама́ровыхъ:
6 ѡ҆писа́ же и҆̀хъ самаі́а сы́нъ наѳанаи́ль пи́сарь ѿ леѵї҄тъ пред̾ царе́мъ и҆ кнѧ҄зи и҆ садѡ́комъ свѧще́нникомъ и҆ а҆хїмеле́хомъ сы́номъ а҆вїаѳа́ра, и҆ нача҄лницы ѻ҆те́чествъ свѧще́нникѡвъ и҆ леѵі́тѡвъ до́мѹ ѻ҆те́чества, є҆ди́нъ ко є҆леаза́рѹ и҆ є҆ди́нъ ко ї҆ѳама́рѹ.
7 И҆ и҆зы́де жре́бїй пе́рвый ї҆ѡарі́мѹ, ї҆еді́ю вторы́й,
8 харі́вѹ тре́тїй, сеѡрі́мѹ четве́ртый,
9 мелхі́ю пѧ́тый, меїамі́нѹ шесты́й,
10 а҆ккѡ́сѹ седмы́й, а҆ві́и ѻ҆смы́й,
11 ї҆исѹ́ю девѧ́тый, сехені́и десѧ́тый,
12 є҆лїасі́вѹ є҆динонадесѧ́тый, ї҆акі́мѹ дванадесѧ́тый,
13 ѻ҆ффа́ю тринадесѧ́тый, ї҆есваа́лѹ четыренадесѧ́тый,
14 велгі́и пѧтыйна́десѧть, є҆мми́рѹ шестыйна́десѧть,
15 ї҆еѳі́ю седмыйна́десѧть, а҆фессі́ю ѻ҆смыйна́десѧть,
16 фетті́ю девѧтыйна́десѧть, и҆ є҆зекі́илю двадесѧ́тый,
17 а҆хі́нѹ два́десѧть пе́рвый, гамѹи́лѹ два́десѧть вторы́й,
18 далеі́ю два́десѧть тре́тїй, ї҆еи́лю два́десѧть четве́ртый.
19 Сїѐ сочисле́нїе и҆́хъ по слѹже́нїю и҆́хъ входи́ти въ до́мъ гд҇ень по чи́нѹ своемѹ̀, рѹко́ю а҆арѡ́на ѻ҆тца̀ и҆́хъ, ѩ҆́коже повелѣ̀ гд҇ь бг҃ъ ї҆и҃левъ.
20 И҆ сынѡ́мъ леѵї҄инымъ прѡ́чїимъ: сынѡ́мъ а҆мвра҄млимъ сѡваи́лъ, сынѡ́мъ сѡваи҄лимъ ї҆адаі́а,
21 сынѡ́мъ равї҄инымъ нача́лникъ ї҆есі́а,
22 сынѡ́мъ ї҆асарї҄инымъ салѡмѡ́ѳъ, сынѡ́мъ салѡмѡ́ѳѡвымъ ї҆а́ѳъ:
23 сы́нове ї҆едїѹ́а: ї҆ерїа́въ пе́рвый, а҆маді́а вторы́й, ї҆азїи́лъ тре́тїй, ї҆екмоа́мъ четве́ртый.
24 Сынѡ́мъ ѻ҆зїи҄лимъ мі́ха, сы́нове мї҄хины сами́ръ:
25 бра́тъ мі́хинъ ї҆сі́а, сы́нъ ї҆сі́инъ заха́рїа.
26 Сы́нове мера҄рїны: моолї̀ и҆ мѹсї̀, сы́нъ ѻ҆зі́инъ вонні́й:
27 сы́нове мера҄рїны ѻ҆зі́а: сы́нове є҆гѡ̀ ї҆есома̀ и҆ закхѹ́ръ и҆ ї҆ѡвѳї̀:
28 моолі́ю є҆леаза́ръ (и҆ ї҆ѳама́ръ). Ѹ҆́мре же є҆леаза́ръ, не бѣ́ша є҆мѹ̀ сы́нове.
29 Кі́сѹ сы́нъ кі́совъ ї҆ерамеи́лъ.
30 Сы́нове мѹ҄сїны: моолї̀ и҆ є҆де́ръ и҆ є҆рїмѡ́ѳъ. Сі́и сы́нове леѵі́тстїи по домѡ́мъ ѻ҆те́чествъ свои́хъ.
31 Прїѧ́ша же и҆ ті́и жрє́бїѧ, ѩ҆́коже и҆ бра́тїѧ и҆́хъ сы́нове а҆арѡ҄ни, пред̾ даві́домъ царе́мъ и҆ садѡ́комъ и҆ а҆хїмеле́хомъ и҆ нача҄лники ѻ҆те́чествъ свѧще́нническихъ и҆ леѵі́тскихъ: патрїа́рси а҆арѡ҄ни, ѩ҆́коже и҆ бра́тїѧ є҆гѡ̀ ю҆нѣ́йшїи.
Нашли в тексте ошибку? Выделите её и нажмите:
Ctrl + Enter
Первая книга Паралипоменон, 24 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784