Библия » Елизаветинская Елизаветинская Библия

1 Маккавейская 16 1-я Маккавейская 16 глава

1 И҆ взы́де ї҆ѡа́ннъ ѿ газа́рѡвъ и҆ возвѣстѝ сі́мѡнѹ ѻ҆тцѹ̀ своемѹ̀, ѩ҆̀же сотворѝ кендеве́й.
2 И҆ призва̀ сі́мѡнъ два̀ сы́ны своѧ҄ старѣ́йшыѧ ї҆ѹ́дѹ и҆ ї҆ѡа́нна и҆ речѐ и҆́ма: а҆́зъ и҆ бра́тїѧ моѧ҄ и҆ до́мъ ѻ҆тца̀ моегѡ̀ побора́хомъ врагѝ ї҆и҃лєвы ѿ ю҆́ности да́же и҆ до сегѡ̀ днѐ, и҆ благопоспѣ́шествовасѧ въ рѹка́хъ на́шихъ и҆зба́вити ї҆и҃лѧ мно́гащи:
3 нн҃ѣ же состарѣ́хсѧ и҆ вы̀ мл҇тїю (бг҃а) дово́лни є҆стѐ въ лѣ́тѣхъ: бѹ́дите вмѣ́стѡ менє̀ и҆ бра́та моегѡ̀, и҆ и҆зше́дше побо́рствѹйте за ѩ҆зы́къ на́шъ, по́мощь же съ нб҃сѐ съ ва́ма да бѹ́детъ.
4 И҆ и҆збра̀ ѿ страны̀ два́десѧть ты́сѧщъ мѹже́й вое́нныхъ и҆ ко́нникѡвъ, и҆ и҆до́ша на кендеве́а и҆ ѡ҆бнощева́ша въ мѡди́нѣ.
5 И҆ воста́вше заѹ́тра и҆до́ша на по́ле, и҆ сѐ, си́ла ве́лїѧ во срѣ́тенїе и҆̀мъ, пѣ́шаѧ и҆ ко́ннаѧ, и҆ бѣ̀ пото́къ средѣ̀ и҆́хъ.
6 И҆ ѡ҆полчи́сѧ проти́вѹ лица̀ и҆́хъ са́мъ и҆ лю́дїе є҆гѡ̀: и҆ ви́дѣ лю́ди боѧ́щыѧсѧ прейтѝ пото́къ и҆ пре́йде пе́рвый, и҆ ви́дѣша є҆го̀ мѹ́жїе и҆ преидо́ша в̾слѣ́дъ є҆гѡ̀.
7 И҆ раздѣлѝ люді́й и҆ ко́нникѡвъ посредѣ̀ пѣ́шихъ: кѡ́нницы же врагѡ́въ мно́зи ѕѣлѡ̀.
8 И҆ вострѹби́ша трѹба́ми, и҆ побѣжде́нъ бы́сть кендеве́й и҆ по́лкъ є҆гѡ̀, и҆ падо́ша ѿ ни́хъ ѩ҆́звени мно́зи: про́чїи же бѣго́ша въ тверды́ню.
9 Тогда̀ ѹ҆ѧ́звенъ бы́сть ї҆ѹ́да бра́тъ ї҆ѡа́нновъ: ї҆ѡа́ннъ же гна̀ и҆̀хъ, до́ндеже прїи́де въ кедрѡ́нъ, є҆го́же созда̀.
10 И҆ побѣго́ша да́же до столпѡ́въ сѹ́щихъ на се́лѣхъ а҆зѡ́тскихъ, и҆ зажжѐ є҆го̀ ѻ҆гне́мъ, и҆ падо́ша ѿ ни́хъ двѣ̀ ты́сѧщы мѹже́й: и҆ возврати́сѧ въ зе́млю ї҆ѹ́динѹ въ ми́рѣ.
11 И҆ птоломе́й сы́нъ а҆вѹ́вовъ поста́вленъ бы́сть воево́дою въ по́ли ї҆ерїхѡ́на и҆ и҆мѧ́ше сребра̀ и҆ зла҄та мно́гѡ:
12 бѣ́ бо зѧ́ть а҆рхїере́овъ.
13 И҆ вознесе́сѧ се́рдце є҆гѡ̀, и҆ восхотѣ̀ ѡ҆держа́ти странѹ̀, и҆ помышлѧ́ше ле́стнѡ на сі́мѡна и҆ сынѡ́въ є҆гѡ̀, погѹби́ти и҆̀хъ.
14 Сі́мѡнъ же прохожда́ше гра́ды, ѩ҆̀же во странѣ̀ ї҆ѹде́йстѣй, попече́нїе и҆мѣ́ѧ ѡ҆ прилѣжа́нїи и҆́хъ, и҆ сни́де во ї҆ерїхѡ́нъ са́мъ и҆ маттаѳі́а, и҆ ї҆ѹ́да и҆ сы́нове є҆гѡ̀, лѣ́та сто̀ се́дмьдесѧтъ седма́гѡ мц҇а первагѡна́десѧть, се́й є҆́сть мц҇ъ сава́тъ.
15 И҆ прїѧ̀ и҆̀хъ сы́нъ а҆вѹ́вовъ въ тверды́ню, нарица́емѹю дѡ́къ, съ ле́стїю, ю҆́же созда̀, и҆ сотворѝ и҆̀мъ пи́ръ вели́къ, и҆ сокры̀ та́мѡ мѹ́жы.
16 И҆ є҆гда̀ ѹ҆пи́сѧ сі́мѡнъ и҆ сы́нове є҆гѡ̀, воста̀ птоломе́й и҆ и҆̀же съ ни́мъ, и҆ взѧ́ша ѻ҆рѹ҄жїѧ своѧ҄, и҆ внидо́ша къ сі́мѡнѹ на пи́ръ, и҆ ѹ҆би́ша є҆го̀ и҆ два̀ сы҄на є҆гѡ̀ и҆ нѣ́кїихъ ѿ ѻ҆́трѡкъ є҆гѡ̀.
17 И҆ сотворѝ пре́лесть вели́кѹ во ї҆и҃ли и҆ воздадѐ ѕла҄ѧ за блага҄ѧ.
18 И҆ писа̀ сїѧ҄ птоломе́й и҆ посла̀ ко царю̀, да по́слетъ є҆мѹ̀ во́євъ въ по́мощь, и҆ преда́стъ є҆мѹ̀ странѹ̀ и҆́хъ и҆ гра́ды.
19 И҆ посла̀ и҆ны҄ѧ въ газа́рѹ погѹби́ти ї҆ѡа́нна, и҆ ты́сѧщникѡмъ посла̀ посла҄нїѧ, да прїи́дѹтъ къ немѹ̀, да да́стъ и҆̀мъ сребро̀ и҆ зла́то и҆ да́ры.
20 И҆ и҆ны҄ѧ посла̀ ѡ҆б̾ѧ́ти ї҆ер҇ли́ма и҆ го́рѹ свѧти́лища.
21 И҆ предте́къ нѣ́кїй возвѣстѝ ї҆ѡа́ннѹ въ газа́рѣ, ѩ҆́кѡ поги́бе ѻ҆те́цъ є҆гѡ̀ и҆ бра́тїѧ є҆гѡ̀, и҆ ѩ҆́кѡ посла̀ и҆ тебѐ ѹ҆би́ти. И҆ слы́шавъ ѹ҆жасе́сѧ ѕѣлѡ̀.
22 И҆ ѩ҆́тъ мѹ́жы, и҆̀же прїидо́ша погѹби́ти є҆го̀, и҆ ѹ҆бѝ и҆̀хъ: позна́ бо ѩ҆́кѡ и҆́щѹтъ є҆го̀ ѹ҆би́ти.
23 И҆ прѡ́чаѧ слове́съ ї҆ѡа́нновыхъ и҆ бра́ней є҆гѡ̀ и҆ благи́хъ мѹ́жествъ є҆гѡ̀, и҆́миже благомѹ́жествова, и҆ созида́нїѧ стѣ́нъ, и҆̀хже созда̀, и҆ дѣѧ́нїй є҆гѡ̀,
24 сѐ, сїѧ҄ пи҄сана сѹ́ть въ кни́зѣ дні́й а҆рхїере́йства є҆гѡ̀, ѿне́лѣже бы́сть а҆рхїере́й по ѻ҆тцѣ̀ свое́мъ.
Нашли в тексте ошибку? Выделите её и нажмите: Ctrl + Enter

Первая книга Маккавейская, 16 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.