1 Сїѧ̀ кни́га повелѣ́нїй бж҃їихъ и҆ зако́нъ сы́й во вѣ́къ: всѝ держа́щїисѧ є҆ѧ̀ въ живо́тъ (вни́дѹтъ), ѡ҆ста́вившїи же ю҆̀ ѹ҆́мрѹтъ.
2 Ѡ҆брати́сѧ, ї҆а́кѡве, и҆ и҆ми́сѧ є҆ѧ̀, ходѝ ко сїѧ́нїю прѧ́мѡ свѣ́та є҆ѧ̀.
3 Не да́ждь и҆но́мѹ сла́вы твоеѧ̀, и҆ поле́зныхъ тебѣ̀ ѩ҆зы́кѹ чѹжде́мѹ.
4 Блаже́ни є҆смы̀, ї҆и҃лю, ѩ҆́кѡ ѹ҆гѡ́днаѧ бг҃ѹ на́мъ разѹ҄мна сѹ́ть.
5 Дерза́йте, лю́дїе моѝ, па́мѧть ї҆и҃лева.
6 Про́дани бы́сте ѩ҆зы́кѡмъ не на па́гѹбѹ: поне́же разгнѣ́васте бг҃а, пре́дани бы́сте сѹпоста́тѡмъ,
7 преѡгорчи́сте бо сотво́ршаго ва́съ, (бг҃а вѣ́чнаго,) поже́рше бѣсѡ́мъ, а҆ не бг҃ѹ:
8 забы́сте бо гд҇а пита́ющаго ва́съ, ѡ҆печа́листе же и҆ воспита́вшаго ва́съ ї҆ер҇ли́ма.
9 Ви́дѣ бо наше́дшїй ва́мъ гнѣ́въ ѿ бг҃а и҆ речѐ: слы́шите, присє́лницы сїѡ҄ни, наведе́ бо мѝ гд҇ь сѣ́тованїе вели́ко,
10 ви́дѣхъ бо плѣне́нїе люді́й сынѡ́въ мои́хъ и҆ дще́рей, є҆́же наведѐ и҆̀мъ вѣ́чный.
11 Пита́хъ бо ѧ҆̀ съ весе́лїемъ, и҆спѹсти́хъ же ѧ҆̀ съ пла́чемъ и҆ рыда́нїемъ.
12 Никто́же да ра́дѹетсѧ ѡ҆ мнѣ̀ вдови́цѣ и҆ ѡ҆ста́вленнѣй ѿ мно́гихъ, ѡ҆пѹстѣ́хъ за грѣхѝ ча҄дъ мои́хъ, поне́же ѹ҆клони́шасѧ ѿ зако́на бж҃їѧ,
13 и҆ ѡ҆правда́нїй є҆гѡ̀ не позна́ша, и҆ не ходи́ша въ пѹте́хъ за́повѣдїй бж҃їихъ, нижѐ стезьмѝ наказа́нїѧ въ пра́вдѣ є҆гѡ̀ стѹпа́ша.
14 Да прїи́дѹтъ ѡ҆кре́стнїи сїѡ҄ни, и҆ помѧни́те плѣне́нїе сынѡ́въ мои́хъ и҆ дще́рей, є҆́же наведѐ и҆̀мъ вѣ́чный:
15 наведе́ бо на нѧ̀ ѩ҆зы́къ и҆здале́ча, ѩ҆зы́къ безстѹ́дный и҆ и҆ноѧзы́чный:
16 поне́же не ѹ҆срами́шасѧ ста́рца, ни поми́ловаша ѻ҆троча́те, и҆ ѿведо́ша любе́зныхъ вдови́чихъ, и҆ ѿ дще́рей є҆ди́нѹ ѡ҆пѹстоши́ша.
17 А҆́зъ же ка́кѡ мо́щенъ помощѝ ва́мъ;
18 Наведы́й бо ва́мъ ѕла҄ѧ и҆зба́витъ ва́съ ѿ рѹкѝ вра҄гъ ва́шихъ.
19 И҆ди́те, ча҄да, и҆ди́те: а҆́зъ бо ѡ҆ста́хсѧ пѹста̀,
20 совлеко́хсѧ ри́зы ми́рныѧ, ѡ҆блеко́хсѧ же во вре́тище моле́нїѧ моегѡ̀: возопїю̀ къ вѣ́чномѹ во дни҄ моѧ҄.
21 Дерза́йте, ча҄да, возопі́йте къ бг҃ѹ, и҆ и҆зба́витъ ва́съ ѿ наси́лїѧ рѹкѝ вра́жїѧ.
22 А҆́зъ бо (и҆спе́рва) надѣ́ѧхсѧ на вѣ́чнаго ѡ҆ спасе́нїи ва́шемъ: и҆ прїи́де мѝ ра́дость ѿ ст҃а́гѡ въ поми́лованїи, є҆́же прїи́детъ ва́мъ вско́рѣ ѿ вѣ́чнагѡ сп҃са на́шегѡ.
23 И҆спѹсти́хъ бо ва́съ съ рыда́нїемъ и҆ пла́чемъ, ѿда́стъ же мѝ бг҃ъ ва́съ съ ра́достїю и҆ весе́лїемъ въ вѣ́къ.
24 ѩ҆́коже бо нн҃ѣ ви́дѣша присє́лницы сїѡ҄ни ва́ше плѣне́нїе (ѿ бг҃а), та́кожде ѹ҆́зрѧтъ вско́рѣ сп҃се́нїе ва́ше ѿ бг҃а, є҆́же прїи́детъ ва́мъ со сла́вою вели́кою и҆ со ѡ҆свѣще́нїемъ вѣ́чнагѡ.
25 Ча҄да, долготерпи́те и҆́же ѿ бг҃а наше́дшїй ва́мъ гнѣ́въ, гони́лъ бо тѧ̀ вра́гъ тво́й, и҆ ѹ҆́зриши па́гѹбѹ є҆гѡ̀ вско́рѣ и҆ на вы́ю є҆гѡ̀ настѹ́пиши.
26 Младі́и моѝ ходи́ша въ пѹти҄ же́стѡки, восхище́ни сѹ́ть, ѩ҆́коже ста́до похище́но врага́ми.
27 Дерза́йте, ча҄да, и҆ возопі́йте къ бг҃ѹ, бѹ́детъ бо ва́мъ ѿ наве́дшагѡ па́мѧть.
28 ѩ҆́коже бо бы́сть ѹ҆́мъ ва́шъ заблѹди́ти ва́мъ ѿ бг҃а, та́кѡ нн҃ѣ десѧти́жды ѹ҆сѹгѹби́те ѡ҆брати́вшесѧ взыска́ти є҆го̀:
29 наведы́й бо ва́мъ ѕла҄ѧ наведе́тъ ва́мъ вѣ́чное весе́лїе со сп҃се́нїемъ ва́шимъ.
30 Дерза́й, ї҆ер҇ли́ме, ѹ҆тѣ́шитъ тѧ̀ нарекі́й тебѐ.
31 Ѡ҆каѧ́нни ѡ҆ѕло́бившїи тѧ̀ и҆ ра́довавшїисѧ ѡ҆ паде́нїи твое́мъ, (мще́нїе бѹ́детъ над̾ ни́ми).
32 Ѡ҆каѧ́нни гра́ди, и҆̀мже порабо́таша ча҄да твоѧ҄, ѡ҆каѧ́нна прїи́мшаѧ сы́ны твоѧ҄.
33 ѩ҆́коже бо пора́довасѧ ѡ҆ твое́мъ паде́нїи и҆ возвесели́сѧ ѡ҆ разоре́нїи твое́мъ, та́кожде ѡ҆печа́литсѧ ѡ҆ свое́мъ запѹстѣ́нїи.
34 И҆ ѿсѣкѹ̀ ѿ неѧ̀ весе́лїе многонаро́дства, и҆ велича́нїе є҆ѧ̀ бѹ́детъ въ рыда́нїе.
35 Ѻ҆́гнь и҆ на́йдетъ на ню̀ ѿ вѣ́чнагѡ во дни҄ мнѡ́ги, и҆ насели́тсѧ бѣ́сами на мно́жайшее вре́мѧ.
36 Воззрѝ на восто́къ, ї҆ер҇ли́ме, и҆ ви́ждь весе́лїе грѧдѹ́щее тебѣ̀ ѿ бг҃а.
37 Сѐ, грѧдѹ́тъ сы́нове твоѝ, и҆̀хже и҆спѹсти́лъ є҆сѝ, грѧдѹ́тъ со́брани ѿ востѡ́къ да́же до за҄падъ сло́вомъ ст҃а́гѡ, ра́дѹющесѧ ѡ҆ сла́вѣ бж҃їей.
Нашли в тексте ошибку? Выделите её и нажмите: Ctrl + Enter

Книга Варуха, 4 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.