1 И҆ всели́шасѧ нача҄лницы люді́й во ї҆ер҇ли́мѣ, и҆ про́чїи лю́дїе метнѹ́ша жрє́бїѧ взѧ́ти є҆ди́наго ѿ десѧтѝ, да пребыва́етъ во ї҆ер҇ли́мѣ гра́дѣ свѧтѣ́мъ, и҆ де́вѧть часте́й во градѣ́хъ.
2 И҆ благослови́ша лю́дїе всѣ́хъ мѹже́й, и҆̀же са́ми произво́лиша ѡ҆бита́ти во ї҆ер҇ли́мѣ.
3 И҆ сі́и нача҄лницы страны̀, и҆̀же ѡ҆бита́ша во ї҆ер҇ли́мѣ: и҆ во градѣ́хъ ї҆ѹ́диныхъ ѡ҆бита́ше кі́йждо во ѡ҆держа́нїи свое́мъ, во градѣ́хъ свои́хъ ї҆и҃левыхъ, свѧще́нницы и҆ леѵі́ти, и҆ наѳїне́є и҆ сы́нове рабѡ́въ соломѡ́новыхъ.
4 И҆ во ї҆ер҇ли́мѣ ѡ҆бита́ша ѿ сынѡ́въ ї҆ѹ́диныхъ и҆ ѿ сынѡ́въ венїамі́нихъ. Ѿ сынѡ́въ ї҆ѹ́диныхъ а҆ѳаі́а сы́нъ ѻ҆зі́инъ, сы́нъ заха́рїинъ, сы́нъ самарі́инъ, сы́нъ сафаті́евъ, сы́нъ масеи́ль и҆ ѿ сынѡ́въ фаре́совыхъ,
5 и҆ маасі́а, сы́нъ варѹ́ховъ, сы́нъ хала́зовъ, сы́нъ ѻ҆зі́евъ, сы́нъ а҆даі́евъ, сы́нъ ї҆ѡарі́вль, сы́нъ заха́рїевъ, сы́нъ силѡні́евъ:
6 всѝ сы́нове фаре́сѡвы, и҆̀же ѡ҆бита́ша во ї҆ер҇ли́мѣ, четы́реста шестьдесѧ́тъ ѻ҆́смь мѹ́жїе крѣ́пцы.
7 Сі́и же сы́нове венїамї҄ни: силѡ́нъ сы́нъ месѹла́евъ, сы́нъ ї҆ѡа́довъ, сы́нъ фадаі́евъ, сы́нъ кѡлі́евъ, сы́нъ маасі́евъ, сы́нъ є҆ѳїи́ль, сы́нъ ї҆ессі́евъ,
8 и҆ по не́мъ гевеи́лъ, силі́евъ, де́вѧть сѡ́тъ два́десѧть ѻ҆́смь.
9 И҆ ї҆ѡи́ль сы́нъ зехрі́нъ настоѧ́тель над̾ ни́ми, и҆ ї҆ѹ́да сы́нъ а҆сана́евъ, ѿ гра́да, вторы́й.
10 Ѿ свѧще́нникѡвъ: и҆ ї҆аді́а сы́нъ ї҆ѡарі́вль, ї҆ахі́нь,
11 саре́а сы́нъ є҆лхі́евъ, сы́нъ месѹла́мовъ, сы́нъ саддѹ́ковъ, сы́нъ марїѡ́ѳовъ, сы́нъ є҆тѡ́ѳовъ, нача́лникъ до́мѹ бж҃їѧ,
12 и҆ бра́тїѧ и҆́хъ дѣ́лающе дѣ́ло це́ркве ѻ҆́смь сѡ́тъ два́десѧть два̀: и҆ а҆даі́а сы́нъ ї҆ероа́мль, сы́на фалалі́ина, сы́на нама́сова, сы́на заха́рїина, сы́на фасеѳѹ́рова, сы́на мелхі́ина,
13 и҆ бра́тїѧ є҆гѡ̀ нача҄лницы ѻ҆те́чествъ двѣ́сти четы́редесѧть два̀: и҆ а҆меса́й сы́нъ є҆зрїи́ль, сы́на сакхі́ева, сы́на масарїмѡ́ѳова, сы́на є҆мми́рова,
14 и҆ бра́тїѧ є҆гѡ̀ си́льнїи во бра́нехъ сто̀ два́десѧть ѻ҆́смь: и҆ настоѧ́тель и҆́хъ сохрїи́лъ, сы́нъ вели́кихъ.
15 И҆ ѿ леѵї҄тъ: самаі́а сы́нъ а҆сѹ́ва, сы́на є҆зрїка́ма, сы́на а҆саві́и, сы́на во́нни,
16 и҆ савваѳе́й, и҆ ї҆ѡсава́дъ над̾ дѣла́ми до́мѹ бж҃їѧ внѣ́шнѧгѡ и҆ ѿ нача́лникѡвъ леѵі́тскихъ,
17 и҆ матѳані́а, сы́нъ мїха́евъ, сы́нъ зехрі́евъ, сы́на а҆са́фова, нача́лникъ хвале́нїѧ, и҆ ї҆ѹ́да моли́твы, и҆ вокхі́а вторы́й ѿ бра́тїй свои́хъ, и҆ а҆вді́а сы́нъ саме́а сы́на гале́лова, сы́на ї҆дїѳѹ́нова:
18 всѣ́хъ леѵі́тѡвъ во гра́дѣ свѧтѣ́мъ двѣ́сти ѻ҆́смьдесѧтъ четы́ре.
19 И҆ двє́рницы: а҆кѹ́въ, теламі́нъ и҆ бра́тїѧ и҆́хъ, стрегѹ́щїи вра́тъ, сто̀ се́дмьдесѧтъ два̀.
20 Про́чїи же ѿ ї҆и҃лѧ ї҆ере́є же и҆ леѵі́ти во всѣ́хъ градѣ́хъ ї҆ѹде́и кі́йждо въ наслѣ́дїи свое́мъ.
21 И҆ наѳїне́є, и҆̀же ѡ҆бита́ша во ѻ҆флѣ̀, сїа́й и҆ ге́сфъ ѿ наѳїне́євъ.
22 И҆ нача́лникъ леѵі́тѡвъ во ї҆ер҇ли́мѣ ѻ҆зі́й сы́нъ вані́инъ сы́на саві́ева, сы́на матѳані́ева, сы́на мїха́ева, ѿ сынѡ́въ а҆са́фовыхъ пою́щихъ над̾ дѣ́ломъ до́мѹ бж҃їѧ,
23 ѩ҆́кѡ за́повѣдь царе́ва (бѣ̀) и҆̀мъ: и҆ пребыва́ше вѣ́рнѡ над̾ пѣвца́ми ѡ҆бро́къ коегѡ́ждо днѐ въ де́нь сво́й.
24 И҆ фаѳе́а, сы́нъ массизави́ловъ ѿ сынѡ́въ за́риныхъ, сы́на ї҆ѹ́дина, при рѹцѣ̀ царе́вѣ всѧ́кїѧ потре́бы ра́ди люді́й.
25 И҆ при дворѣ́хъ, и҆̀же на се́лѣхъ и҆́хъ: и҆ ѿ сынѡ́въ ї҆ѹ́диныхъ ѡ҆бита́ша въ карїаѳарво́цѣ и҆ въ се́лѣхъ є҆гѡ̀, и҆ въ девѡ́нѣ и҆ въ се́лѣхъ є҆гѡ̀, и҆ въ каѳсеи́лѣ и҆ въ се́лѣхъ є҆гѡ̀,
26 и҆ во ї҆исѹ́сѣ, и҆ въ мѡла́дѣ, и҆ въ веѳфала́тѣ,
27 и҆ во а҆серсѡа́лѣ, и҆ въ вирсаве́и и҆ въ се́лѣхъ є҆ѧ̀,
28 и҆ въ секела́гѣ, и҆ ма́внѣ и҆ въ се́лѣхъ є҆ѧ̀,
29 и҆ въ ремао́нѣ, и҆ въ са́рѣ, и҆ во ї҆ерїмѹ́ѳѣ,
30 и҆ въ занно́и, и҆ во ѻ҆долла́мѣ и҆ въ се́лѣхъ и҆́хъ, и҆ въ лахі́сѣ и҆ въ се́лѣхъ є҆гѡ̀, и҆ во а҆зи́кѣ и҆ въ се́лѣхъ є҆ѧ̀: и҆ ѡ҆полчи́шасѧ въ вирсаве́и да́же до де́бри є҆ннѡ́нъ.
31 И҆ сы́нове венїамї҄ни ѿ гаваѝ и҆ магма́са и҆ веѳи́лѧ и҆ ѿ ве́сей є҆гѡ̀,
32 и҆ во а҆наѳѡ́ѳѣ, въ но́вѣ, во а҆ні́и,
33 во а҆сѡ́рѣ, въ рамѣ̀, въ геѳаи́мѣ,
34 въ а҆до́дѣ, въ севои́мѣ, въ навала́тѣ,
35 въ лі́ддѣ и҆ во ѻ҆нѡгїарасі́мъ.
36 И҆ ѿ леѵі́тѡвъ ча҄сти ї҆ѹ҄дины и҆ венїамї҄ни.
Нашли в тексте ошибку? Выделите её и нажмите: Ctrl + Enter

Книга Неемии, 11 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.